Иҫәп алыу 13 - Изге Яҙма

Ҡәнғәнгә күҙәтселәр ебәреү

¹ Ошонан һуң халыҡ, Хасироҫтан китеп, Паран сүлендә туҡтаны.

² Раббы Мусаға былай тине:

³ – Исраилдарға Мин бирәһе Ҡәнғән ерен ҡарап ҡайтырға кешеләреңде ебәр: һәр ырыуҙан берәр кешене, башлыҡтарҙы, ебәр.

⁴ Раббы бойороғо буйынса Муса уларҙы Паран сүленән юлға оҙатты. Улар барыһы ла исраилдарҙың етәкселәре ине.

⁵ Бына уларҙың исемдәре: Рәүвән ырыуынан Заккур улы Шаммуағ,

⁶ Шимғон ырыуынан Хори улы Шафат,

⁷ Йәһүҙә ырыуынан Йефунне улы Калев,

⁸ Исасхар ырыуынан Йософ улы Йигал,

⁹ Әфраим ырыуынан Нун улы Һошеяғ,

¹⁰ Бинйәмин ырыуынан Рафу улы Палти,

¹¹ Зевулун ырыуынан Соди улы Гаддиил,

¹² Йософ улы Менашше ырыуынан Суси улы Гадди,

¹³ Дан ырыуынан Гемалли улы Ғаммиил,

¹⁴ Ашер ырыуынан Михаил улы Сеҫур,

¹⁵ Нафтали ырыуынан Уофси улы Нахби,

¹⁶ Ғад ырыуынан Махи улы Геуил.

¹⁷ Муса ер ҡарарға ебәргән ирҙәрҙең исемдәре бына шулар ине. Нун улы Һошеяғҡа Муса Йушағ тигән исем ҡушты.

¹⁸ Ҡәнғән ерен ҡарарға ебәргәндә Муса уларға былай тине: – Негев аша ул таулы илгә барығыҙ.

¹⁹ Ниндәй ер икәнен, ниндәй халыҡ йәшәгәнен, көслөмө ул халыҡ, көсһөҙмө, күпме, әҙме – һәммәһен ҡарағыҙ.

²⁰ Йәшәгән ерҙәре уңайлымы, түгелме? Ҡалалары ниндәй? Халҡы ауылдарҙа йәшәйме, нығытмалы ҡалаларҙамы?

²¹ Ерҙәре ниндәй – уңдырышлымы, түгелме? Урманы бармы, юҡмы? Ҡыйыу булығыҙ, ундағы емештәрҙе алып ҡайтығыҙ. Йөҙөм бешә башлаған мәл ине.

²² Тәүҙә улар Цин сүленән алып Лево-Хамаҫ янындағы Реховҡа тиклемге ерҙәрҙе ҡарап сыҡты,

²³ унан Негевты үтеп Ғанаҡ тоҡомдары Ахиман, Шешай һәм Талмай йәшәгән Хевронға барып еттеләр. (Хеврон Мысыр ҡалаһы Соғандан ете йыл алда төҙөлгәйне.)

²⁴ Шунан Әшкол үҙәненә сыҡтылар, унда бер тәлгәшле йөҙөм ботағы ҡырҡып алдылар, уны ике кеше таяҡҡа аҫып йөрөттө. Анар емештәре һәм инжир ҙә алдылар.

²⁵ Был ерҙе Әшкол үҙәне тип атанылар, сөнки бында исраилдар йөҙөм тәлгәше ҡырҡып алды.

²⁶ Ерҙәрҙе ҡарап сыҡҡас, ҡырҡ көндән ҡайтып килделәр.

²⁷ Паран сүлендәге Ҡадешҡа, Муса, Һарун һәм бөтә Исраил йәмғиәте янына, әйләнеп ҡайтҡас, күргәндәрен һөйләп бирҙеләр, емештәрен күрһәттеләр.

²⁸ – Беҙ һин ебәргән ерҙәрҙә йөрөнөк, – тине улар Мусаға, – унда ысынлап та һөт менән бал ағып ята, бына уның емештәре.

²⁹ Әммә унда йәшәгән халыҡ көслө, ҡалалары ла ҙур, бик нығытылған. Ғанаҡ тоҡомдарын да күрҙек.

³⁰ Негевтың көньяғында ғәмәлектәр, таулыҡта хиттиҙәр, хиууиҙәр, йевусиҙәр, әмөриҙәр, диңгеҙ эргәһендә һәм Иордан буйында ҡәнғәниҙәр йәшәй.

³¹ Калев Мусаны уратып алған халыҡты тынысландырырға теләп: – Әйҙәгеҙ, барып һөжүм итәйек тә ул ерҙе яулап алайыҡ, көсөбөҙ етерлек, – тине.

³² Тик уның менән бергә барғандар: – Беҙ ул халыҡҡа ҡаршы бара алмайбыҙ, сөнки ул беҙҙән көслөрәк, – тип ҡаршы төштө.

³³ Улар үҙҙәре ҡарап ҡайтҡан ер тураһында Исраил халҡы араһында насар хәбәр тарата башланы: – Беҙ ҡарап үткән ерҙәр үҙендә йәшәүселәрҙе йота икән. Унда беҙ осратҡан кешеләр әзмәүер кеүек.

³⁴ Бәһлеүәндәр затынан булған Ғанаҡ тоҡомдарын да күрҙек, улар эргәһендә беҙ сиңерткәләй генә инек. Уларға ла беҙ шулай булып күрендек.