Иҫәп алыу 4 - Изге Яҙма

Ҡыһаҫ улдарының вазифаһы

¹ Раббы Муса менән Һарунға былай тине:

² – Левиҙәр араһынан Ҡыһаҫ тоҡомоноң

³ утыҙ йәштән илле йәшкә тиклемге эшкә яраҡлыларын нәҫелдәре, ғаиләләре буйынса һанап сыҡ, улар Осрашыу сатырында хеҙмәт итер.

⁴ Ҡыһаҫ тоҡомоноң Осрашыу сатырындағы хеҙмәте иң изге әйберҙәрҙе хәстәрләүҙән ғибәрәт булыр.

⁵ Тупламдан юлға ҡуҙғалырға кәрәк булһа, Һарун менән уның улдары, сатырға инеп, Килешеү һандығы алдындағы пәрҙәне алыр ҙа һандыҡты ҡаплар.

⁶ Йәнә йоҡа итеп эшкәртелгән күн япма ябырҙар, өҫтөнә тағы ла зәңгәр йәймә ҡапларҙар һәм күтәреп йөрөтә торған ҡолғаларҙы дүңгәләктәргә кейҙереп ҡуйырҙар.

⁷ Изге икмәк өҫтәленә зәңгәр йәймә ябырҙар һәм уға тәрилкәләр, төтәҫләгес һауыттар, түкмә ҡорбандар өсөн ҡомғандар һәм кәсәләр ҡуйырҙар, унда даими килтерелә торған икмәк тә торорға тейеш.

⁸ Шунан уларға ҡып-ҡыҙыл йәймә ябырҙар, йоҡа итеп эшкәртелгән күн япма ҡапларҙар һәм ҡолғаларҙы урындарына ҡуйырҙар.

⁹ Зәңгәр йәймә менән шәмдәл һәм майшәмдәрҙе, ҡыҫҡыс һәм һоҫҡоларҙы, май һауыттарын ҡаплаһындар.

¹⁰ Шунан бының өҫтөнән йәнә йоҡа итеп эшкәртелгән күн япма ябып артмаҡҡа тейәрҙәр.

¹¹ Алтын ҡорбан усағына ла зәңгәр йәймә, өҫтөнән йоҡа итеп эшкәртелгән күн япма ябырҙар, ҡолғаларын урындарына ҡуйырҙар.

¹² Изге сатырҙа ғибәҙәт хеҙмәтендә ҡулланыла торған бөтә кәрәк-яраҡты зәңгәр йәймәгә төрөрҙәр, йоҡа итеп эшкәртелгән күн япма менән ябырҙар һәм быларҙы ла артмаҡҡа һалырҙар.

¹³ Ҡорбан усағын көл-ҡоромдан таҙартып, ҡарағусҡыл ҡыҙыл йәймә менән көпләрҙәр.

¹⁴ Өҫтөнә усаҡта ҡорбан килтергәндә ҡулланылған бөтә һауыт-һабаны – һоҫҡоларҙы, сәнскеләрҙе, көрәктәрҙе, ҡан һирпеү сеүәтәләрен һалып, йоҡа итеп эшкәртелгән күн япма менән ҡапларҙар һәм ҡолғаларын урынына ҡуйырҙар.

¹⁵ Тупламдан юлға ҡуҙғалырға кәрәк булғанда, Һарун менән уның улдары Изге сатырҙы һәм уның бөтә кәрәк-ярағын ҡаплап бөткәс, уны күтәреп алып китер өсөн Ҡыһаҫ улдары килер; тик улар мөҡәддәс әйберҙәргә ҡағылмаһын, юҡһа үлерҙәр. Осрашыу сатырының был әйберҙәрен Ҡыһаҫ нәҫеле йөрөтөргә тейеш.

¹⁶ Майшәмдәре өсөн зәйтүн майы менән хуш еҫле матдәләр, көндәлек икмәк саҙаҡаһы менән мәсех майы – бөтә Изге сатыр һәм дә унда булған бөтә нәмә – изге әйберҙәр һәм барлыҡ кәрәк-яраҡ өсөн Һарун улы Әлғазар ҡаһин яуаплы булыр.

¹⁷ Муса менән Һарунға Раббы былай тине:

¹⁸ – Леви ырыуына ҡараған Ҡыһаҫ нәҫеленең юҡҡа сығыуына юл ҡуя күрмәгеҙ,

¹⁹ иң изге әйберҙәргә яҡынлашҡанда һәләк булып ҡуймаһындар өсөн бына нимә эшләгеҙ: Һарун менән улдары үҙҙәре эскә инеп, уларҙың һәммәһенә башҡараһы хеҙмәтен һәм күтәрергә тейешле әйберҙәрҙе тәғәйенләһен.

²⁰ Әммә Ҡыһаҫ улдары үҙҙәре инеп изге нәмәләргә яҡын килмәһен, хатта күҙ һирпеп тә ҡарамаһын, юҡһа харап ителерҙәр.

Гершон улдарының вазифаһы

²¹ Артабан Раббы Мусаға былай тине:

^22-23 – Гершон нәҫеленән дә утыҙ йәштән иллегә тиклемге эшкә яраҡлыларҙы ғаиләләре, нәҫел-нәсәбе буйынса һанап сыҡ, Осрашыу сатырында хеҙмәт итерҙәр.

²⁴ Хеҙмәтте үтәгәндә һәм йөктәрҙе ташып йөрөткәндә Гершон нәҫеленең вазифалары түбәндәгеләр булыр:

²⁵ улар сатырҙың шаршауҙарын, Осрашыу сатырын, уның япмаһын, өҫкө йоҡа итеп эшкәртелгән күн япманы, сатырға инә торған урындағы ҡорманы,

²⁶ ихата шаршауҙарын, сатыр менән ҡорбан усағын уратып алған ихатаға инә торған урындағы ҡорманы, бауҙарҙы, хеҙмәт өсөн бөтә кәрәк-яраҡты йөрөтөргә; шуларға бәйле бөтә эштәрҙе башҡарырға тейеш.

²⁷ Гершон улдарының бөтә хеҙмәте – йөк ташыумы, башҡа эштәрме – Һарун менән уның улдары күрһәтмәһе буйынса башҡарылһын. Һеҙ уларға был йөктө тапшыраһығыҙ һәм улар уның өсөн яуап бирә.

²⁸ Гершон нәҫеленең Осрашыу сатырындағы хеҙмәте шуларҙан ғибәрәт булыр; улар вазифаларын Һарун улы Иҫамар ҡаһин күҙәтеүе аҫтында башҡарыр.

Мерари улдарының вазифаһы

^29-30 Мерари нәҫеленән дә утыҙ йәштән иллегә тиклемге эшкә яраҡлыларҙы ғаиләләре, нәҫел-нәсәбе буйынса һанап сыҡ, Осрашыу сатырында хеҙмәт итерҙәр.

³¹ Уларҙың Осрашыу сатырындағы хеҙмәте түбәндәгеләрҙән ғибәрәт булыр: сатырҙың рамдарын, һайғауҙарын, бағаналарын, төптәрен,

³² ихатаның бөтә яғындағы бағаналары менән төптәрен, ҡаҙыҡтарын, бауҙарын, хеҙмәт өсөн башҡа бөтә кәрәк-ярағын улар күтәреп йөрөтөр. Һәр ҡайһыһы нимә күтәрергә тейешлеген исемләп белһен.

³³ Мерари нәҫеленең Осрашыу сатырындағы вазифалары ошолар булып, уларҙы Һарун улы Иҫамар ҡаһин күҙәтеүе аҫтында башҡарырҙар.

Левиҙәрҙе иҫәпкә алыу

^34-35 Муса менән Һарун йәмғиәт башлыҡтары менән бергә Ҡыһаҫ нәҫеленең утыҙҙан илле йәшкә тиклем булған һәм Осрашыу сатыры хеҙмәтенә яраҡлыларын нәҫелдәре, ғаиләләре буйынса һанап сыҡты.

³⁶ Ҡыһаҫ нәҫеленән бөтәһе ике мең ете йөҙ илле кеше ошо иҫәпкә инде.

³⁷ Раббы Муса аша биргән күрһәтмә буйынса Муса менән Һарун һанаған һәм Осрашыу сатырындағы хеҙмәткә тәғәйенләнгәндәрҙең һаны шулай булды.

^38-39 Гершон тоҡомонан да утыҙҙан илле йәшкә тиклемгеләрҙең Осрашыу сатыры хеҙмәтенә яраҡлылары нәҫелдәре һәм ғаиләләре буйынса иҫәпләнде.

⁴⁰ Нәҫелдәре һәм ғаиләләре буйынса уларҙың һаны ике мең алты йөҙ утыҙ булды:

⁴¹ Гершон нәҫеленән Раббы ҡушыуы буйынса Муса менән Һарун Осрашыу сатыры хеҙмәтенә индергәндәрҙең һаны был.

^42-43 Мерари тоҡомонда ла утыҙҙан алып илле йәшкә тиклемгеләрҙән Осрашыу сатырындағы хеҙмәткә яраҡлылар нәҫелдәре һәм ғаиләләре буйынса һаналды.

⁴⁴ Нәҫелдәре буйынса улар бөтәһе өс мең ике йөҙ булды.

⁴⁵ Мерари нәҫеленән иҫәпкә алынған кешеләрҙең дөйөм һаны шулай ине. Уларҙы Раббы ҡушыуы буйынса Муса менән Һарун һананы.

⁴⁶ Шулай итеп, Муса, Һарун һәм дә Исраил башлыҡтары левиҙәрҙе нәҫелдәре һәм ғаиләләре буйынса

⁴⁷ утыҙҙан алып илле йәшкә тиклемгеләре араһынан Осрашыу сатырында хеҙмәт итергә, уны күтәреп йөрөтөргә яраҡлыларын һанап сыҡты;

⁴⁸ ундайҙар бөтәһе һигеҙ мең биш йөҙ һикһән булды.

⁴⁹ Муса уларҙы Раббы бойороғо буйынса иҫәпләне; һәр ҡайһыһына эш һәм күтәрергә йөк билдәләнде. Раббы Мусаға нисек ҡушһа, бөтәһе лә шулай эшләнде.