Ишағыяһ 15 - Изге Яҙма

Моав еренең һәләк булыуы

¹ Моав тураһында әүлиәлек. Моавтың Ғар ҡалаһы бер төндә тар-мар ителде, юҡ булды; Моавтың Ҡир ҡалаһы бер төндә тар-мар ителде, юҡ булды.

² Шуға күрә Дивон илар өсөн табыныу йортона, Табыныу ҡалҡыулыҡтарына сыҡты. Моав халҡы Нево һәм Медева өсөн үкһей. Һәр береһенең сәсе алынған, Һәммәһенең һаҡалы ҡырылған.

³ Ҡыл туҡымаға уранып урамдарҙа, Өй баштарында һәм майҙандарҙа һәр кем һыҡтай, Күҙ йәштәре йылға һымаҡ аға.

⁴ Иңрәй Хешбон һәм Әлғәле, Үкһеүҙәре Яһасҡаса ишетелә. Шуға ла Моав яугирҙәре илаша, Күңелдәрен ҡурҡыу солғап алған.

⁵ Йөрәгем һыҙлана Моав өсөн! Моав кешеләре Соғарға, Ғәғләҫ-Шелишияһҡа ҡастылар. Илай-илай Лухиҫҡа ҡалҡалар, Үҙҙәренә ябырылған һәләкәттән Хоронаим юлында сеңләйҙәр.

⁶ Сөнки Нимрим һыуҙары ҡороған, Кипкән болон, көйгән үлән, Һис бер йәшеллек ҡалмаған.

⁷ Шуға күрә халыҡ ҡалдыҡ-боҫтоҡ әйберҙәрен Талдар үҙәненең аръяғына ташый.

⁸ Һыҡтауҙары бөтә Моав илендә яңғырай; Илаған тауыштар Әглаимға, Беер-Әлимгә олғашты.

⁹ «Бына Димон һыуы ҡанға тулды, Әммә әле Мин Димонға яңы ҡаза әҙерләнем, – ти Раббы. – Моавтан ҡасып китеп ҡотолған, Илдә иҫән ҡалғандар өҫтөнә Арыҫлан һөстөрәсәкмен!»