Әйүп 39 - Изге Яҙма

¹ Тау кәзәләренең ҡасан бәрәсләргә тейешлеген беләһеңме? Боландарҙың быҙаулағанын күҙәткәнең бармы?

² Быуаҙ йөрөгән айҙарын хисаплап сығара алаһыңмы? Тыуҙырыр мөҙҙәттәре еткәнен,

³ Теҙ сүгеп бәрәсләрҙәрен, Йөктәренән ҡотолорҙарын,

⁴ Бәрәстәре ҡырҙарҙа үҫеп, көсәйеп, Уларҙы ташлап китер, кире ҡайтмаҫын беләһеңме?

⁵ Кем ҡырағай ишәктәрҙе иреккә ебәрҙе, Кем уларҙың тышауҙарын өҙҙө?

⁶ Уларға төйәк итеп Мин даланы, Торлаҡ итеп тоҙло ерҙе бирҙем.

⁷ Ҡалаларҙағы шау-шыуҙан йыраҡ улар, Ҡыуалаусының аҡырғанын ишетмәй.

⁸ Аҙыҡ эҙләп тау-таш ҡыҙыралар, Һәр бөртөк йәшел үләнде ҡалдырмай эҙләйҙәр.

⁹ Ҡырағай үгеҙ һиңә хеҙмәт итергә теләрме? Һинең утлыҡсаң янында төнәрме?

¹⁰ Бураҙна һалһын тип уны арҡанлай алырһыңмы? Артыңдан үҙәндәрҙә сиҙәм асып барырмы?

¹¹ Уның ҡеүәтле көсөнә таяна алырһыңмы? Ауыр эшеңде уға йөкмәтә алырһыңмы?

¹² Игенеңдең уңышын ташыуына, Ырҙыныңа илтеүенә ышанырһыңмы?

¹³ Ҡанаттарын ҡыуанып ҡаға дөйәғош: Ҡыҫҡа улар – әммә ниндәй мамыҡ-ҡауырый!

¹⁴ Туҙанда йылынып ятһын өсөн, Дөйәғош йомортҡаларын ергә ташлап китә;

¹⁵ Аяҡ аҫтында ярылып иҙелерен, Ҡырағай йәнлектәр тарафынан тапалырын аңламай.

¹⁶ Себештәренә ҡарата аяуһыҙ ул, әйтерһең дә улар ят; Тырышлығы бушҡа китер тип тә ҡурҡмай.

¹⁷ Сөнки Алла уға аҡылдан өлөш сығармаған, Аңлау ҡеүәһе бирмәгән.

¹⁸ Әммә тороп йүгерергә тотонһа, Атты ла, һыбайлыны ла көлкөгә ҡалдыра!

¹⁹ Атҡа көстө һин бирҙеңме, Уның муйынына ялын таҡҡан һинһеңме?

²⁰ Саранча һымаҡ сабырға өйрәттеңме? Ғорур кешнәүе ниндәй дәһшәтле;

²¹ Тояҡтары менән ерҙе сапсый, Көс-ҡеүәтенә сыҙаша алмай, Ҡурҡыу белмәй алышҡа ынтыла.

²² Хәүеф-хафа уның өсөн көлкө генә, Ҡылыс алдында ла артҡа сикмәҫ.

²³ Өҫтөнә тағылған һаҙаҡта уҡ сыңлай, Һөңгө менән ҡалҡан ялтырай.

²⁴ Ажарынан ул ерҙе кимерә, Борғо тауышына бейеп тора,

²⁵ Борғо ҡысҡыртыуға – кешнәп ебәрә. Алыҫтан уҡ алыш еҫен тоя, Ғәскәр башлыҡтарының һөрәнен, Яу оранын ишетә.

²⁶ Ҡарсыға күктә һинең аҡылың менән кәйеләме, Ҡанат йәйеп, көньяҡҡа осамы?

²⁷ Һинең бойороғоң менән күтәреләме бөркөт, Юғарыла үҙенә оя ҡорамы?

²⁸ Ул ҡаяла төйәкләнә, Ҡәлғәһе – ҡая таштар, шунда төнөн үткәрә;

²⁹ Шунан ул ҡорбанын күҙләй, Күҙҙәре алыҫ-алыҫтан күрә.

³⁰ Ҡошсоҡтарын ҡан менән туйҙыра, Ҡайҙа үләкһә, ул шунда».

³¹ Раббы Әйүпкә былай тине:

³² «Һиңәме ни, эй бәхәссе, сикһеҙ ҡөҙрәт Эйәһенә өйрәтергә? Алланы ғәйепләүсе Уға яуап ҡайтарһын!»

³³ Шул саҡ Әйүп Раббыға былай тип яуап ҡайтарҙы:

³⁴ «Мин һиңә яуап бирергә лайыҡ түгел, Ауыҙымды усым менән томалайым.

³⁵ Мин бер әйттем – башҡаса дауам итеп тормайым, Ике әйттем, бүтән өндәшмәйем».