Әйүп 9 - Изге Яҙма

Әйүптең өсөнсө телмәре: Кеше Алла алдында нисек аҡлана ала?

¹ Әйүп былай яуапланы:

² «Дөрөҫ, бының шулай икәнлеген беләм. Әммә кеше Алла алдында нисек аҡлана ала?

³ Әгәр берәү Уның менән дәғүәләшһә, Уның мең һорауына бер яуап таба алмаҫ.

⁴ Уның аҡылы тәрән, ҡөҙрәте сикһеҙ, Уға ҡаршы торғандарҙан кем имен ҡалыр?

⁵ Ул тауҙарҙы һис бер киҫәтеүһеҙ урындарынан күсерер, Асыуынан аҫтын-өҫкә әйләндерер.

⁶ Ерҙе урынынан ҡуҙғатыр, Уның терәктәрен дер һелкетер.

⁷ Ул бойорһа, ҡояш ҡалҡмаҫ, Йондоҙҙарҙың яҡтыһын ҡаплап, мөһөрләр.

⁸ Ул бит бер яңғыҙы күкте киргән, Диңгеҙ тулҡындарының өҫтөнән гиҙгән.

⁹ Етегәнде, Орион менән Өлкәрҙе, Көньяҡ күге йондоҙҙарын Ул яратҡан.

¹⁰ Ғәмәлдәре бөйөк, баш етмәҫлек, Мөғжизәләренең һаны-хисабы юҡ.

¹¹ Бына Ул янымдан үтеп китер – күрмәм, Елеп уҙыр, бер нәмә лә тоймам.

¹² Тартып алһа, кем Уны туҡтатыр? Кем Уға: „Нимә эшләйһең?“ – тиер?

¹³ Алла асыуын теҙгендә тотмаҫ, Раһавтың ярҙамсылары Уның аяғы аҫтында аунар.

¹⁴ Шулай булғас, нисек мин Уға яуап бирә алайым? Уның алдында мин нисек һүҙ табайым?

¹⁵ Хаҡлы булһам да, яуап ҡайтара алмаҫ инем, Хөкөмдарымдан бары мәрхәмәт һорар инем.

¹⁶ Хатта саҡырыуыма яуап ҡайтарһа ла, Уның мине тыңларына ышана алмам.

¹⁷ Ғәрәсәт булып өҫтөмә ябырыла, Ғәйепһеҙгә яраларымды арттыра.

¹⁸ Хатта тын алырға ирек бирмәй, Түҙгеһеҙ әрнеү менән тултыра.

¹⁹ Әгәр эш ҡеүәттә булһа, Ул ҡеүәтле! Ғәҙеллек юлларға булһа, Кем Уны хөкөм ҡаршыһына килтерә ала?

²⁰ Хаҡлы булһам да, үҙ телем үҙемде ғәйепләп ҡуйыр. Камил булһам да, ғәйеплегә сығарыр.

²¹ Ғәйепһеҙмен! Тик миңә инде барыбер – Мин туйҙым бындай тормоштан.

²² Нисек булһа булһын! Шуға күрә әйтәм: „Ул ғәйепһеҙҙе лә, яуызды ла берҙәй юҡ итә“.

²³ Ҡапыл ябырылған бәлә үлем сәсһә, Ул ғәйепһеҙҙәрҙең ғазабынан көлә.

²⁴ Донъя залимдар ихтыярына тапшырылған, Алла хөкөмдарҙарҙың күҙҙәрен ҡаплап ҡуйған – Әгәр ҙә Ул түгел икән, кем һуң?

²⁵ Көндәрем сапҡындан етеҙерәк елеп үтә, Әммә алда яҡшылыҡ күренмәй.

²⁶ Улар ҡамыш кәмә кеүек етеҙ, Ҡорбанына ташланған бөркөттәй осҡор.

²⁷ „Аһ-зарымды онотайым, Хәсрәтле йөҙөм яҡтырһын“, – тиһәм,

²⁸ Яңы ҡайғылар ҡурҡыта мине, Сөнки беләм: мине ғәйепһеҙ тип танымаҫһың.

²⁹ Барыбер ғәйепле тип һаналам икән, Ниңә мин бушҡа тырышам?

³⁰ Ҡар һыуҙары менән йыуынһам да, Ҡулдарымды һелте менән таҙартһам да,

³¹ Мине тағы ла бысраҡ соҡорға батырырһың, Хатта үҙ кейемем дә минән ерәнер.

³² Алла бит минең кеүек әҙәм балаһы түгел, Нисек мин Уға яуап бирә алайым? Уның менән хөкөмгә нисек бергә барайым?

³³ Арабыҙҙа икебеҙҙең дә яурынына ҡул һалып, Беҙҙе килештерә алыр берәү ҙә юҡ!

³⁴ Алла Үҙенең яза таяғын өҫтөмдән алһа ине, Башҡаса миңә дәһшәт һалмаһа ине.

³⁵ Шул саҡта Унан ҡурҡмай һүҙемде әйтер инем, Әммә мин ундай түгелмен.