Йырҙар йыры 6 - Изге Яҙма

Ҡыҙҙың әхирәттәре

¹ Һөйгәнең ҡайҙарға китте, Эй гүзәлдәрҙең гүзәле? Ҡайһы тарафҡа юл алды, әйтсе? Һинең менән бергәләп эҙләрбеҙ.

Ҡыҙ

² Һөйгәнем үҙенең баҡсаһына төштө, Еҫле гөл түтәлдәре янына. Ул шунда баҡсалар араһында йөрөр, Көтөүен лилиәләр араһында утлатыр.

³ Мин – һөйгәнемдеке, һөйгәнем – минеке. Ул көтөүҙәрен лилиәләр араһында утлата.

Егет

⁴ Тирса ҡалаһылай гүзәлһең һин, йәрем. Йәрүсәлим кеүек һөйкөмлөһөң, Байраҡтарын күтәргән ғәскәрҙәй дәһшәтлеһең.

⁵ Күҙҙәреңде ситкә алсы минән, Улар минең баҙнатымды ала! Сәсең гүйә Ғилғәд тауын ябып, Аҫҡа ағылған кәзә көтөүе һымаҡ.

⁶ Тештәрең һыуҙа йыуынып сыҡҡан һарыҡтай аҡ, Һәр ҡайһыһының игеҙәге бар, Араһында береһе лә юғалмаған.

⁷ Уртаға бүленгән анар алмаһылай, Япмаң аҫтындағы яңаҡтарың.

⁸ Ана, алтмыш батшабикә, һикһән йәриә, Йәш ҡыҙҙарҙың иҫәбе-һаны юҡ!

⁹ Әммә минең күгәрсенем, гүзәлем берҙән-бер! Әсәһенең яңғыҙ ҡыҙы, Тапҡан әсәһенең ғәзизе. Ҡыҙҙар уны күреп, бәхетле, ти, Батшабикә, йәриәләр маҡтай.

Ҡыҙҙың әхирәттәре

¹⁰ Кем ул таңғы шәфәҡ кеүек сихри, Айҙай гүзәл, ҡояш кеүек балҡыу, Байраҡтарын күтәргән ғәскәрҙәй дәһшәтле?

Ҡыҙ

¹¹ Үҙәндәге йәшеллекте күрергә тип, Мин сәтләүек туғайына төштөм. Йөҙөм ҡыуағы япраҡҡа тумалғанмы, Анар ағасы сәскә атҡанмы?

¹² Үҙем дә аңламай ҡалдым, Арманым затлы халҡымдың Арбаһына мине мендерҙе.