Йырҙар йыры 1 - Изге Яҙма

¹ Сөләймәндең иң гүзәл йыры. Үпһен мине, үпһен ирендәрең! Һөйөүең һинең шараптан татлы.

Ҡыҙ

² Хушбуйың һулап туйғыһыҙ, Исемең – гүйә түгелеп киткән еҫле май, Шуға ла ҡыҙҙар ярата һине.

³ Үҙ артыңдан әйҙә мине – йүгерәйек! Батшам мине бүлмәһенә алып килде! Эй батшабыҙ, ҡыуанырбыҙ, Һинең менән һоҡланырбыҙ, Һөйөүеңде шараптан былай маҡтарбыҙ – Ысынлап та яратыуға лайыҡһың һин!

Ҡыҙҙың әхирәттәре Ҡыҙ

⁴ Эй Йәрүсәлим ҡыҙҙары! Ҡара булһам да, Ҡыдар сатырҙарылай, Сөләймәндең шаршауҙарылай матур мин.

⁵ Ҡарасманлығыма ҡарамағыҙ, Ҡояш мине шулай ҡарайтты. Ағайҙарым миңә асыуланып, Йөҙөм баҡсаларын ҡарауыллар өсөн ҡуйҙы, Ә үҙемдең баҡсамды һаҡлай алманым.

⁶ Йән һөйгәнем, әйтсе миңә: Малдарыңды ҡайҙа утлатаһың? Төш мәлендә ҡайҙа ятҡыраһың? Ниңә мин дуҫтарыңдың малы янында Бөркәнсек ябынған ҡатындай йөрөргә тейеш?

Егет

⁷ Ҡайҙалығымды белмәһәң, Эй гүзәлдәрҙең гүзәле, Һарыҡтарҙың эҙенән бар. Көтөүселәрҙең сатырҙары янында Үҙеңдең кәзә бәрәстәреңде утлат.

⁸ Фирғәүен арбаһына егелгән аттар араһындағы байталға Оҡшатам һине, һөйөклөм!

⁹ Бит алмаңды һырғаларың биҙәп тора, Мунсаҡ тағылған муйының ниндәй гүзәл!

¹⁰ Һиңә көмөш тамсылар менән Алтын биҙәүестәр яһатырбыҙ.

Ҡыҙ

¹¹ Батшам табын янында ҡырын ятҡанда Хушбуйымдың еҫтәре таралды.

¹² Түштәремдең араһында ятҡан Мирра һалынған янсыҡ һымаҡ һөйгәнем.

¹³ Ғейн-Гедиҙең йөҙөм баҡсаларындағы Бер шәлкем ҡына гөлөлөр йәрем.

Егет

¹⁴ Ниндәй гүзәлһең, һөйөклөм, Ниндәй гүзәлһең һин! Күгәрсендәй һинең күҙҙәрең!

Ҡыҙ

¹⁵ Эй һөйөклөм, ниндәй сибәрһең һин, һөйкөмлөһөң! Йәшел үлән беҙҙең түшәгебеҙ.

¹⁶ Өйөбөҙҙөң түшәме – кедрҙар, Диуарҙары иһә – кипаристар.