Әйтемдәре 5 - Изге Яҙма

Уйнашҡа ҡаршы киҫәтеү

^1-2 Улым, айыҡ аҡыл йөрөтөр өсөн, ирендәрең белемеңде һаҡлаһын өсөн, мин биргән аҡылға күңел һал, әйткән фекеремде һанла.

³ Кеше ҡатынының ирененән бал тама, теле майҙай йомшаҡ яғыла –

⁴ ләкин аҙағында – әрем әселеге, ике яҡлы үткер ҡылыстай – хәүефе.

⁵ Уның аяҡтары үлем юлына төшә, аҙымдары үлеләр донъяһына йүнәлә.

⁶ Ул йәшәү юлын бар тип тә белмәй, тайғаҡ юлдан йөрөүен үҙе лә һиҙмәй.

⁷ Тимәк, уландар, әйткәнемә ҡолаҡ һалығыҙ, телемдән төшкән һүҙҙәрҙән тайпылмағыҙ.

⁸ Ундай ҡатындан йыраҡ тор, уның тупһаһына яҡын барма.

⁹ Юҡһа абруйыңды башҡаларға бирерһең, ғүмереңде залимдарға исрафларһың;

¹⁰ көс-ҡеүәтеңдән яттар кинәнер, михнәт менән тапҡаның икенсе йортҡа китеп торор.

¹¹ Тәнең һулып, ҡоро һөйәк ҡалғас, ғүмер ахырыңда ыңғырашырһың:

¹² «Өгөт-нәсихәтте ниңә тыңламаным, ниңә йөрәгем шелтәләрҙе кире ҡаҡты,

¹³ остаздарымдың өйрәткәнен алманым, кәңәш биргәндәрҙе һанламаным?

¹⁴ Бөтөн йәмғиәт алдында хурлыҡҡа саҡ төшмәй ҡалдым».

¹⁵ Һыуҙы үҙ һаҡлағысыңдан алып эс, сарсауыңды үҙ ҡоҙоғоңдоң һыуы менән баҫ.

¹⁶ Шишмәң урамдар буйлап аҡмаһын, ташҡындай майҙандарға тулмаһын.

¹⁷ Ул тик бары үҙеңдеке булһын, яттар менән уны уртаҡлашма.

¹⁸ Инешеңдең һыуы бәрәкәтле булһын, йәштән алған ҡатыныңдың рәхәтен күр.

¹⁹ Һөйкөмлө боланыңдың, гүзәл ҡоралайыңдың күкрәктәре һәр ваҡыт кинәнескә сорнаһын, – уның һөйөүе менән ләззәтләнеп йәшә.

²⁰ Ниңә, улым, сит ҡатындан башың юғалтырға, кеше ҡатынының ҡуйынына һыйынырға?

²¹ Кешенең юлы Раббының күҙ алдында, уның һәр аҙымын үлсәй Раббы!

²² Яман кеше үҙ яуызлығының ауына эләгә, гонаһтарының тоҙағына бәйләнә,

²³ тәрбиәһеҙлеге арҡаһында харап була, аҙғын ахмаҡлығы башына етә.