Зәбүр 16 - Изге Яҙма

1 Дауыттың доғаһы.

¹ Дауыттың доғаһы. Эй Раббы, хаҡ дәғүәмде тыңла, Ялбарыуыма ҡолаҡ һал, Хәйләһеҙ ирендәрем әйткән доғаны ишет!

² Һинең хозурыңдан сыҡһын миңә хөкөм; Күҙең кем хаҡлы икәнде күрһен.

³ Һин йөрәгемә текәлдең, Төндә килеп мине һынаның, Бер ниндәй ҙә ғәйеп таба алманың, Ауыҙымдан гонаһ һүҙ сыҡмай минең.

⁴ Бәндәләр нимә генә ҡылһа ла, Мин ауыҙыңдан сыҡҡан һүҙҙәрҙе тотам, Залимдар юлынан йыраҡ торам.

⁵ Аҙымдарым Һинең юлдан атлай, Тайпылыуҙы белмәй аяҡтарым.

⁶ Һине саҡырам, эй Алла, миңә яуап ҡайтарырһың; Ҡолаҡ һал, әйткәндәремде ишет!

⁷ Ғәжәйеп мөхәббәтеңде күрһәт, Үҙеңә һыйынғандарҙы дошмандарҙан Уң ҡулың менән һаҡла!

⁸ Күҙ алмаңдай һаҡла мине; Ҡанатың аҫтына йәшер

⁹ Миңә һөжүм иткән яуыздарҙан, Һырып алған үлемесле дошмандарҙан.

¹⁰ Уларҙың йөрәктәрен май бөргән, Үҙҙәре оятһыҙ маҡтаналар.

¹¹ Улар эҙҙәремә баҫып килә, Ҡамалайҙар мине һәр тарафтан, Йығып һалыр өсөн һағалайҙар.

¹² Гүйә ҡорбанын өҙгөләргә яҫҡынған йыртҡыс, Боҫоп, табышын аңдыған йәш арыҫлан.

¹³ Йә Раббы, ҡалҡ, уларҙың ҡаршыһына баҫ! Уларҙы ергә йығып һал! Йәнемде ҡотҡар ҡылысың менән яуыздарҙан.

¹⁴ Йә Раббы, был кешеләрҙән, Өлөштәре донъялыҡта булғандарҙан Үҙ ҡулдарың менән ҡотҡар. Ҡорһаҡтары хазиналарың менән тулһын, Балалары алҡынғанса ашап туйһын, Артҡаны ейәндәренә тороп ҡалһын!

¹⁵ Мин иһә тоғролоҡ менән йөҙөңә бағырмын, Уянғанда Һинең рәүешеңде күреүемә туҡ булырмын.