Сефанъяһ 2 - Изге Яҙма

Тәүбәгә саҡырыу

¹ Эй оятһыҙ халыҡ, йыйыл, туплан!

² Һеҙҙең өҫтән ҡарар ҡылынғансы, Кәбәк кеүек осоп көн үткәнсе, Раббының дәһшәтле ярһыуы, Раббының асыу көнө Өҫтөгөҙгә килеп ябырылғансы йыйылығыҙ!

³ Раббыны эҙләгеҙ, Илдең итәғәтле әҙәмдәре, Раббы ҡанундарын үтәүселәр, Хаҡлыҡ эҙләгеҙ, Тыйнаҡ булығыҙ – Бәлки, Раббының асыу көнөндә Боҫоп ҡалыу һеҙгә насип булыр.

Раббының пелештиҙәрҙе хөкөм итеүе

⁴ Газа ҡалаһын ташлап китерҙәр, Ашҡылон бушлыҡҡа әйләнер, Ашдод төш мәлендә ҡыуылыр, Ғәҡрон тамырынан йолҡоп алыныр.

⁵ Диңгеҙ буйында йәшәүселәрҙең, Керети ҡәүеменең башына бәлә! Пелештиҙәр ере Ҡәнғән, Раббының һүҙе һиңә ҡаршы: «Мин һине ҡырам, Бер кешеңде лә тере ҡалдырмайым!» – ти Ул.

⁶ Диңгеҙ ярындағы ил – көтөүлек, Һарыҡ көтә торған болонлоҡ Ҡуйҙар өсөн ялан кәртә булыр.

⁷ Йәһүҙә нәҫеленең һау ҡалғандары Был ерҙәрҙе төйәк итер, Улар бында малын көтөр; Ашҡылон өйҙәрендә кисен хәл йыйыр, Сөнки Аллалары Раббы уларҙы хәстәрләр, Элекке именлекте кире ҡайтарыр.

Раббының Моавҡа һәм ғаммондарға хөкөмө

⁸ «Мин Моавтың әйткән әр һүҙҙәрен, Ғаммондарҙың хурлауын ишеттем. Улар Минең халҡымды мәсхәрәләне, Уның ерҙәрендә һауаланып танау сөйҙө.

⁹ Шуның өсөн, барлығым менән ант итәм, – ти Күк ғәскәрҙәре Раббыһы, Исраил Аллаһы. – Моав Содом һымаҡ булыр, Ғаммон ерҙәре – Ғамора кеүек. Уларҙы ҡый үләне баҫып китер, Баҫыуҙары татырланыр, Ерҙәре мәңгелек сүлгә әйләнер. Халҡымдың тере ҡалғандары уларҙы талап, Ерҙәрен үҙҙәренә милек итеп алыр.

¹⁰ Тәкәбберлектәре өсөн, Күк ғәскәрҙәре Раббыһы халҡын мыҫҡыл итеп түбәнһеткән, Уларҙы хурлаған өсөн яза был.

¹¹ Раббы уларҙы дәһшәткә һалыр, Ер йөҙөндәге бар илаһтарҙы юҡҡа сығарыр. Кешеләрҙең һәр береһе үҙ иленән, Алыҫтарҙа йәшәгән һәр халыҡ үҙ төбәгенән Уға сәждә ҡылыр.

Раббының Ашшурға хөкөмө

¹² Эй Куш халҡы, һеҙ ҙә Минең ҡылысымдан үлерһегеҙ».

¹³ Раббы ҡулын төньяҡ тарафына һуҙып, Ашшурҙы юҡ итер, Ниневенән тик хараба ҡалыр, Ул сүллек һымаҡ ҡоро ергә әйләнер.

¹⁴ Унда мал-тыуар һәм Һәр төрлө ҡош-кейек хәл йыйыр, Аунап ятҡан бағана баштары араһында Ябалаҡтар менән терпе йәшәр, Тәҙрәләрҙән ҡош тауышы ишетелер. Кедр көплөгө айырылып төшкән Ишек тупһаларында ҡоҙғон ҡысҡырыр.

¹⁵ Хәүефһеҙ йәшәгән бөйөк ҡаламы был? Маҡтанып эстән генә: «Донъяла миңә тиңдәр юҡ», – тип әйтә ине; Бына хәҙер инде ул хараба, Ҡош-кейектәр өсөн оя булды! Үткән-һүткән һәр кем мәсхәрәләп, Һыҙғырып ебәрер, бот сабыр.