Әйүп 28 - Изге Яҙма

Аҡыл тураһында ҡисса

¹ Көмөш сығарылған шахталар бар, Алтын йыуа торған урындар бар.

² Тимер тупраҡтан ҡаҙып сығарыла, Баҡыр руданан иретелеп алына.

³ Кеше ҡараңғылыҡты ла сигендерә; Үлем күләгәһе хөкөм һөргән Дөм ҡараңғы төпкөлдә таштар аҡтара.

⁴ Кеше йәшәмәгән төбәктәрҙә Руда эҙләп тәрән соҡор ҡаҙалар, Бер кем аяҡ баҫмаған алыҫ ерҙәрҙә Шул соҡорҙарға төшәләр, Бауға бәйләнеп эшләйҙәр.

⁵ Өҫтә икмәк үҫтергән ер Аҫта утта янып ирегән шикелле.

⁶ Таштарында зәңгәр яҡут йәшеренгән, Балсығынан алтын табыла.

⁷ Унда илткән юлды йыртҡыс ҡоштар белмәй, Ыласындың күҙе уны күрмәй.

⁸ Ҡырағай йәнлектәр ҙә йөрөмәй унан, Арыҫландың тәпәйе лә баҫмай бында.

⁹ Ә кеше саҡматаштай ҡаты ҡаяларҙы емерә, Тауҙарҙы төбө-тамырынан аҡтара;

¹⁰ Тау-таштарҙы соҡоп, тишеп үтә, Күҙҙәре бөтә хазиналарҙы күрә.

¹¹ Йылғаларҙың инешенә барып етә, Йәшеренде яҡтыға сығара.

¹² Әммә аҡыл ҡайҙан табыла һуң? Зиһендең инеше ҡайҙа?

¹³ Әҙәм балаһы уның баһаһын белмәй, Тереләр донъһында уны табып булмай.

¹⁴ Тәрәнлектәр әйтер: «Ул миндә юҡ». «Минең янда ла юҡ», – тиер диңгеҙ.

¹⁵ Уны саф алтын түләп тә алып булмаҫ, Ҡиммәте көмөш менән дә үлсәнмәҫ.

¹⁶ Уны Офир алтыны менән дә, Оникс һәм зәңгәр яҡут менән дә баһалап булмаҫ.

¹⁷ Уға алтын да, гәлсәр ҙә тиң түгел, Саф алтын һауытҡа ла алмаштырылмаҫ.

¹⁸ Ынйы-мәрйенде инде әйтеп тә тораһы юҡ; Аҡылдың ҡиммәте аҫылташтарҙан да өҫтөн.

¹⁹ Куштың хризолиты уға тиңдәш түгел, Саф алтын менән ул баһаланмай.

²⁰ Улай булғас, ҡайҙан килә һуң ул аҡыл? Зиһендең инеше ҡайҙа?

²¹ Ул бөтә йән эйәләренең күҙенән дә, Һауалағы ҡоштарҙан да йәшерелгән.

²² Хатта Һәләкәт ере менән Үлем дә: «Ҡолағыбыҙға ғына салынғаны бар», – тиҙәр.

²³ Уға алып барған юлды бары Алла белә, Ул ғына хәбәрҙар аҡыл төйәгенә.

²⁴ Ул күрә ер йөҙөн сигенән сигенә тиклем, Күк аҫтындағы бар нәмәне Ул байҡай.

²⁵ Елгә көс биргән сағында, Һыуҙарҙы үлсәп сик ҡуйғанында,

²⁶ Ямғырға ҡағиҙә биргәнендә, Йәшенле дауылға юл асҡан саҡта

²⁷ Ул аҡылды күреп баһаланы, Уны нығытты, һынаны.

²⁸ Әҙәмгә әйтте: «Ысын зирәклек – Раббы Хакимдан ҡурҡыу. Яуызлыҡтан йыраҡ тороу иһә – аҡыл».