Әйтемдәре 6 - Изге Яҙма

Тормош өсөн кәрәк иҫкәрмәләр

¹ Улым, әгәр ҙә башҡа өсөн яуаплылыҡ йөкләһәң, уны үҙеңдең иңеңә алһаң –

² биргән һүҙеңдең ауына ҡаптың, ауыҙыңдан сыҡҡан вәғәҙәңдең ҡолона әйләндең.

³ Улым, үҙеңде ҡотҡарыу сараһын күр, һин ул кешенең ҡулына төштөң: уның янына бар, аяғына йығыл, ялбар,

⁴ күҙҙәреңә йоҡо бирмә, керпектәрең дә ауыраймаһын;

⁵ үҙеңде һунарсы ҡулынан ғәзәл һымаҡ, ау ҡороусынан ҡош һымаҡ ҡотҡар.

⁶ Эй ялҡау, ана ҡырмыҫҡаға баҡ, уның тырышлығын күреп, аҡыл ал:

⁷ уның өҫтөнән түрә лә, күҙәтсе лә, хөкөмдар ҙа юҡ;

⁸ әммә ул йәй буйы аҙыҡ туплай, ураҡ мәлендә үҙҙәренә ем әҙерләй.

⁹ Күпме ятырға була, эй ялҡау, йоҡонан торор ваҡыт түгелме?

¹⁰ Йәнә әҙерәк йоҡлап, серем итһәң, ҡул ҡаушырып тағы ултыра бирһәң –

¹¹ өйөңә ҡараҡ һымаҡ мохтажлыҡ инер, ҡораллы баҫҡынсы булып нужа һөжүм итер.

¹² Йүнһеҙ әҙәм, яман кеше ауыҙынан ялған һибә;

¹³ йә күҙ ҡыҫа, аяҡ тыпырлата, йә бармағы менән ишаралай.

¹⁴ Йөрәгендә уның һәр саҡ мәкер, һәр ваҡыт боҙоҡлоҡ уйлап йөрөй, ҡайҙа барһа ла, тауыш сығара.

¹⁵ Шуға күрә һәләкәте ҡапыл булыр, шифа тапмай, ҡотолғоһоҙ харап булыр.

¹⁶ Раббы алты нәмәгә нәфрәтләнә, Ул ете нәмәнән ерәнә. Былар:

¹⁷ тәкәббер ҡараш, ялғансы тел, ғәйепһеҙҙең ҡанын ҡойған ҡулдар,

¹⁸ маҡсаты яманлыҡ булған йөрәк, яуызлыҡҡа ашығыусы аяҡ,

¹⁹ тын алған һайын алдашҡан ялған шаһит, ағай-эненең араһын бутаған зат.

²⁰ Улым, атайыңдың бойороҡтарын тот, әсәйеңдең өгөттәрен кире ҡаҡма!

²¹ Уларҙы һәр ваҡыт йөрәгеңдә һаҡла, мунсаҡ һымаҡ, муйыныңда тағып йөрө.

²² Улар, юлға сыҡһаң, һине етәкләп алырҙар, йоҡларға ятһаң, һаҡлап торорҙар, уянғаныңда һөйләшерҙәр.

²³ Сөнки бойороҡ шәм һымаҡ, өгөт-нәсихәт иһә – нур, шелтә менән тәртип – тормошҡа юл.

²⁴ Улар һине яман ҡатындан аралар, юха телле ят ҡатындан ҡурсалар.

²⁵ Ул ҡатындың сибәрлеге йөрәгеңде өтмәһен, керпек ҡағыуҙары ҡол итмәһен,

²⁶ сөнки аҙғын ҡатын бер һыныҡ икмәккә ҡалдыра, сит ҡатын йәнеңдән яҙҙыра.

²⁷ Кеше ҡуйынында ут йөрөтә алырмы? Кейгән кейеме янмаҫмы?

²⁸ Тере ҡуҙ өҫтөнән атлап йөрөп, аяғыңды бешермәү мөмкинме?

²⁹ Күршеһенең ҡатыны менән йөрөгән кешенең дә хәле шулай; кем ундай ҡатынға ҡағыла, язаһыҙ ҡалмай.

³⁰ Ҡараҡ аслыҡтан, тамаҡ ялғар өсөн урлаһа, кешеләр уға артыҡ хур баҡмаҫ.

³¹ Ә шулай ҙа тотһалар, ете ҡат арттырып түләтерҙәр, бөтә мөлкәтен тартып алырҙар.

³² Зина ҡылыусының аҡылы юҡ, бындай кеше үҙ йәнен үҙе ҡыя.

³³ Өлөшөнә таяҡ менән мәсхәрә төшөр; хурлығы юйылмаҫ булыр.

³⁴ Сөнки көнсөллөк – ирҙе ярһытҡыс бер көс ул, үс алған сағында аяп тормай.

³⁵ Ул бер ниндәй хаҡ та ҡабул итмәҫ, нимә бирһәләр ҙә, ризалашмаҫ.