Йушағ 12 - Изге Яҙма

Еңелгән батшаларҙың исемлеге

¹ Исраилдар Иордандан көнсығышҡа – Арнон үҙәненән Хермон тауына тиклем, Ғарава тигеҙлегенең көнсығыш өлөшөн дә индереп, йәйрәп ятҡан ерҙәрҙең батшаларын тар-мар итте һәм ул ерҙәрҙе үҙҙәренә тартып алды. Бына ул батшаларҙың исемлеге:

² Хешбонда йәшәгән әмөри батшаһы Сихон. Уның батшалығы Арнон үҙәне ситендәге Ғароғерҙан – үҙәндең урта бер еренән башлана һәм ғаммондарҙың сиге булған Яббоҡ йылғаһына тиклем һуҙыла, Ғилғәдтең яртыһын үҙ эсенә ала.

³ Шулай уҡ Ғарава тигеҙлеге – Киннереҫ күленең көнсығыш ярынан Ғарава диңгеҙе – Тоҙло диңгеҙҙең көнсығыш ярына тиклем, Бейт-Йешимоҫҡа һәм көньяҡта Писга тауы итәктәренә тиклемге ерҙәргә йәйелә ине.

⁴ Һуңғы рефаларҙың береһе булған Башан батшаһы Ғоғ Ғаштароҫта һәм Әдрәғиҙә хакимлыҡ итә ине.

⁵ Ул Хермон тауына, Салхаға, тотош Башанға – гешуриҙар менән мағахаҫтарҙың сигенә тиклем, шулай уҡ Ғилғәдтең яртыһына, Хешбон батшаһы Сихондың сиктәренә тиклем, хужа ине.

⁶ Раббы ҡоло Муса һәм исраилдар был батшаларҙы тар-мар итте. Муса уларҙың ерҙәрен Рәүвән менән Ғад ырыуҙары һәм Менашше ырыуының яртыһына биләмә итеп бирҙе.

^7-8 Йушағ һәм исраилдар Иордандың көнбайышындағы батшаларҙы – Ливан үҙәнендәге Бәғел-Ғадтан башлап Сеғирға табан һуҙылған Халаҡ тауына тиклем йәйелгән ерҙәрҙең батшаларын тар-мар итте. Йушағ хитти, әмөри, ҡәнғәни, перизи, хиууи һәм йевусиҙәр йәшәгән ерҙәрҙе, Шефеланы, көнбайыштағы тау итәктәрен, Ғарава тигеҙлеген, тау битләүҙәрен, сүллекте һәм Негевты Исраил ырыуҙарына биләмәгә бүлеп бирҙе.

⁹ Бына был батшалар: Йерихо батшаһы, Бейт-Ил эргәһендәге Ғай ҡалаһының батшаһы,

¹⁰ Йәрүсәлим батшаһы, Хеврон батшаһы,

¹¹ Ярмуҫ батшаһы, Лахиш батшаһы,

¹² Ғәғлон батшаһы, Гәзәр батшаһы,

¹³ Девир батшаһы, Гәдәр батшаһы,

¹⁴ Хорма батшаһы, Ғарад батшаһы,

¹⁵ Ливна батшаһы, Ғадуллам батшаһы,

¹⁶ Маҡҡыда батшаһы, Бейт-Ил батшаһы,

¹⁷ Таппуах батшаһы, Хефәр батшаһы,

¹⁸ Афеҡ батшаһы, Шарон тигеҙлеге батшаһы,

¹⁹ Мадон батшаһы, Хасор батшаһы,

²⁰ Шимрон-Мерон батшаһы, Ахшаф батшаһы,

²¹ Тағанах батшаһы, Мегиддо батшаһы,

²² Ҡәдәш батшаһы, Кармәл янындағы Йоҡнеғам батшаһы,

²³ Нафаҫ-Дорҙағы Дор батшаһы, Галилеялағы Гоим батшаһы,

²⁴ Тирса батшаһы, йәмғеһе – утыҙ бер батша.