Йермеяһ 48 - Изге Яҙма

Моав тураһында

¹ Моав тураһында. Исраил Аллаһы, Күк ғәскәрҙәре Раббыһы былай ти: «Невоға ҡайғы! Уларҙың ҡалаһы харап булды. Ҡиръяҫаим мәсхәрәләнде, Дошман ҡулына ҡалды. Нығытмаһы хур булды – емерелде.

² Моавтың даны һүнде. Хешбонда уға ҡаршы яуызлыҡ ҡылырға ниәт ҡоралар: „Әйҙәгеҙ, уны ҡәүемдәр араһынан юҡ итәйек“, – тиҙәр. Эй Мадмен, һин дә тын ҡалырһың, Артыңдан ҡылыс эҙәрләп килә.

³ Хоронаимдан иңрәү яңғырар: „Тар-мар булды ҡала, емерелде!“

⁴ Моав ҡыйратылды, Балалары ҡысҡырып илай.

⁵ Илай-илай Лухиҫҡа күтәреләләр. Хоронаимдан төшкән юлда Һәләкәт арҡаһында аһ-зар яңғырай.

⁶ Ҡасығыҙ! Йәнегеҙҙе ҡотҡарығыҙ! Сүлдәге ҡыуаҡ һымаҡ булығыҙ!

⁷ Эштәреңә, байлығыңа ышанғанға күрә Һин дә ҡулға төшөрһөң, эй Моав. Илаһың Кемош үҙенең ҡаһиндары, Түрәләр менән бергә һөргөнгә китер.

⁸ Раббы әйтмешләй, Емереүселәр һәр ҡалаға килер, Бер ҡала ла ҡотолоп ҡала алмаҫ. Үҙәнлек һәләк булыр, Тигеҙлек бушап ҡалыр.

⁹ Моавҡа тоҙ һибегеҙ, Ул юҡҡа сығарыласаҡ! Уның ҡалалары емереләсәк, Уларҙа йәшәүсе ҡалмаясаҡ».

¹⁰ Раббы эшен әпен-төпөн башҡарғанға ләғнәт төшһөн! Ҡылысын ҡан ҡойоуҙан тотҡарлағанға ләғнәт төшһөн!

¹¹ «Моав йәш сағынан һил йәшәне, Шарап төпрәһеләй тондо, Бер һауыттан икенсеһенә ҡойолманы – Һөргөнгә оҙатылманы; Шуға тәме боҙолманы, хуш еҫе үҙгәрмәне.

¹² Әммә уны һауыттан һауытҡа түгер кешеләрҙе ебәрер көндәрем килә, – тип белдерә Раббы. – Уны түгеп, һауыттарын бушатырҙар, көршәктәрен ватырҙар.

¹³ Исраил халҡы үҙе ышанған Бейт-Ил арҡаһында оятҡа ҡалған кеүек, Моав та илаһы Кемош арҡаһында хур булыр.

¹⁴ Нисек: „Беҙ батырбыҙ, Һуғышҡа әҙер көслө яугирбеҙ“, – тип әйтә алаһығыҙ?

¹⁵ Моав иле емереләсәк, Ҡалаларына һөжүм итәсәктәр. Аҫыл егеттәре салынасаҡ, – тип белдерә исеме Күк ғәскәрҙәре Раббыһы булған Батша. –

¹⁶ Моавтың һәләкәте яҡын, Уның ҡазаһы ашығып килә.

¹⁷ Эргә-тирәһендә йәшәгәндәр, Уның исемен белгәндәр, бөтәгеҙ ҙә ҡайғырығыҙ. Әйтегеҙ: „Аһ! Ҡөҙрәт таяғы, шөһрәт билдәһе һынды!“»

¹⁸ Эй Дивон ҡалаһында йәшәгән халыҡ! Шөһрәтле урыныңдан төш, Саң-туҙан өҫтөнә ултыр. Сөнки Моавты һәләк итеүсе Һинең дә өҫтөңә килер, Ҡәлғәләреңде емерер.

¹⁹ Эй Ғароғерҙа йәшәгән халыҡ, Юл ситенә баҫ та ҡара! Ҡасып барған ирҙән, йүгергән ҡатындан: «Ни булды?» – тип һора.

²⁰ Оятҡа ҡалды Моав, тар-мар ителде! Үкереп-үкереп илағыҙ! Моавтың бушлыҡҡа әйләнгәнен Арнон буйында иғлан итегеҙ!

²¹ – Яҫы таулыҡтағы ҡалалар – Холон, Яһас, Мефағаҫ,

²² Дивон, Нево, Бейт-Дивлаҫаим,

²³ Ҡиръяҫаим, Бейт-Гамул, Бейт-Меғон,

²⁴ Ҡирйоҫ, Босра – Моав ерендәге алыҫ һәм яҡын бөтә ҡалаларға хөкөм килә.

²⁵ Моавтың мөгөҙө ҡырҡылды, беләге һындырылды, – тип белдерә Раббы. –

²⁶ Иҫерткәнсе эсер Моавты, сөнки Раббы ҡаршыһында эреләнде. Әйҙә, Моав үҙ ҡоҫҡолоғонда аунаһын, әҙәм көлкөһөнә ҡалһын!

²⁷ Һин Исраилдан көлә инең түгелме? Бурҙар араһында тотолдомо ни ул, уның хаҡта һүҙ сыҡһа, һин баш сайҡайһың?

²⁸ Эй Моавта йәшәгәндәр, Ҡалаларығыҙҙы ташлап, ҡаяларға һыйынығыҙ. Мәмерйә ауыҙында оя ҡорған күгәрсендәр кеүек булығыҙ.

²⁹ Моавтың ғорурлығы, Самаһыҙ мәғрурлығы хаҡында ишеттек; Текә, тәкәббер, маҡтансыҡлығын, Үҙен артыҡ юғары ҡуйыуын ишеттек беҙ.

³⁰ «Уның һауалылығын белә йөрөйөм, – тип белдерә Раббы. – Маҡтанып һөйләнеүе лә, Эшләгәндәре лә ялған».

³¹ Шуға күрә Моав өсөн һыҡрармын, Бөтөн Моав өсөн иңрәрмен; Ҡир-Харәсәҫ халҡы өсөн илармын.

³² Эй Сивманың йөҙөм ағасы, һинең өсөн Яғзер өсөн йәш түккәндән дә нығыраҡ илармын! Тәлгәштәрең диңгеҙ ашып, Диңгеҙгә, Яғзергә етә ине. Емереүсе һинең йәйге емешеңә, Бешкән йөҙөмөңә ташланды.

³³ «Моавтың уңдырышлы еренән Шатлыҡ-ҡыуаныс тартып алынды; Йөҙөм һыҡҡыстарҙан аҡҡан һутты туҡтаттым; Инде геүләшеп уны иҙмәҫтәр. Бында – тауыш, тик шатлыҡ ауазы түгел.

³⁴ Хешбон менән Әлғәленең иңрәүҙәре Яһасҡа олғашыр, Соғарҙан Хоронаимға, Ғәғләҫ-Шелишияһҡа саҡлы барып етер. Хатта Нимрим һыуҙары ҡорор.

³⁵ Моавта ботҡа табыныу ҡалҡыулыҡтарында ҡорбан килтереүселәрҙе, илаһтарына хуш еҫле матдәләр төтәтеүселәрҙе юҡ итермен, – тип белдерә Раббы».

³⁶ Шуға күрә Моав өсөн йөрәгем һыбыҙғы кеүек һыҡрай, Һыбыҙғылай иңрәй күңелем Ҡир-Харәсәҫ халҡы өсөн, Сөнки эшләп тапҡан байлыҡтары һәләк булды.

³⁷ Һәр кем сәсен, һаҡалын ҡырыр, Ҡулдарын йәрәхәтләр, биленә ҡыл туҡыма урар.

³⁸ Моавтың өй баштарында, Майҙандарында күмәкләп илашалар. «Моавты кәрәкһеҙ бер һауыт кеүек ваттым», – тип белдерә Раббы.

³⁹ «Селпәрәмә килде! Ҡайһылай илашалар. Оятҡа ҡалып артына боролдо!» Тирә-яғындағылар өсөн Мәсхәрә һәм дәһшәт өлгөһө булды Моав!

⁴⁰ Раббы былай ти: «Ҡара, дошман, бөркөт кеүек осоп, Моав өҫтөндә ҡанатын кирер.

⁴¹ Ҡалалары баҫып алыныр, Ҡәлғәләре ҡулға төшөр. Ул көн Моав яугирҙәренең йөрәге Тулғаҡтан ғазапланған ҡатын йөрәге һымаҡ тулар.

⁴² Моав халыҡтар араһынан юҡ ителер, Сөнки ул Раббы алдында эреләнде.

⁴³ Дәһшәт, соҡор һәм тоҙаҡ бар һеҙгә, Эй Моав халҡы! – тип белдерә Раббы. –

⁴⁴ Дәһшәттән ҡасҡан соҡорға төшөр, Соҡорҙан сыҡҡан тоҙаҡҡа эләгер. Сөнки Моавтың өҫтөнә Яза йылы килтерәм, – тип белдерә Раббы. –

⁴⁵ Хешбондың күләгәһендә Хәле бөтөп туҡтаны ҡасҡындар; Әммә Хешбондан – ут, Сихон араһынан ялҡын сыҡты; Моавтың сикәһен, Башбаштаҡ кешеләрҙең түбәһен ялмар.

⁴⁶ Башыңа бәлә килде, Моав! Илаһ Кемоштың халҡы юҡ булды, Улдарың һөргөнгә ебәрелде, Ҡыҙҙарың тотҡонлоҡҡа эләкте.

⁴⁷ Ләкин киләсәк көндәрҙә Моавҡа элекке мул, имен тормошон ҡайтарырмын», – тип белдерә Раббы. Йермеяһтың Моав тураһындағы пәйғәмбәрлек һүҙҙәре ошонда тамамлана.