Әйүп 40 - Изге Яҙма

¹ Шул саҡ Раббы ғәрәсәт эсенән Әйүпкә былай тип яуапланы:

² «Әйҙә, ирҙәрсә билеңде быу ҙа, Мин һорайым, ә һин аңлатып бир.

³ Ысынлап та Минең ғәҙеллегемде бушҡа сығараһыңмы? Үҙеңде хаҡ тип иҫбатлар өсөн Мине ғәйепләмәксеһеңме?

⁴ Һин дә Алла һымаҡ ҡеүәтлеме? Тауышың Уныҡылай күкрәйме?

⁵ Улай икән, үҙеңде бөйөклөк һәм мөһабәтлек менән биҙә, Балҡышҡа һәм күркәмлеккә сорнал.

⁶ Ташып килгән асыуыңды түк, Ғорурҙарға ҡара ла күндәм ит.

⁷ Бөтә тәкәбберҙәргә ҡара ла түбәнһет, Залимдарҙы торған урынында ҡыра һуҡ.

⁸ Барыһын да бергә тупраҡҡа күм, Ер аҫтында йөҙҙәрен ҡапла.

⁹ Шул сағында Мин һине маҡтармын, Уң ҡулың үҙеңде ҡотҡара, тиермен.

¹⁰ Бына бегемот. Уны ла һинең кеүек үк Мин бар ҡылдым. Ул үгеҙ шикелле үлән ашай.

¹¹ Ҡара, боттары ниндәй ҡеүәтле, Ҡорһағының мускулдары көслө.

¹² Ҡойроғо кедр ағасы кеүек, Янбашындағы һеңерҙәре бергә үрелгән.

¹³ Һөйәктәре баҡыр борғо һымаҡ, Һөлдәләре тимер таяҡтай.

¹⁴ Алланың тәүге ғәмәлдәре ул; Тик Яратыусыһы ғына уға ҡылыс менән яҡынлаша алыр.

¹⁵ Бөтә ҡырағай йәнлектәр уйнап йөрөгән тауҙар Уға ашарға бирә.

¹⁶ Ул сәнскәкле лотос аҫтында, Һаҙлыҡтарҙа ҡамыш араһында боҫоп ята;

¹⁷ Лотостар уларҙы күләгәһе менән ҡаплар, Йылға талдары тирә-яҡтан уратыр.

¹⁸ Йылға шарлап аҡҡандан да өркмәҫ; Тыныс ҡалыр хатта Иордан йылғаһы Боғаҙына эркелгән саҡта ла.

¹⁹ Берәйһе уны ҡармаҡҡа эләктерә Йәки ырғаҡ менән томшоғон аймай алырмы?

²⁰ Ливъяҫанды ҡармаҡҡа тота алаһыңмы? Телен арҡан менән бәйләй алаһыңмы?

²¹ Моронона дүңгәләк кейҙереп, Яңаҡ һөйәген ырғаҡ менән тишә алаһыңмы?

²² Һиңә ҡабат-ҡабат ялбарырмы? Йомшаҡ һүҙҙәр менән өндәшерме?

²³ Һинең менән килешеү төҙөрмө? Һиңә мәңге ҡол булырға вәғәҙә бирерме?

²⁴ Ҡош менән уйнаған кеүек, уның менән уйнарһыңмы? Ҡыҙҙарыңа ҡыҙыҡ өсөн уға таҫма тағырһыңмы?

²⁵ Балыҡсылар уны күпмегә һатырға сауҙалашырмы? Сауҙагәрҙәргә бүлеп бирерме?

²⁶ Уның тиреһен һөңгө менән сәнскеләй алырһыңмы? Башын һалдау менән яра алырһыңмы?

²⁷ Ҡағылып ҡара – ҡабат бер ҙә ынтылмаҫһың, Ул алышты һис тә онота алмаҫһың!