Ишағыяһ 17 - Изге Яҙма

Арам менән Исраил тураһында пәйғәмбәрлек

¹ Дамаск хаҡында әүлиәлек. «Бына, Дамаск ҡалалар иҫәбенән юйыласаҡ, Харабалар өйөмөнә әйләнәсәк.

² Ғароғер ҡалалары ташландыҡ ҡалыр. Унда көтөү-көтөү малдар ятыр, Уларҙы өркөтөр кеше булмаҫ.

³ Әфраимда нығытмалы ҡала ҡалмаясаҡ. Дамасктың батшалығы юҡ буласаҡ. Арамдың иҫән ҡалған халҡы Исраилдарҙың даны һымаҡ бөтәсәк». Күк ғәскәрҙәре Раббыһы шулай ти.

⁴ «Ул көндө Яҡуп нәҫеленең даны һүрелер, Һимеҙ тәне тире лә һөйәккә тороп ҡалыр.

⁵ Игенсе баҫыуҙы нисек урһа, Башаҡтарын ҡулы менән нисек йыйһа, Шулай Рефалар үҙәнендәураҡтан һуң башаҡтарҙынисек сүпләһә,

⁶ Зәйтүн ағасын һелкеткәндән һуң Иң башында ике-өс бөртөк ҡалған һымаҡ, Суҡ ботаҡта дүрт-биш емеш ҡалған һымаҡ Бик аҙ кеше иҫән ҡалыр». Исраилдың Аллаһы Раббы шулай тип белдерә.

⁷ Кеше ул көндө ҡарашын үҙен Яратыусыға йүнәлтер, күҙҙәрен Исраилдың Изгеһенә төбәр.

⁸ Үҙ ҡулдары менән яһаған ҡорбан усаҡтарына, Ашераның ҡолғаларына, хуш еҫ төтәткән ҡорбан усаҡтарына әйләнеп тә ҡарамаясаҡ.

⁹ Ул көн Исраилдың нығытылған ҡалалары, урман һәм тау баштары кеүек, буп-буш ҡалыр.

¹⁰ Сөнки, эй Исраил, ҡотҡарыусы Аллаңды оноттоң. Һыйынысың булған Ҡаяңды иҫкә алманың. Шуға күрә күркәм үҫемлектәр ултыртһаң да, Ят үҫентеләр тамырландырһаң да,

¹¹ Улар ултыртҡан көндө үк үҫеп сыҡһа ла, Иртәгәһенә сәскә атһа ла, Уңалмаҫ йәрәхәттәр алған хәсрәт көнөңдә Уңышың юҡҡа сығасаҡ.

¹² Аһ, күмәк халыҡ шаулаша, Ҡоторған диңгеҙҙең олоуына оҡшаш! Ҡәүемдәр ташҡын һыу һымаҡ шаулай,

¹³ Ҡәүемдәр ташҡын һыу ише үкерә! Әммә Алла ажарланһа, улар әллә ҡайҙа ҡасып китер. Тауҙар буйлап ел ҡыуған ашлыҡ кәбәге, Ҡойон өйөрөлткән саң шикелле булырҙар.

¹⁴ Кистән был халыҡтар дәһшәт таратһа, Таң атыуға юҡ булырҙар. Беҙҙе талаусыларҙың яҙмышы, Беҙҙе иҙгәндәрҙең өлөшө шулай.