Әйтемдәре 29 - Изге Яҙма

¹ Әрләнгән һайын нығыраҡ тиҫкәреләнгән кеше – бер көн ҡапыл һәләк булыр, шифа тапмаҫ.

² Тәҡүәләр күбәйгәндә – халыҡ һөйөнә, яуыз хаким булғанда – халыҡ ыңғыраша.

³ Аҡылды яратҡан улан атаһын шатландырыр, фәхишәләр менән сыуалған малын юғалтыр.

⁴ Батшаның хаҡ хөкөмө илде нығыта, ришүәт яратыуы – бөлдөрә.

⁵ Яҡынына ялағайланған – уның аяғына тоҙаҡ һалған.

⁶ Ямандың гонаһы үҙенә тоҙаҡтыр, яҡшы кеше йырлап, ҡыуанып йәшәр.

⁷ Тәҡүә әҙәм ярлының дәғүәһен ентекләп тикшерер, залим ул турала уйлап та бирмәҫ.

⁸ Тотанаҡһыҙ әҙәмдәр ҡалала бола сығарыр, аҡыллылар ярһыуҙы баҫыр.

⁹ Аҡыллы әҙәм ахмаҡты хөкөмгә алып барһа, ахмаҡ асыуланыр, мәсхәрәләп көлөр, һис кенә лә тына белмәҫ.

¹⁰ Йән ҡыйыусы ғәйепһеҙҙе күрә алмаҫ, намыҫлыны юҡ итергә тырышыр.

¹¹ Ахмаҡ әҙәм асыуына ирек бирер, аҡыллы әҙәм уны тыйып торор.

¹² Әгәр хаким ялғанға ҡолаҡ һалһа, барлыҡ ярандары намыҫһыҙ булыр.

¹³ Ярлы менән залимдың бер оҡшашлығы бар – икеһенә лә Раббы күҙ нурҙары бирә.

¹⁴ Әгәр батша ярлыларҙы ғәҙел хөкөм итә икән, уның тәхете мәңге ҡаҡшамаҫ.

¹⁵ Сыбыҡ менән өгөт аҡылға ултыртыр, үҙ яйына ҡуйылған бала әсәһенә хурлыҡ килтерер.

¹⁶ Яуыздар ишәйгән ерҙә гонаһ күбәйер, әммә тәҡүәләр уларҙың һәләкәтен күрер.

¹⁷ Балаңды тәрбиәлә – тыныс булырһың, ул һиңә ҡыуаныс килтерер.

¹⁸ Алланан асылыш юҡ икән – халыҡ йүгәнһеҙ; ҡанунға тоғролар мең бәхетле.

¹⁹ Ҡоро һүҙ менән генә ҡолдо тәрбиәләп булмай, бындай кеше аңлаһа ла, ҡолаҡ һалмаҫ.

²⁰ Уйламай һүҙ һөйләгән кешене күргәнең бармы? Ундайҙарға ҡарағанда ахмаҡҡа өмөт күберәк.

²¹ Ҡолдо йәштән уҙындырһаң, яҡшылыҡҡа алып бармаҫ бындай аҙым.

²² Асыулы әҙәм янъял сығарыр, ҡыҙыу әҙәм золом арттырыр.

²³ Кешене тәкәбберлеге түбәнһетә, тыйнаҡ кеше хөрмәт ҡаҙана.

²⁴ Ҡараҡты дуҫ иткән – үҙенә үҙе дошман; шаһиттарҙы саҡырғанда өндәшмәй ҡалыр.

²⁵ Кешеләрҙән ҡурҡҡан – үҙенә тоҙаҡ ҡорған, Раббыға һыйынған – хәүефтән араланған.

²⁶ Күптәр батшанан мәрхәмәт эҙләй, ләкин кеше ғәҙеллекте тик Раббынан табыр.

²⁷ Ялғансылар – тәҡүәләргә ерәнгес, тура юлдан йөрөүселәр яуыздарға әшәке күренә.