Әйүп 21 - Изге Яҙма

Әйүптең етенсе телмәре: Ни өсөн яуыздар йәшәй?

¹ Әйүп былай тип яуап ҡайтарҙы:

² «Әйткәнемде диҡҡәт биреп тыңлағыҙсы, Мине йыуатыуығыҙ шул булһын.

³ Мин һөйләп бөтөргәнсе генә түҙегеҙ, Унан, теләһәгеҙ, көлөрһөгөҙ.

⁴ Мин кешеләрҙән зарланаммы ни? Шулай булғас нисек сабыр итәйем һуң?

⁵ Ҡарағыҙ миңә – һушығыҙ китер, Ҡулығыҙ менән ауыҙығыҙҙы ҡапларһығыҙ.

⁶ Уйлаһам, хатта үҙем дә ҡурҡам – Бөтөн тәнем ҡалтырауға ҡала.

⁷ Ни өсөн яуыздар йәшәй, Өлкәнәйгән һайын ҡеүәттәре арта бара?

⁸ Уларҙың балалары һәр саҡ эргәләрендә, Нәҫелдәре күҙ алдында.

⁹ Өйҙәре имен, бер ниндәй ҡурҡыныс юҡ, Алланың таяғы баш өҫтәрендә янамай.

¹⁰ Үгеҙҙәренең орлоғо әрәм булмай, Һыйырҙары йыл һайын быҙаулай, Быҙауын һалмай.

¹¹ Бала-сағалары көтөү булып йөрөй, Бәрәстәр кеүек һикерәнләп уйнай.

¹² Дөңгөр һуғып, арфа сиртеп бейешәләр, Һыбыҙғыға ҡушылышып йырлайҙар.

¹³ Ғүмерҙәре муллыҡта үтә, Тыныслыҡта улар үлектәр донъяһына китә.

¹⁴ Ә бит Аллаға: „Кит беҙҙән, – тиҙәр. – Һинеңсә йәшәргә теләмәйбеҙ.

¹⁵ Кем ул сикһеҙ ҡөҙрәт Эйәһе, Уға хеҙмәт итергә? Уға доға ҡылыуҙан ни фәтүә?“

¹⁶ Әммә муллыҡтары уларҙың үҙ ҡулдарында түгел. Ҡуй, яуыздарҙың өгөтө минән алыҫ торһон!

¹⁷ Яуыздарҙың шәме йыш һүнәме лә, Баштарына ҡайғы-хәсрәт киләме? Алла асыуланған сағында уларға ғазап бирәме?

¹⁸ Нисә тапҡыр ел осорған һалам һымаҡ, Дауыл елгәргән кәбәк кеүек булдылар?

¹⁹ „Алла язаны уларҙың Балаларына һаҡлап тора“, – тиһегеҙме? Юҡ, әжерен үҙҙәренә бирһен, белһендәр.

²⁰ Үҙҙәренең һәләкәтен үҙ күҙҙәре күрһен, Сикһеҙ ҡөҙрәт Эйәһенең асыуын үҙҙәре эсһен.

²¹ Юҡһа, ғүмерҙәре бөткәс, көндәренең ахыры килгәс, Ғаиләһендә уларҙың ни ҡайғыһы бар?

²² Иң юғарылағыларҙы ла хөкөм ҡылыусы Аллаға Кем аҡыл өйрәтә алыр?

^23-24 Берәү көсө ташып торған саҡта, Тәне һау-сәләмәт, һөйәгендә елеге тулып торғанда, Тыныс һәм етеш тормошта күҙен йомор.

²⁵ Башҡа берәү ғазап сигеп, Һис рәхәтлек күрмәй китеп барыр.

²⁶ Икеһе лә бер тупраҡҡа ятыр, Икеһенең дә тәнен ҡорт баҫыр.

²⁷ Беләм нимә уйлағанығыҙҙы, Миңә ҡаршы мәкер ҡорғанығыҙҙы.

²⁸ Әйтерһегеҙ: „Ҡайҙа һуң затлының йорто? Яуыздар йәшәгән сатыр ҡайҙа?“

²⁹ Юлаусыларҙан һорашманығыҙмы ни? Күргәндәрен иҫәпкә алманығыҙмы?

³⁰ Залим һәләкәт көнөндә имен ҡала, Раббының асыу көнө уны урап үтә.

³¹ Кем дөрөҫлөктө битенә бәреп әйтер? Кем ҡылғанының ҡонон ҡайтарыр?

³² Мәйетен зыяратына алып барғанда Ҡәберенә ҡарауыл ҡуйырҙар.

³³ Үҙән тупрағы мамыҡтай булыр, Иҫәпһеҙ халыҡ алдынан, Һанһыҙ артынан оҙатып барыр.

³⁴ Ниңә кәрәк миңә юҡ-бар йыуатыуҙарығыҙ? Яуаптарығыҙ бит тотош ялған».