ІІ Батшалар 1 - Изге Яҙма

Дауыттың Шаулдың үлеме хаҡында хәбәр алыуы

¹ Шаул һәләк булғандан һуң, ғәмәлектәрҙе еңеп ҡайтҡан Дауыт ике көнгә Сиҡлағта туҡтаны.

² Өсөнсө көнөнә Шаул ғәскәре тупламынан бер кеше килде: кейеме йыртҡыланып бөткән, башына тупраҡ һибелгән.

³ Ул, Дауыт янына килеп, ергә ҡапланды. Дауыт унан: – Ҡайҙан киләһең? – тип һораны. – Мин Исраил ғәскәре тупламынан ҡасып киләм, – тине теге.

⁴ – Ни булды? Һөйлә әле миңә, – тип һораны Дауыт. Теге кеше былай тине: – Яугирҙәр алыш яланын ташлап ҡасты, бик күп кеше ҡырылды, Шаул менән улы Йонаҫан да һәләк булды.

⁵ – Шаул менән уның улы Йонаҫандың үлгәнен ҡайҙан беләһең? – тип һораны Дауыт хәбәр алып килгән егеттән.

⁶ – Мин осраҡлы ғына Гилбоағ тауына барып сыҡҡайным, ҡараһам, Шаул һөңгөһөнә таянып тора. Дошмандың яу арбалары менән һыбайлылары уға яҡынлашып килә ине.

⁷ Шунда ул артына әйләнеп ҡараны ла, мине күреп, янына саҡырҙы. «Бойор, тыңлайым», – тинем мин.

⁸ «Кем һин?» – тип һораны ул минән. «Мин – ғәмәлек кешеһемен», – тинем.

⁹ «Кил яныма, үлтер мине, – тине ул. – Үлем ғазабына тарыным, ә йәнем һаман сыҡмай».

¹⁰ Мин уның янына килдем дә, бындай ауыр яраларҙан һуң йәшәй алмаясағын күреп, үлтерҙем. Мин уның башындағы тажы менән беләҙеген алдым һәм бына һин хакимыма килтерҙем.

¹¹ Быны ишеткәс, Дауыт ҡайғынан өҫтөндәге кейемен йыртып ташланы, уның эргәһендәге кешеләр ҙә шулай эшләне.

¹² Ҡылыстан һәләк булған Шаул менән уның улы Йонаҫан, Раббы халҡы, Исраил йорто өсөн ҡайғырып йәш түктеләр, кискә тиклем ураҙа тоттолар.

¹³ Дауыт хәбәр алып килгән егеттән: – Һин ҡайҙанһың? – тип һораны. – Мин бер килмешәк ғәмәлек кешеһенең улы булам, – тип яуап бирҙе егет.

¹⁴ – Нисек итеп һин Раббы мәсехләгән кешегә ҡул күтәреп, уны үлтереүҙән ҡурҡманың? – тине уға Дауыт.

¹⁵ Ул бер кешеһен саҡырып алды ла: – Кил, үлтер уны! – тип бойорҙо. Дауыттың хеҙмәтсеһе ғәмәлекте ҡылыс менән үлтерҙе.

¹⁶ Дауыт иһә ғәмәлеккә: – Үлемеңә үҙең ғәйеплеһең, – тине. – «Мин Раббы мәсехләгән кешене үлтерҙем», – тигән ауыҙың шаһитлыҡ ҡылды быға.

Дауыттың ҡайғы йыры

¹⁷ Дауыт Шаул менән уның улы Йонаҫан хаҡында ҡайғы йыры башҡарҙы.

¹⁸ Һуңынан ул «Йәйә» тип аталған был йырҙы Йәһүҙә халҡына өйрәтергә бойорҙо. Был ҡайғы йыры «Яшар» китабында яҙылған.

¹⁹ «Эй Исраил, һинең күркең тауҙарыңда башын һалды! Ҡайһылай ҡоланы бәһлеүәндәр!

²⁰ Был хаҡта Ғаҫ ҡалаһында һөйләмәгеҙ; Белдермәгеҙ Ашҡылон урамдарында; Пелешти ҡыҙҙары ҡыуанмаһын; Сөннәтһеҙҙәрҙең ҡыҙҙары шатланмаһын.

²¹ Эй Гилбоағ тауҙары! Өҫтөгөҙгә ысыҡ төшмәһен, ямғыр яумаһын, Уңыш бирер баҫыуҙарың булмаһын! Шунда шөһрәтен юғалтты баһадирҙар ҡалҡаны, Шаулдың ҡалҡанына май һөртөлмәҫ инде.

²² Дошман яраһынан ҡан ағыҙмайынса, Хас дошмандың эсен ярмайынса, Әйләнеп тә ҡайтмай ине Йонаҫан уғы, Ҡынына ҡайтмай ине Шаул ҡылысы.

²³ Шаул менән Йонаҫан ниндәй һөйкөмлө, ғәзиз, Йәшәүҙә лә, үлемдә лә айырылмаҫ булды улар. Бөркөттән дә етеҙ булдылар, Арыҫландан көслө булдылар.

²⁴ Эй Исраил ҡыҙҙары! Һеҙгә ал ҡыҙыл затлы кейем кейҙергән, Алтын биҙәүестәр алып биргән Шаул өсөн йәш түгегеҙ!

²⁵ Яу ҡырында баһадирҙар ҡоланы! Һинең ҡалҡыулыҡтарыңда Йонаҫан һәләк булды.

²⁶ Ҡайғырамын һинең өсөн, туғаным Йонаҫан, Һин миңә бик ғәзиз инең; Һинең яратыуың минең өсөн Ҡатын-ҡыҙҙың һөйөүенән артыҡ ине.

²⁷ Ҡайһылай ҡоланы баһадирҙар! Һуғыш ҡоралдары ҡырылды!»