Руҫ китабы 2 - Изге Яҙма

Рут менән Боғаздың осрашыуы

¹ Ноғомиҙың ире Әлимәләхтең үҙе менән бер нәҫелдән Боғаз тигән туғаны булып, ул бай һәм хөрмәтле кеше ине.

² Бер көндө Моав ҡыҙы Рут Ноғомиға: – Рөхсәт итһәң, мин, баҫыуға сығып, берәй мәрхәмәтле кеше артынан башаҡ йыйып ҡайтыр инем, – тине. – Бар, ҡыҙым, – тине Ноғоми.

³ Шулай итеп, Рут баҫыуға китте, ураҡсылар артынан башаҡ йыя башланы. Баҡһаң, был баҫыу Әлимәләх нәҫеленән булған Боғаздыҡы булып сыҡты.

⁴ Бына бер ваҡыт Бейт-Ләхәмдән Боғаз килеп, ураҡсыларҙы сәләмләне: – Раббы һеҙҙең менән булһын! Ураҡсылар уға: – Раббы һиңә фатихаһын бирһен, – тип яуапланы.

⁵ Боғаз ураҡсыларға күҙ-ҡолаҡ булып йөрөгән хеҙмәтсеһенән: – Анау йәш ҡатын кемдеке ул? – тип һораны.

⁶ Хеҙмәтсе уға: – Был Ноғоми менән Моав иленән килгән Моав ҡыҙы ул, – тине. –

⁷ Минән: «Ураҡсыларҙан һуң көлтәләр араһында ҡойолоп ҡалған башаҡтарҙы йыйырға рөхсәт итһәгеҙ ине», – тип һорағайны. Иртә таңдан килеп, шунан бирле туҡтамай, сатырға ла инмәй тиерлек.

⁸ – Ҡара әле, ҡыҙым, – тине Боғаз Рутҡа. – Башаҡ сүпләргә башҡалар баҫыуына йөрөмә, ошонан китмә, минең ураҡсы ҡатындар янында йөрө.

⁹ Ураҡсылар ҡайһы баҫыуҙа ура, шулар артынан йөрө. Мин үҙемдең кешеләргә ныҡлап әйттем: һине йәберләмәҫтәр. Һыуһаһаң, һыуҙы хеҙмәтселәрем алып килгән һауыттан эс, – тине.

¹⁰ Рут эйелеп йөҙтүбән ергә ҡапланды ла: – Мин ни өсөн һинең күҙеңдә шулай мәрхәмәт ҡаҙандым? Сит ил кешеһе булыуыма ҡарамаҫтан, ниңә мине хәстәрләйһең? – тип һораны.

¹¹ Боғаз уға: – Ирең үлгәндән һуң ҡәйнәңде нисек баҡҡаныңды миңә һөйләнеләр, атай-әсәйеңде, тыуған илеңде ҡалдырып, бығаса үҙең белмәгән-күрмәгән халыҡ араһында йәшәргә килгәнһең.

¹² Ҡылған игелегең өсөн Раббы һиңә рәхмәтен бирһен! Исраил Аллаһы Раббының ҡанаты аҫтына һыйынырға тип килгән һине Раббы Үҙе бүләкләһен, – тине.

¹³ Рут: – Миңә ҡарата рәхимлеһең, әфәндем. Һинең хеҙмәтсе ҡатындарың араһынан булмаһам да, мин ҡолоңдо тынысландырҙың, яғымлы һүҙҙәрең менән күңелемде йыуаттың, – тине.

¹⁴ Төшкө аш мәле еткәс, Боғаз уға: – Кил, ултыр, ашап-эсеп ал, – тине. – Икмәгеңде шарап һеркәһенә манып аша. Рут ураҡсылар менән йәнәш ултырҙы, Боғаз уға ҡурмас бирҙе. Ҡатын туйғансы ашаны, алдынан артып та ҡалды.

¹⁵ Шунан һуң Рут ҡойолған башаҡтарҙы йыя китте. Боғаз иһә кешеләренә: – Көлтә араһында ҡалған башаҡтарҙы ла сүпләһен: теймәгеҙ уға.

¹⁶ Көлтә бәйләгән саҡта, юрамал башаҡтарҙы төшөрөп ҡалдырығыҙ – йыйһын, уға һүҙ әйтмәгеҙ, – тине.

¹⁷ Рут кискә тиклем башаҡ сүпләне. Йыйғанын һуғып алғас, бер эфа тирәһе арпа сыҡты.

¹⁸ Шунан ул арпаны алып ҡалаға ҡайтты һәм йыйған ашлығын ҡәйнәһенә күрһәтте. Төшкө аштан артып ҡалған ҡурмасты ла бирҙе.

¹⁹ Ҡәйнәһе уға: – Бөгөн ҡайҙа башаҡ йыйҙың? Ҡайҙа эшләнең? Һиңә яҡшылыҡ күрһәткән кешегә рәхмәт яуһын, – тине. Рут ҡәйнәһенә ҡайҙа эшләгәнен һөйләне: – Бөгөн мин баҫыуында башаҡ йыйған кешенең исеме Боғаз, – тине.

²⁰ – Уға Раббының рәхмәте төшһөн! – тине Ноғоми килененә. – Ул иҫәндәрҙе лә, үлгәндәрҙе лә мәрхәмәтенән ҡалдырмай. Шунан: – Боғаз беҙҙең яҡын туғандарыбыҙҙан, ғаиләбеҙҙе үҙенең ҡурсалауы аҫтына алырға бурыслы йолоусыбыҙ, – тине.

²¹ Моав ҡыҙы Рут: – Ул миңә хатта: «Ураҡ бөткәнсе минең хеҙмәтселәрем янында йөрө», – тип әйтте, – тине.

²² Ноғоми килененә: – Ҡыҙым, уның ураҡсылары янында йөрөүең яҡшы, юҡһа икенсе баҫыуҙа һине рәнйетеүҙәре бар, – тине.

²³ Рут, арпа һәм бойҙай урағы бөткәнсе Боғаздың ураҡсылары янында йөрөп, башаҡ сүпләне һәм ҡәйнәһе менән бергә йәшәне.