Әйүп 15 - Изге Яҙма

Әлифаздың икенсе телмәре: Ҡатын-ҡыҙҙан тыуған зат нисек тәҡүә булһын?

¹ Темандан килгән Әлифаз былай яуапланы:

² «Аҡыллы ир елдән килгән белем менән яуап ҡайтарырмы? Ҡорһағын көйҙөргөс ел менән тултырырмы?

³ Мәғәнәһеҙ һүҙ, файҙаһыҙ хәбәр менән Ҡаршы һөйләп маташырмы?

⁴ Һин хатта Алланан ҡурҡыуыңды ташлағанһың, Уның хаҡында уйланыуҙы ваҡлыҡ тип иҫәпләйһең.

⁵ Сөнки гонаһың ҡоторта ауыҙыңды, Хәйләкәрҙәр теле менән һөйләшәһең.

⁶ Һине хөкөм итеүсе мин түгел – үҙ ауыҙың, Ҡаршы шаһитлыҡ итә үҙеңдең телең.

⁷ Әллә һин әҙәм затының тәүгеһеме? Тауҙарҙан әүәл яратылдыңмы?

⁸ Алланың кәңәшмәһендә ҡатнаштың да Бөтөн аҡылды үҙеңә тупланыңмы?

⁹ Беҙ белмәгән нимә мәғлүм һиңә? Беҙ аңламаған нимәне һин төшөндөң?

¹⁰ Арабыҙҙа сал сәслеһе, ҡарты ла бар, Улар атаңдан да өлкәнерәк.

¹¹ Әллә һиңә Алланың биргән йыуаныстары, Әйткән яғымлы һүҙҙәре аҙ булдымы?

¹² Ниңә күңелең шулай шашына? Ниңә күҙҙәрең ут сәсеп тора?

¹³ Ниңә рухыңды Аллаға ҡаршы йүнәлткәнһең, Ауыҙыңдан шундай һүҙҙәр сыға?

¹⁴ Кем ул кеше – пак булырға? Ҡатын-ҡыҙҙан тыуған зат нисек тәҡүә булһын?

¹⁵ Ҡара, хатта Үҙенең фәрештәләренә ышанмаған, Күктең сафлығын мөрхәтһенмәгән Алла

¹⁶ Хаҡһыҙлыҡты һыу һымаҡ һемергән, Ерәнгес, боҙоҡ әҙәмгә ышанырмы?

¹⁷ Тыңла мине, һиңә теүәл генә әйтеп бирәм, Ни күргәнмен, бөтәһен дә бәйән итәм.

¹⁸ Аҡыл эйәләре өйрәткәнде, Аталарынан өйрәнгәнде йәшермәй һөйләйем.

¹⁹ Ер бит бары уларға бирелгән, Араларына яттар кермәгән булған.

²⁰ Яуыз әҙәмдең ғүмере ғазап эсендә үтер, Иҙеүсегә бирелгән йылдар һанаулы.

²¹ Ҡолағында дәһшәтле тауыш яңғырап торор, Тыныслыҡ булған сағында йән ҡыйыусы һөжүм итер.

²² Ҡараңғынан ҡотолорона өмөтө ҡалмаҫ, Ҡайҙа барһа, шунда ҡылыс көтөп торор.

²³ „Ҡайҙан алайым?“ – тип зарығып икмәк эҙләр, Ҡара көндәре еткәнен белер.

²⁴ Ауырлыҡ, бәләләр ҡотон алыр, Яу менән килгән батшалай ябырылыр.

²⁵ Сөнки ул Аллаға ҡаршы ҡул күтәрҙе, Сикһеҙ ҡөҙрәт Эйәһенә ҡаршы майҙан тотто.

²⁶ Ҡалын ҡалҡанын тотоп, баш сөйөп, Тиҫкәреләнеп, Уға ҡаршы ташланды,

²⁷ Күҙҙәрен май бөргән, Һимеҙ ҡорһағы һәленеп төшкән хәлдә.

²⁸ Ул таланған ҡалаларҙа, Кешеләре ташлап киткән, Емерелергә торған өйҙәрҙә йәшәр.

²⁹ Инде бай булмаҫ, мөлкәте юҡҡа сығыр, Биләмәләре ерҙә йәйелмәҫ.

³⁰ Ҡараңғылыҡтан ҡасып ҡотола алмаҫ, Үҫентеләрен ут-ялҡын ялмап өтөр, Алланың һулышынан ул юҡҡа сығыр.

³¹ Юҡ-барға ышанып, үҙен-үҙе алдамаһын, Сөнки эшенең әжере лә юҡ-бар буласаҡ.

³² Тейешлеһен ваҡытынан алда алып бөтөр, Ботаҡтары инде йәшелләнмәҫ.

³³ Емешен өлгөрмәҫ борон ҡойған йөҙөм, Сәскәһен ҡойған зәйтүн ағасы һымаҡ булыр.

³⁴ Аллаһыҙҙар йәмғиәте ҡыҫыр булыр, Ришүәтселәрҙең сатырҙарын ут йотор.

³⁵ Улар, яуызлыҡтан ауырға ҡалып, бәлә тыуҙырыр, Ҡарындары хәйлә менән тулыр».