Иҫәп алыу 3 - Изге Яҙма

Ҡаһиндар һәм Леви ырыуы тураһында

¹ Раббы Синай тауында Муса менән һөйләшкән дәүерҙәрҙә, Һарун менән Мусаның нәҫелендә түбәндәгеләр ине.

² Һарундың улдары: Надав – баш бала, Авиһу, Әлғазар, Иҫамар.

³ Былар – Һарундың ҡаһинлыҡҡа бағышлап мәсехләнгән, йәғни май һөртөлгән улдары.

⁴ Әммә Надав менән Авиһу Синай сүлендә Раббы ҡаршыһына Ул рөхсәт итмәгән утты килтергән өсөн үлгәйне. Уларҙың балалары юҡ ине. Әлғазар менән Иҫамар аталары Һарун эргәһендә ҡаһин булып ҡалды.

⁵ Раббы Мусаға былай тине:

⁶ – Леви ырыуын килтер ҙә Һарун ҡаһин алдына баҫтыр – уға ярҙам итһендәр.

⁷ Һарун һәм бөтә йәмғиәт өсөн хеҙмәт итеп, левиҙәр Осрашыу сатырында бөтә эштәрҙе башҡарһын.

⁸ Улар бөтә Исраил халҡы өсөн Осрашыу сатырында хеҙмәт итеп, ундағы бар әйберҙәргә яуаплы булһындар һәм барлыҡ эштәрҙе башҡарһындар.

⁹ Левиҙәрҙе Һарун менән уның улдары ҡарамағына бир – улар бөтә исраилдар араһынан тулыһынса Һарундың ҡул аҫтында булһын.

¹⁰ Һарун менән улдарын ҡаһин итеп тәғәйенлә, улар ҡаһинлыҡ вазифаһын еренә еткереп үтәһен. Әгәр ҙә Изге сатырға левиҙәрҙән башҡа берәйһе яҡынлашһа, үлемгә дусар ителер.

¹¹ Раббы Мусаға тағы былай тине:

¹² – Мин һәр Исраил ҡатынынан донъяға килгән тәүге ир бала урынына исраилдар араһынан левиҙәрҙе Үҙемә алдым. Улар – Минеке,

¹³ сөнки бөтә беренсе булып тыуғандар – Минеке. Мысыр ерендәге баш балаларҙы юҡ иткән сағымда, Исраилда кешенән алып мал-тыуарғаса барлыҡ беренсе булып тыуғандарҙы Үҙемә айырып алдым. Улар Минеке буласаҡ. Мин – Раббы.

¹⁴ Раббы Синай сүлендә Мусаға былай тине:

¹⁵ – Левиҙәрҙе ғаиләләре, нәҫелдәре буйынса һанап сыҡ. Бер айлыҡтан алып бөтә ир затын иҫәпкә ал.

¹⁶ Муса Раббы бойороғон үтәне, нисек ҡушылһа, шулай һананы.

¹⁷ Леви улдарының исемдәре – Гершон, Ҡыһаҫ, Мерари.

¹⁸ Гершон улдары: Ливни, Шимғи һәм уларҙың нәҫелдәре.

¹⁹ Ҡыһаҫ улдары: Ғамрам, Исһар, Хеврон, Ғуззиил һәм уларҙың нәҫелдәре.

²⁰ Мерари улдары: Махли, Муши һәм уларҙың нәҫелдәре. Ғаиләләре буйынса Леви нәҫелдәре бына шулар.

²¹ Гершондан Ливни менән Шимғи нәҫелдәре таралды. Был – Гершон нәҫеле.

²² Гершон нәҫелендә бер айлыҡтан алып һаналған бөтә ир заттарының һаны ете мең биш йөҙ булды.

²³ Гершон нәҫеле сатырҙарын Изге сатыр артында көнбайышҡа табан ҡорорға тейеш.

²⁴ Гершон нәҫеленең башлығы Лаил улы Әлъясаф булды.

^25-26 Осрашыу сатыры, уның өҫкө япмалары, инә торған урындағы ҡорма һәм сатыр менән ҡорбан усағын уратҡан ихатаның шаршауҙары, ихатаға инә торған урындағы ҡорма, бауҙар, шулай уҡ барлыҡ кәрәк-яраҡ һәм уларға ҡағылышлы барлыҡ хеҙмәт Гершон улдары яуаплылығына тапшырылды.

²⁷ Ҡыһаҫтан Ғамрам, Исһар, Хеврон һәм Ғуззиил нәҫелдәре таралды. Былар – Ҡыһаҫ нәҫеле.

²⁸ Ҡыһаҫ нәҫелендә бер айлыҡтан алып һаналған ир заттарының һаны һигеҙ мең алты йөҙ булды. Улар Изге урын өсөн яуаплы ине.

²⁹ Ҡыһаҫ нәҫеле Изге сатырҙан көньяҡта урынлашырға тейеш ине.

³⁰ Ҡыһаҫ нәҫелдәренең башлығы – Ғуззиил улы Әлисафан.

³¹ Килешеү һандығы, өҫтәл, шәмдәл, ҡорбан усаҡтары, ғибәҙәт хеҙмәтендә тотонола торған изге һауыт-һаба, пәрҙә, барлыҡ кәрәк-яраҡ һәм уларға ҡағылышлы барлыҡ хеҙмәт улар яуаплылығына тапшырыла.

³² Һарун ҡаһиндың улы Әлғазар левиҙәрҙең башлыҡтары өҫтөнән етәксе булыр. Изге урын өсөн яуаплы кешеләр уның күҙәтеүе аҫтында торор.

³³ Мерариҙан Махли менән Муши нәҫелдәре таралды, улар – Мерари нәҫеле.

³⁴ Мерари нәҫелендә бер айлыҡтан алып һаналған бөтә ир заттарының һаны алты мең ике йөҙ сыҡты.

³⁵ Мерари нәҫелдәренең башлығы Авихаил улы Суриил булды. Улар Изге сатырҙан төньяҡта урынлашырға тейеш ине.

^36-37 Изге сатырҙың рамдары менән һайғауҙары, бағаналары, төптәре, бөтә кәрәк-ярағы һәм уларға ҡағылышлы барлыҡ хеҙмәт, шулай уҡ ихатаның бөтә яғындағы бағаналары, төптәре, ҡаҙыҡтары, бауҙары Мерари улдары яуаплылығына тапшырыла.

³⁸ Муса, Һарун һәм уның улдары Осрашыу сатыры алдына, унан көнсығышҡа ҡарай, урынлашһын. Уларға исраилдар исеменән Изге урындағы хеҙмәт өсөн яуаплылыҡ йөкмәтелә. Изге урынға ситтәрҙән берәйһе яҡынлашһа, ул үлемгә дусар ителергә тейеш.

³⁹ Муса менән Һарун, Раббы бойорғанса, нәҫелдәре буйынса левиҙәрҙе һанап сыҡты, улар араһында бер айлыҡтан алып бөтә ир заттарының һаны егерме ике мең булды.

⁴⁰ Раббы Мусаға былай тине: – Исраилдарҙың бер айлыҡтан алып ир затынан булған бөтә баш балаларын һана ла исемлек төҙө.

⁴¹ Исраилдарҙың бөтә беренсе булып тыуған улдары урынына – левиҙәрҙе, ә исраилдарҙың беренсе булып тыуған мал-тыуары урынына левиҙәрҙең мал-тыуарын Миңә айырып ал. Мин – Раббы.

⁴² Раббы нисек бойорған булһа, Муса шулай эшләне: исраилдарҙың бөтә беренсе булып тыуған улдарын һанап сыҡты,

⁴³ бер айлыҡтан алып ир затынан булған бөтә баш балалар һаны егерме ике мең ике йөҙ етмеш өс булды.

⁴⁴ Раббы Мусаға былай тине:

⁴⁵ – Исраил улдарының бөтә баш балалары урынына – левиҙәрҙе, уларҙың малы урынына левиҙәрҙең малын ал. Левиҙәр Минеке буласаҡ. Мин – Раббы.

⁴⁶ Исраилдарҙың беренсе булып тыуған ир балаларының һаны левиҙәр һанынан ике йөҙ етмеш өскә артыҡ. Ошо балалар урынына

⁴⁷ һәр йән башына изге шекелгә күрә бишәр шекел көмөш ал. Бер шекелдә егерме гера иҫәпләнә.

⁴⁸ Был көмөштө левиҙәрҙең һанынан артҡандар өсөн йолом итеп Һарун менән уның улдарына бир.

⁴⁹ Муса левиҙәр менән алмаштырылғандар һанынан артҡан кешеләр өсөн йолом көмөшө алды.

⁵⁰ Исраилдарҙың беренсе булып тыуған ир балаларынан изге шекелгә күрә бөтәһе бер мең өс йөҙ алтмыш биш шекел йыйылды.

⁵¹ Раббы бойороғо буйынса Муса йолом көмөшөн Һарун менән уның улдарына бирҙе.