Йырҙар йыры 2 - Изге Яҙма

Ҡыҙ

¹ Мин – Шарондың нәркәс гөлө, Үҙәндәрҙең лилиә сәскәһе.

Егет

² Сәнскәк араһында үҫкән лилиәләй Минең йәрем ҡыҙҙар араһында.

Ҡыҙ

³ Урман ағастары араһындағы алмағас һымаҡ Минең һөйгәнем егеттәр араһында. Уның күләгәһендә ултырып зауыҡланам, Емешенең таты ауыҙымдан китмәй.

⁴ Мәжлес йортона ул мине алып инде, Баш осомда һөйөү әләмен күтәрҙе.

⁵ Йөҙөм ҡаптырып хәл индерегеҙ, Алмалар менән ҡеүәт өҫтәгеҙ: Һөйөү ялҡынында янам!

⁶ Йәремдең һул беләге башым аҫтында, Уңы менән ҡыҫып ҡосаҡлаған.

⁷ Ғәзәлдәр һәм боландар хаҡына Ялбарамын һеҙгә, эй Йәрүсәлим ҡыҙҙары! Беҙҙе был һөйөүҙән уятмағыҙ, ҡуҙғатмағыҙ, Танһығыбыҙ ҡанғанғаса ҡалһын.

⁸ Был һөйгәнемдең тауышы! Тау армыттарын артылып, Түбәләрҙән елеп ашығып килә!

⁹ Йәш боланға, ғәзәлгә оҡшаған йәрем. Ҡара, диуар эргәһендә тора, Беҙҙең тәҙрәбеҙгә ҡарай, Рәшәткә аша күҙ һала.

¹⁰ Миңә өндәшә һөйгәнем: «Тор, йәрем, әйҙә, гүзәлем, минең менән!

¹¹ Ҡара, ҡыш та уҙып китте, Ямғырҙар ҙа үтте, туҡтаны,

¹² Тирә-йүндә сәскәләр күренде, Шатлыҡлы йырҙар миҙгеле килде, Күгәрсендәр гөрләй илебеҙҙә.

¹³ Инжир емеше һутҡа тулышҡан, Гөлгә күмелгән йөҙөм ҡыуағы Тирә-яҡҡа хуш еҫен аңҡыта. Тор, йәрем, әйҙә, гүзәлем, минең менән!»

Егет

¹⁴ Ҡаялар араһында, тарлауыҡтарҙа Йәшенгән күгәрсенем һин! Нурлы йөҙөңдө күрәйем, Моңло тауышыңды ишетәйем, Тауышың яғымлы, йөҙөң наҙлы.

¹⁵ Төлкөләрҙе тотоғоҙ, бәләкәй төлкөләрҙе! Улар йөҙөм баҡсаһын ҡорота – Әле баҡсаларыбыҙ шау сәскә.

Ҡыҙ

¹⁶ Һөйгәнем – минеке, мин – уныҡы, Көтөүҙәрен лилиәләр араһында утлата.

¹⁷ Эй һөйгәнем, көндөң еләҫендә, Эңер төшкәнгә тиклем кире ҡайт. Тауҙарҙа, тарлауыҡтарҙа елгән ғәзәл, Етеҙ йәш болан һымаҡ бул!