Ишағыяһ 26 - Изге Яҙма

Һөйөнөс йыры

¹ Ул көндө Йәһүҙә ерендә ошондай йыр йырланыр: «Беҙҙең ҡалабыҙ көслө! Раббының ҡотҡарыуы – Уға үҙе диуар һәм нығытма.

² Асығыҙ ҡаланың ҡапҡаларын, Тоғро ҡалған ғәҙел ҡәүем эскә инһен.

³ Һин, Раббы, рухы ныҡ булғандарға Камил именлек бирерһең, Сөнки улар Һиңә өмөт бағлай.

⁴ Һеҙ Раббыға һәр саҡ инанығыҙ, Сөнки ЙәһүәАлла – мәңгелек Ҡаябыҙ.

⁵ Ул бейектә йәшәгәндәрҙе йығыр, Юғарылағы ҡаланы ҡолатыр. Уны ер менән тигеҙләр, саңға батырыр.

⁶ Ул ҡала аяҡ аҫтында ҡалыр, Ярлы-фәҡирҙең аяғы, Хәйерсенең табан аҫтында тапалыр».

⁷ Тәҡүәнең юлы – тура, Һин Уның юлын тигеҙ итәһең.

⁸ Ысынлап та, ҡануның буйынса йәшәп, Йә Раббы, Һиңә өмөт бағлайбыҙ. Һинең исемеңде иҫкә алыу – Беҙҙең йөрәгебеҙҙең теләге.

⁹ Төнөн йәнем Һиңә сарсай, Рухым бар булмышым менән Һине эҙләй. Сөнки ерҙә хөкөмөң бар саҡта Донъяла йәшәүселәр ғәҙеллекте белер.

¹⁰ Залимға мәрхәмәт күрһәтелһә лә, Ул ғәҙеллеккә өйрәнмәҫ. Дөрөҫлөк хөкөм һөргән ерҙә яуызлыҡ ҡылыр, Раббының бөйөклөгөн ул күрмәҫ.

¹¹ Йә Раббы! Яза өсөн ҡулың күтәрелгән, Әммә яуыздар быны күрмәй. Халҡың өсөн ашҡынып тороуыңды күрһәт, Әйҙә улар оятҡа ҡалһындар. Дошмандарыңа ҡаршы яҡҡан ут Уларҙы ялмап юҡ итһен.

¹² Йә Раббы! Һин беҙҙе имен ҡылаһың; Барлыҡ ҡаҙаныштарыбыҙ – Һинең эшең.

¹³ Эй Раббы Аллабыҙ, Һинән башҡа хужалар беҙгә хакимлыҡ итте, Әммә беҙ фәҡәт Һинең исемеңде таныйбыҙ.

¹⁴ Ул хакимдар үлде, инде терелмәҫтәр; Әруахтары ҡабат тороп сыҡмаҫ. Сөнки Һин уларҙы язалап юҡ иттең, Улар хаҡында хәтирәләрҙе юйҙың.

¹⁵ Һин халыҡты ишәйттең, йә Раббы, Халыҡты күбәйтеп, Үҙеңде данланың, Илдең барлыҡ сиктәрен киңәйттең.

¹⁶ Йә Раббы, бәләгә ҡалғас, Һине эҙләнеләр; Язаң өҫтәрендә булған саҡта Хәсрәтләнеп доғаларын бышылданылар.

¹⁷ Тулғаҡ тотҡан ҡатын нисек ғазаплана, һыҡтай, Беҙ ҙә хозурыңда шулай булдыҡ, Раббы!

¹⁸ Ауырға ҡалдыҡ, ғазап сиктек, Тыуҙырғаныбыҙ ел генә булып сыҡты. Ни донъяға еңеү килтерә алманыҡ, Ни донъяла йәшәргә һис кемде тыуҙырманыҡ.

¹⁹ Әммә Һинең үлгәндәрең тереләсәк, Минең мәрхүмдәрем тороп аяҡҡа баҫасаҡ. Эй һеҙ, тупраҡ аҫтында ятҡандар, уянығыҙ, Ҡыуанышып йырлағыҙ! Һинең ысығың – яҡтылыҡ биреүсе ысыҡ! Ер үлеләрҙе кире ҡайтарасаҡ.

²⁰ Эй халҡым, өйөңә ҡас, ишегеңде биклә. Раббының асыуы күпкә түгел, Ул үткәнсе генә йәшенеп тор.

²¹ Сөнки донъяла йәшәгәндәрҙе Енәйәттәренә күрә язаларға Бына, Раббы Үҙенең торлағынан сыға. Шул саҡ ер үҙенә түгелгән ҡандарҙы күрһәтәсәк, Үлтерелгәндәрҙе башҡаса йәшермәйәсәк.