Йоил 1 - Изге Яҙма

¹ Йоил Пеҫуил улына Раббы һүҙе булды.

Саранчалар һөжүме һәм ҡоролоҡ

² Эй аҡһаҡалдар, тыңлағыҙ, Ошо ерҙә ғүмер итеүселәр һәр берегеҙ Әйткәндәремә ҡолаҡ һалығыҙ! Һеҙҙең йәки аталарығыҙҙың заманында Ошондай хәлдең булғаны бармы?

³ Был турала балаларығыҙға һөйләгеҙ; Балаларығыҙ – үҙ балаларына, Ул балалар килер быуындарға еткерһен.

⁴ Күс-күс булып оса саранча! Беренсе күс ашап бөтмәгәнде, Икенсеһе, өсөнсөһө йыпыра; Ә уларҙан нимә тороп ҡала, Шуны дүртенсе күс ҡырып һала.

⁵ Эй һеҙ, эскеселәр, уянығыҙ ҙа илағыҙ; Эй шарап яратыусылар, зар илағыҙ: Шарап ауыҙығыҙҙан тартып алынды.

⁶ Сөнки еремә иҫәпһеҙ-һанһыҙ Ҡеүәтле бер ҡәүем ябырылды. Тештәре арыҫландыҡы кеүек үткер, Инә арыҫландыҡы һымаҡ аяуһыҙ.

⁷ Йөҙөмдәремде харап иттеләр, Инжир ағасымды кимерҙеләр, Ҡайырыһына тиклем мөнйөп бөттөләр, Бары ҡыу ботаҡтары ағарып ҡалды.

⁸ Йәрәшелгән йәрен юғалтып, Хәсрәт кейеме кейгән йәш ҡыҙ һымаҡ илағыҙ.

⁹ Раббы ҡорамына икмәк саҙаҡаһы ла, Түкмә ҡорбан да килеүҙән туҡтаны. Ҡаһиндар – Раббы хеҙмәтселәре – ҡайғыра.

¹⁰ Баҫыуҙар харап булды, иңрәй тупраҡ, Сөнки иген юҡ ителде, йөҙөм һуты кипте, Зәйтүн майы ҡороно.

¹¹ Бойҙай менән арпа өсөн, Эй игенселәр, көйәләнегеҙ! Илағыҙ, баҡсасылар, йәш түгегеҙ, Сөнки бөтә уңыш юҡҡа сыҡты.

¹² Йөҙөм һәм инжир ағастары ҡороно, Анар, хөрмә, алма – барыһы ла кипте! Кешеләр араһынан һөйөнөс юҡҡа сыҡты.

Тәүбәгә саҡырыу

¹³ Эй ҡаһиндар, хәсрәт кейеме кейеп илағыҙ. Һыҡтағыҙ, ҡорбан усағында хеҙмәт иткәндәр! Алламдың хеҙмәтселәре, Алла йортона килегеҙ, Хәсрәт кейеменә уранып, унда ҡунығыҙ! Сөнки Аллағыҙҙың ҡорамынан Икмәк саҙаҡаһы менән түкмә ҡорбан юҡ булды.

¹⁴ Изге ураҙа иғлан итегеҙ, йыйын саҡырығыҙ! Аҡһаҡалдарҙы һәм илдә йәшәүселәрҙең барыһын Аллағыҙ Раббының йортона йыйығыҙ, Раббыға ялбарығыҙ.

¹⁵ О, ул көн! Раббы көнө яҡын! Сикһеҙ ҡөҙрәт Эйәһе күндергән Һәләкәт булып килә ул!

¹⁶ Күҙ алдында ризығыбыҙ юҡ ителде, Аллабыҙ йортонан һөйөнөс һәм шатлыҡ китте.

¹⁷ Ҡоро тупраҡ аҫтында орлоҡтар кибеп ҡалды. Келәттәр буш, ырҙын емерелде, Сөнки һаҡларға ашлыҡ юҡ.

¹⁸ Ҡайһылай баҡырыша мал-тыуар! Ҡабыр үлән, утлар көтөүлекһеҙ Темеҫкенеп йөрөй башмаҡтар, Кәзә-һарыҡ көтөүҙәре ыҙалана.

¹⁹ Йә Раббы, Һиңә ялбарам! Далалағы көтөүлектәр көйөп бөттө, Ҡырҙағы барлыҡ ағастарҙы ялҡын ялманы.

²⁰ Ҡырағай хайуандар ҙа Һине саҡыра, Сөнки ағын һыуҙар ҡороно; Далалағы көтөүлектәр утҡа көйҙө.