Йырҙар йыры 4 - Изге Яҙма

Егет

¹ Һин гүзәлһең, эй йәрем, шундай гүзәлһең! Япмаң аша ҡараған күҙҙәрең – күк күгәрсен. Сәсең гүйә Ғилғәд тауын ябып, Аҫҡа ағылған кәзә көтөүе һымаҡ.

² Тештәрең яңы йөнө ҡырҡылған, Һыуҙа йыуынып сыҡҡан һарыҡ һымаҡ аҡ, Һәр ҡайһыһының игеҙәге бар. Араһында береһе лә юғалмаған.

³ Ал ҡыҙыл таҫмалай ирендәрең, Ауыҙың да гүзәл һинең! Япмаң аҫтындағы яңаҡтарың Уртаға бүленгән анар алмаһындай.

⁴ Муйының зауыҡ менән ҡоролған Дауыт манараһы һымаҡ. Уны гүйә мең ҡалҡан биҙәгән, Барыһы ла ҡаһармандарҙың ҡалҡаны.

⁵ Түштәрең ике болан балаһы һымаҡ, Гүйә ғәзәлдең игеҙ быҙауы Лилиәләр араһында утлай.

⁶ Көндөң еләҫендә, Күләгәләр оҙонайған саҡта, Еҫле үләндәр тауына, Хуш еҫ аңҡытҡан түбәгә менәйемсе.

⁷ Ниндәй гүзәлһең һин, йәрем, Бер ниндәй кәмселегең юҡ!

⁸ Минең менән Ливандан кил, эй кәләшем! Кил минең менән Ливандан! Амана башынан төш, Сенир менән Хермон түбәһенән, Арыҫландарҙың өңөнән, Ҡапландар йәшәгән тауҙарҙан төш.

⁹ Эй һылыуым, кәләшем минең, Йөрәгемде әсир иттең. Күҙҙәреңдең бер ҡарашы менән, Муйыныңдағы бер мәрйен менән Минең йәнемде арбаның!

¹⁰ Һөйөүең шундай ләззәтле, Һылыуым, кәләшем минең, Һинең һөйөүең шараптан татлы; Еҫле майҙарыңдың еҫе Барлыҡ хушбуйҙарҙан тәмлерәк!

¹¹ Ирендәрең солоҡ балдай татлы, Наҙлы һүҙең – бал да май, кәләшем минең. Кейемеңдән аңҡый Ливандың хуш еҫе!

¹² Һылыуым минең, кәләшем, Гүйә һин бикле баҡсаһың, Диуар менән уратылған инеш, Ҡапҡасы ябылған ҡоҙоҡ.

¹³ Һайланма емештәр биргән Анар баҡсаһына оҡшайһың. Был баҡсала сөмбөлдәр, ҡына гөлдәр,

¹⁴ Эйе, был баҡсала – нард, зәғферәндәр, Хуш еҫле ҡамыш һәм дәрсен, Барса ладан ағастары, Мирра һәм йөҙйәшәр – Иң затлы хуш еҫле үҫемлектәр.

¹⁵ Һөйгәнем, һин – баҡсалағы шишмә, Тере һыу инеше, Ливан тауынан аҡҡан ағын һыу.

Ҡыҙ

¹⁶ Эй төньяҡ еле, уян, Һин дә иҫ, эй көньяҡ еле! Баҡсама иҫ – хуш еҫе таралһын. Баҡсаһына килһен һөйгәнем, Иң татлы емештәремдән ауыҙ итһен!