Әйүп 5 - Изге Яҙма

Әлифаз телмәрен дауам итә: Һин сикһеҙ ҡөҙрәт Эйәһенең тәрбиәһенән баш тартма

¹ Саҡырып ҡара! Яуап ҡайтарыусы табылырмы? Изгеләрҙең ҡайһыһына йөҙ тоторһоң?

² Ахмаҡты ҡыҙыулығы үлтерер, Бер ҡатлыны көнсөллөгө бөтөрөр.

³ Күргәнем бар: тиле тамыр ебәреп өлгөрә, Йортона ҡапыл ғына ҡарғыш төшә.

⁴ Балалары хәүефкә яҡын булыр, Ҡала ҡапҡаһы төбөндә тапалырҙар, Уларҙы һис кем яҡламаҫ.

⁵ Уңыштарын астар ашар – Сәнскәк араһындағыһын да ҡалдырмаҫтар, Байлыҡтарын ҡомһоҙҙар йотор.

⁶ Бәлә-ҡаза тупраҡтан шытып сыҡмай бит, Ҡайғы-хәсрәт ҡырҙа үҫмәй.

⁷ Ут сатҡыһының һауаға осҡаны дөрөҫ булғандай, Кешенең ғазап сигер өсөн тыуғаны ла хаҡ.

⁸ Мин булһам, Аллаға йөҙ тотор, Эшемде Уға тапшырыр инем.

⁹ Ул шундай бөйөк ғәмәлдәр ҡыла, Уларға кешенең аҡылы етмәҫлек, Мөғжизәләренең иҫәбе-һаны юҡ.

¹⁰ Ул ер йөҙөнә ямғыр яуҙыра, Ҡырҙарҙы Ул һыуға туйындыра.

¹¹ Түбәнһетелгәндәрҙе күтәрә, Йәш түккәндәрҙе именгә алып сыға.

¹² Ҡырын эштәре барып сыҡмаһын өсөн, Мәкерлеләрҙең ниәтен боҙа.

¹³ Аҡыллы баштарҙы үҙҙәренең хәйләһенә эләктерә, Хәйләкәрҙәрҙең мутлығына сик ҡуя.

¹⁴ Улар көпә-көндөҙ ҡараңғыға сумыр, Төш мәлендә, төндәге һымаҡ, Ҡапшанып йөрөргә дусар булыр.

¹⁵ Фәҡирҙәрҙе ҡылыстай үткер телдәрҙән, Көслөнөң ҡулынан йолоп алыр.

¹⁶ Шуға күрә ярҙамһыҙҙың өмөтө бар, Ғәҙелһеҙлектең ауыҙы томаланыр.

¹⁷ Алла нәсихәт биргәндәр ни ҡәҙәр бәхетле! Һин сикһеҙ ҡөҙрәт Эйәһенең тәрбиәһенән баш тартма.

¹⁸ Ул йәрәхәтләр, тик Үҙе бәйләп ҡуйыр, Ул һуғыр, әммә ҡулдары һауыҡтырыр.

¹⁹ Алты тапҡыр бәләгә ҡалһаң – ҡотҡарыр, Етенсеһендә лә һиңә зыян теймәҫ.

²⁰ Аслыҡ мәлендә – үлемдән, Һуғышта ҡылыстан йолоп алыр.

²¹ Раббы һине телдең ҡамсыһынан ҡаплар, Бөлгөнлөк килеүҙән ҡурҡмаҫһың.

²² Юҡлыҡ менән аслыҡтан көлөрһөң, Ҡырағай йыртҡыстарҙан өркмәҫһең.

²³ Сөнки баҫыуҙағы таштар менән килешеү төҙөрһөң, Ҡыр йәнлектәре менән татыу йәшәрһең.

²⁴ Сатырыңда гел имен буласағын белерһең, Малдарыңды байҡарһың да бер етешһеҙлек тә тапмаҫһың.

²⁵ Тоҡомоңдоң күплеген күрерһең, Зат-зәүерең үлән шикелле ишелеп үҫер.

²⁶ Үҙ ваҡытында йыйып бәйләнгән көлтә һымаҡ, Өлкәнәйеп ҡәбереңә китерһең.

²⁷ Бына, нимәләрҙе асыҡланыҡ – улар барыһы ла хаҡ. Шуға күрә ҡолаҡ һалып тыңла ла фәһем ал».