Әйүп 35 - Изге Яҙма

Әлиһуҙың өсөнсө телмәре: Алла бушҡа ҡысҡырғанды тыңламай

¹ Әлиһу һүҙен былай тип дауам итте:

² «Шул дөрөҫ тип уйлайһыңмы: „Алла түгел, ә мин хаҡмын“, – тиһең?

³ „Гонаһ ҡылмауымдан ни файҙа ла ниндәй йөй?“ – тип һораһаң,

⁴ Яуап ҡайтарам һиңә һәм дуҫтарыңа:

⁵ Күккә ҡара ла күр, болоттарҙы күҙәт, Улар һинән ниндәй бейек.

⁶ Гонаһ ҡылһаң, уның Аллаға ниндәй зыяны тейә? Енәйәттәреңде арттырыуҙан, Уға нимә була?

⁷ Һинең тәҡүәлегең Уға нимә бирә? Һинең ҡулыңдан Ул нимә ала?

⁸ Үҙең кеүек үк кешегә – яманлығың; Тәҡүәлегең дә – әҙәм балаларына.

⁹ Кешеләр ҡаты иҙелеү аҫтында иңрәй, Көслөләр ҡулынан ҡотолоу өсөн ярҙам һорай.

¹⁰ Әммә бер кем дә: „Ҡайҙа һуң мине бар ҡылған Алла? Төндәрен беҙгә өмөт йырҙары биреүсе ҡайҙа?

¹¹ Беҙгә ерҙәге йәнлектәргә ҡарағанда күберәк зиһен биргән, Һауалағы ҡоштарға ҡарағанда аҡыллыраҡ иткән Яратыусыбыҙ ҡайҙа?“ – тип әйтмәҫ.

¹² Әммә иңрәп ҡысҡырған хәлдә лә, Ундайҙарға Алла яуап ҡайтармай, Сөнки залимдар тәкәббер.

¹³ Асылда Алла бушҡа ҡысҡырғанды тыңламай, Сикһеҙ ҡөҙрәт Эйәһе быға иғтибар бирмәй.

¹⁴ Ә инде Уға ҡаршы зарланаһың, Дәғүәң Уның хозурында, Уны хөкөмгә көтәм тиһең икән, – бигерәк тә.

¹⁵ Тағы ла, Уның асыуы яйлай, Ул енәйәттәргә артыҡ әһәмиәт бирмәй, тиһең.

¹⁶ Әйүп буш хәбәр һөйләп ауыҙын аса, Юҡ-бар һүҙ менән донъя тултыра».