Зәбүр 34 - Изге Яҙма

1 Дауыттың мәҙхиәһе.

¹ Дауыттың мәҙхиәһе. Эй Раббы, миңә ҡаршы көрәшкәндәр менән Һин Үҙең көрәш, Миңә ҡаршы алышҡандар менән Һин Үҙең алыш!

² Ал ҡоралың, ал ҡалҡаның, Ярҙамға ҡалҡ!

³ Тот һөңгөңдө, баҫтырыусыларҙың ҡый юлын; Әйт йәнемә: «Ҡотҡарыусың Мин һинең!»

⁴ Йәнемә теш ҡайрағандар хур булһын! Яуыз ниәт йөрөткәндәр, Оятҡа ҡалып, кире боролһон!

⁵ Елгә осҡан кәбәк кеүек булһындар, Раббының фәрештәһенән ҡыуылһындар.

⁶ Юлдары ҡараңғы, тайғаҡ булһын, Раббы фәрештәһе арттарынан баҫтырһын!

⁷ Сөнки нахаҡҡа миңә тоҙаҡ ҡорҙолар; Һис ғәйепһеҙ йәнемә соҡор ҡаҙҙылар.

⁸ Баштарына көтмәгәндә афәт килһен, Ҡорған тоҙаҡтарына үҙҙәре ҡапһын, Улар шунда һәләкәт тапһын.

⁹ Ә йәнем Раббыла шатлыҡ табыр, Уның ҡотҡарғанына ҡыуаныр.

¹⁰ Бөтөн булмышым менән әйтермен: «Кем Һиңә оҡшаш, эй Раббы? Көсһөҙҙө көслөнән аралайһың, Ярлы менән хәйерсене Талаусынан ҡотҡараһың!»

¹¹ Залимдар миңә ҡаршы шаһитлыҡ ҡыла; Мин белмәгән нәмәләр хаҡында һорайҙар.

¹² Улар яҡшылығыма яуызлыҡ менән яуап ҡайтарҙы, Япа-яңғыҙ йәтим булып ҡалдым.

¹³ Ә мин улар сирләп ятҡан саҡта, Хәсрәтләнеп ҡыл кейемгә төрөнгәйнем. Үҙемде язалап ураҙа тотҡайным, Улар өсөн ҡабат-ҡабат доға уҡығайным.

¹⁴ Уларҙы дуҫым, туғаным һымаҡ яҡын күрҙем. Әсәһе өсөн йәш түккән кеше һымаҡ, Бөгөлдөм, башымды һәлендерҙем.

¹⁵ Әммә мин абынғас, улар ҡыуандылар, Өймәкләшеп ҡаршы тупландылар. Юлбаҫарҙар абайламаҫтан төртөп йығып, Туҡтауһыҙ йолҡҡоланылар.

¹⁶ Иманһыҙҙар һымаҡ минән мыҫҡыллап көләләр, Мәсхәрәләп тештәрен шығырҙаттылар.

¹⁷ Эй бөйөк Хакимым, ҡасанғаса ситтән генә күҙәтерһең? Йәнемде – улар залимлығынан, Ғүмеремде был йыртҡыс арыҫландарҙан ҡотҡар!

¹⁸ Шул саҡ оло йыйында Һине данлармын, Күмәк халыҡ алдында маҡтау йырлармын.

¹⁹ Бинахаҡҡа мине дошман күргәндәр, Ғәйепһеҙҙән миңә нәфрәт тотҡандар, Бер-береһенә күҙ ҡыҫып, тантана итә алмаһын.

²⁰ Сөнки улар именлек өсөн тырышмай, Илдәге тыныс кешеләргә ҡаршы мәкер туплай.

²¹ Ауыҙҙарын йәйеп миңә ғәйеп тағалар: «Ысын! Үҙ күҙебеҙ менән күрҙек!» – тиеп торалар.

²² Йә Раббым, быны Һин күрҙең, өнһөҙ ҡалма! Эй бөйөк Хакимым, зинһар, Һин минән йыраҡ торма!

²³ Уянһаңсы, Аллам, яҡлашһаңсы, Тор, бөйөк Хакимым, дәғүәмде хаҡҡа сығар!

²⁴ Ғәҙеллегең менән ҡыл хөкөмөң! Раббым Аллам, минән көлмәһендәр!

²⁵ Әйтмәһендәр эстән генә: «Әһә, моратыбыҙға ирештек!» Һөйләмәһендәр: «Башын ашаныҡ!»

²⁶ Минең хәсрәтемә ҡыуанғандар Мәсхәрәгә ҡалып хур булһындар. Эреләнеп ҡаршыма сыҡҡандар Оят-яманатҡа солғанһындар.

²⁷ Мин хаҡ булып сыҡҡанымды теләүселәр Һөйөнөшөп Һиңә дан йырлаһын. Туҡтауһыҙ былай тип ҡабатлаһын: «Ҡолона именлек биргән Раббы бөйөк!»

²⁸ Ә мин ғәҙеллегеңде телдән төшөрмәм, Көн һайын Һине данлармын.