Әйтемдәре 28 - Изге Яҙма

¹ Яуыз артынан һис кем баҫтырмағанда ла ҡасыр; тәҡүә арыҫландай ҡыйыу булыр.

² Илдә бола сыҡҡан саҡта, хакимдар күп, төшөнсәле һәм ғилемле хаким булһа, ил һаҡланыр.

³ Хәйерсене рәнйеткән теләнсе – ашлыҡты ағыҙған ҡойма ямғыр ише.

⁴ Ҡанун боҙғандар яуызды маҡтай, ҡанунға тоғролар уларға ҡаршы сыға.

⁵ Яман әҙәм ғәҙеллектең нимә икәнен белмәҫ, ә Раббыны эҙләүселәр тулыһынса аңлай.

⁶ Намыҫлы йәшәгән ярлы кеше нахаҡ юлда йөрөгән байҙан яҡшы.

⁷ Ҡанунға тоғро бала – аҡыллы булыр, аҙғындарға ҡушылған атаһын хурлыҡҡа батырыр.

⁸ Риба алып байыған әҙәмдең бар малы ярлыларға мәрхәмәт күрһәтеүсенең ҡулына эләгер.

⁹ Ҡанунға ҡолаҡ һалырға теләмәгән заттың доғаһы ла Раббы өсөн ерәнгес.

¹⁰ Намыҫлыны яман юлға этәреүсе үҙе ҡаҙған соҡорға үҙе төшөр, кәмселекһеҙ кеше мираҫҡа яҡшылыҡ алыр.

¹¹ Бай кеше үҙенә үҙе аҡыллы булып күренер, ләкин башы булған ярлы кеше уны фашлар.

¹² Тәҡүәләр еңһә, ил һөйөнә, яуыздар өҫтөн сыҡһа, кеше йәшенә.

¹³ Гонаһын йәшергән кеше яҡшылыҡ көтә алмаҫ, уны танып, ваз кискән мәрхәмәт табыр.

¹⁴ Раббынан ҡурҡҡан бәхетле булыр, бәғерһеҙ әҙәм бәләгә тарыр.

¹⁵ Яуыз хаким ярлы халыҡҡа гүйә ырылдаған арыҫлан, үкергән айыу.

¹⁶ Хаким алйот булған һайын, һалым күп, нахаҡ байлыҡты күрә алмағандың ғүмере оҙон.

¹⁷ Кеше ҡанын ҡойған әҙәм ҡәбергәсә ҡасып йөрөһөн, тынғы белмәһен, уға һис кем ярҙам итмәһен.

¹⁸ Намыҫлы йәшәгән хәүефһеҙ ғүмер кисерер; ҡыя юлдан йөрөгән һөрөнөп ҡолар.

¹⁹ Иген иккән икмәккә туйыр, буш артынан ҡыуған хәйерселеккә ҡалыр.

²⁰ Тоғро әҙәм күп бәрәкәт табыр, байлыҡҡа ашҡынған язаға тарыр.

²¹ Кешене айырып ҡарау – насар эш, бер һыныҡ икмәк тип кеше гонаһ ҡыла.

²² Ҡомһоҙҙоң ниәте – тиҙерәк байыу, артынса хәйерселек килерен уйламай ул.

²³ Ялағай телең өсөн түгел, тәнҡит һүҙең өсөн аҙаҡтан рәхмәт әйтерҙәр.

²⁴ «Гонаһ түгел», – тип ата-әсәһен талаған әҙәм юлбаҫарға бәрәбәр.

²⁵ Ҡомһоҙ бәндә дау сығара, Раббыға иҫәп тотҡан уңыш ҡаҙана.

²⁶ Үҙенә генә иҫәп тотҡан алйот була, аҡыл юлынан барыусылар ҡотола.

²⁷ Хәйерсегә биргән – тарлыҡ белмәҫ, уларға күҙен йомған бәндә ләғнәт ҡаҙаныр.

²⁸ Яуыздар артһа, кеше йәшенә, ҡырылып бөтһә, тәҡүәләр ишәйә.