Әйтемдәре 3 - Изге Яҙма

¹ Улым, мин өйрәткәнде онотма, бойороҡтарымды йөрәгеңдә һаҡла;

² сөнки улар ғүмереңде оҙонайтыр, имен йәшәр йылдарыңды арттырыр.

³ Мәрхәмәт менән тоғролоҡ һине ташламаһын, уларҙы мунсаҡ итеп муйыныңа таҡ, йөрәк таҡтаташына яҙып ҡуй –

⁴ шул саҡ үҙең дә Алла һәм кеше күҙендә мәрхәмәт табып, хөрмәт ҡаҙанырһың.

⁵ Үҙ белдегеңә таянма, бөтөн йөрәгең менән Раббыңа инан.

⁶ Ниндәй юлдан барһаң да, Раббыңды таны, Ул һинең һуҡмағыңды турайтыр.

⁷ Үҙеңде аҡыл эйәһе тип һанама, Раббынан ҡурҡ, ямандан йыраҡ тор.

⁸ Был һинең тәнеңә сихәт бирер, һөйәгеңә ҡеүәт өҫтәр.

⁹ Раббыны бөтә мал-мөлкәтең менән олола, һәр эшеңдең тәүге емешен уға арна,

¹⁰ шулай итһәң, келәттәрең тулы булыр, мискәләрең йәш шараптан ташып торор.

¹¹ Улым, Раббының һабағын кире ҡаҡма, Уның шелтәһенә йәнең көймәһен.

¹² Атай кеше ғәзиз балаһын нисек шелтәләй, Раббы ла яратҡан бәндәһен шулай тәрбиәләй.

¹³ Аҡыл туплап, зирәклеккә ирешкән – бына кем ул бәхетле кеше!

¹⁴ Аҡыл туплау көмөш йыйыуҙан яҡшыраҡ, сөнки аҡыл алтындан затлыраҡ.

¹⁵ Аҫылташтарҙан да ҡиммәтлерәк аҡыл, һин теләгән бер нәмә лә уға тиң түгел.

¹⁶ Уның уң ҡулында – оҙон ғүмер, һул ҡулында байлыҡ менән шөһрәт булыр.

¹⁷ Уның юлдары – шатлыҡ юлдары, һуҡмаҡтары имен-аман булыр.

¹⁸ Аҡыл – уны ҡосаҡлап алғандар өсөн – тормош ағасы ул, уға һыйынғандар – бәхетле.

¹⁹ Раббы зирәк аҡылы менән ерҙең нигеҙен ҡорған, зирәклеге менән күкте нығытҡан.

²⁰ Уның аҡылы менән упҡындар убыла, болоттар ергә ямғыр яуҙыра.

²¹ Улым, һин ошоно күҙ уңыңдан ысҡындырма: айыҡ аҡыл, уйлап эш итеү ҡеүәһен һаҡла.

²² Шулай итһәң, улар һинең йәнең өсөн – йәшәү, муйыныңа аҫыл мунсаҡ булыр.

²³ Шул саҡ юлың имен-аман булыр, аяҡтарың иһә яҙа баҫмаҫ.

²⁴ Ҡурҡмайынса ятып йоҡларһың, йоҡоң һәр саҡ тыныс булыр.

²⁵ Көтмәгәндә килер афәттәрҙән, яуыз бәндәләргә килгән бәләләрҙән ҡурҡма,

²⁶ сөнки Раббы таянысың булыр, аяғыңды мәкер тоҙағынан һаҡлар.

²⁷ Ҡулыңдан яҡшылыҡ килә икән, мохтаждарға игелек ҡыл.

²⁸ Бөгөн бирерлек икәнһең, яҡыныңа: «Аҙаҡ кил, иртәгә бирермен», – тип әйтмә.

²⁹ Һиңә ышанып, яныңда шик-шөбһәһеҙ йәшәгән яҡыныңа ҡарата кенә тотма.

³⁰ Үҙеңә яманлыҡ ҡылмаған кеше менән сәбәпһеҙгә даулашма.

³¹ Башҡаларға йәбер ҡылғанға ҡыҙыҡма, уның юлын һайлама.

³² Сөнки Раббы мәкерле әҙәмдән екһенә, Ул намыҫлылар менән аралаша.

³³ Раббы яуыздарҙың йортона – ҡарғыш, иманлылар торлағына бәрәкәт бирә.

³⁴ Кешенән көлгәндән Раббы Үҙе көлә, тыйнаҡтарға мәрхәмәтен бүләк итә.

³⁵ Аҡыллылар шөһрәт ҡаҙаныр, ахмаҡтар мираҫҡа хурлыҡ алыр.