Әйүп 6 - Изге Яҙма

Әйүптең икенсе телмәре: Алла ғүмер ебемде өҙһә ине

¹ Әйүп былай тип яуап ҡайтарҙы:

² «Әгәр ҙә ғазаптарымды үлсәп, Бөтөн ҡайғыларымды бизмәнгә һалһаң –

³ Улар диңгеҙ ҡомонан да ауырыраҡ тартыр ине, Шуға күрә әйткән һүҙҙәрем дыуамал.

⁴ Сикһеҙ ҡөҙрәт Эйәһенең уҡтары тәнемдә, Рухыма уларҙың ағыуы һеңә; Алланың дәһшәттәре ябырылды миңә.

⁵ Үлән етерлек булғанда, баҡырырмы ишәк? Үгеҙ мөңрәрме утлыҡсаһында аҙыҡ булһа?

⁶ Сөсөнө тоҙһоҙ ашайҙармы? Йомортҡа ағының тәме бармы?

⁷ Ул ризыҡтарҙан йәнем екһенә, Улар мине сиргә һабыштыра.

⁸ Ялбарып һорағаным алдыма килһен ине, Алла миңә өмөтләнгәнемде бирһен ине –

⁹ Тәүәккәлләп мине иҙһен ине, Ҡул һуҙып, ғүмер ебемде өҙһөн ине.

¹⁰ Был миңә йыуаныс булыр – Аяуһыҙ ғазапҡа ҡарамаҫтан, һөйөнөр инем, Сөнки Изге булғандың һүҙҙәрен инҡар итмәнем.

¹¹ Түҙер өсөн ҡайҙан көс табайым? Ахырым ниндәй, нисек сабыр итәйем?

¹² Әллә миндә таш ныҡлығы бармы? Әллә тәнем баҡырҙанмы?

¹³ Бөтөнләй сараһыҙ ҡалған мәлдә Үҙемә ярҙам итерлек хәлем булырмы?

¹⁴ Бәндә сикһеҙ ҡөҙрәт Эйәһенән ҡурҡмаған хәлдә лә, Сараһыҙ ҡалғанда, дуҫының мәрхәмәтенә мохтаж.

¹⁵ Тик минең дуҫтарым ышанысһыҙ, Шарлап ағып ятҡан йырғанаҡтай.

¹⁶ Улар боҙҙар ирегәндә таша, Ҡар һыуына тулып ярҙан аша;

¹⁷ Ҡоролоҡ мәлдә юҡҡа сыға, Эҫелә үҙәндәрендә кибеп ҡала.

¹⁸ Улар арҡаһында каруандар аҙашыр, Сүллектә ҡаңғырып һәләк булыр.

¹⁹ Тема каруансылары һыу эҙләр, Шеванан килгән сауҙагәрҙәр өмөтөн бағлар.

²⁰ Тик өмөттәре алданыр, Ҡороған йылға үҙәненә еткәс, шаҡ ҡатырҙар.

²¹ Инде һеҙ ҙә минең өсөн шул булдығыҙ: Хәлемде күрҙегеҙ ҙә ҡурҡып ҡалдығыҙ.

²² Әллә әйттемме: „Миңә бирегеҙ! Малығыҙҙан минең өсөн түләгеҙ!

²³ Дошмандың ҡулынан ҡотҡарығыҙ, Йолом түләп, залимдар ҡулынан азат итегеҙ“, – тинемме?

²⁴ Әйҙә, аңлатығыҙ – мин тынырмын, Нимәлә яңылыштым – күрһәтеп бирегеҙ.

²⁵ Хаҡ һүҙҙәр әрнеткес була! Тик ғәйепләүегеҙҙең асылы нимәлә һуң?

²⁶ Нишләп һеҙ һүҙҙәремә бәйләнәһегеҙ? Өмөтө өҙөлгәндең әйткәнен Иҫкән елгә тиңләйһегеҙ?

²⁷ Йәрәбә һалып, етемде бүлешәһегеҙ, Сауҙалашып, дуҫығыҙҙы һатырға әҙерһегеҙ.

²⁸ Инде, рәхим итеп, миңә боролоп ҡарағыҙ – Күҙегеҙгә ҡарап, алдаша аламмы?

²⁹ Яуызлыҡҡа юл ҡуймаҫ өсөн кире уйлағыҙ! Аңлағыҙ, әлегә хаҡлыҡ минең яҡта.

³⁰ Ауыҙымдан берәй нахаҡ һүҙ сыҡтымы? Аңҡауым һәләкәт әсеһен тоймаҫмы?