Әйтемдәре 27 - Изге Яҙма

¹ Иртәгәһе көн менән маҡтанма, һин уның нимә килтеререн белмәйһең.

² Үҙеңде-үҙең түгел, башҡа кеше, үҙ ауыҙың түгел, бүтән телдәр һине маҡтаһын.

³ Таш ауыр, ҡом тос тарта, әммә ахмаҡтың рәнйетеүе икеһенән дә ауырыраҡ.

⁴ Асыу – ҡаты, ярһыу – тыйғыһыҙ, әммә көнсөллөк алдында кем сыҙай алыр?

⁵ Асыҡтан-асыҡ әйтелгән шелтә, йәшерен һөйөүҙән яҡшыраҡ.

⁶ Дуҫың һине яҡшылыҡ өсөн яралар, ә күрә алмаған бәндә күп үбер.

⁷ Тамағы туҡ әҙәм баллы кәрәҙҙе лә тапап үтер, тамағы асҡа әсе лә татлы күренер.

⁸ Тыуған яғынан айырылған кеше гүйә ояһын ташлап киткән ҡош.

⁹ Еҫле май һәм хуш еҫтәр йөрәккә ләззәт бирә, дуҫтың ихлас кәңәше күңелгә рәхәт.

¹⁰ Үҙ дуҫыңды ла, атаң дуҫын да ташлама, бәлә килһә, туғаныңа барма: эргәләге күршең йыраҡтағы ҡәрҙәшеңдән яҡшы.

¹¹ Аҡыллы бул, улым, йөрәгемә шатлыҡ килтер – мине ғәйепләгәндәргә ҡайтарып әйтер һүҙем булыр.

¹² Зирәк, хәүефте алдан күрер ҙә, йәшенер, бер ҡатлы һаман алға бара бирер ҙә, зыян күрер.

¹³ Ят кеше өсөн үҙенә яуаплылыҡ йөкмәгәндең кейемен ал, уны үҙеңә рәһен итеп ҡалдыр.

¹⁴ Иртә таңдан ҡысҡыра-ҡысҡыра күршене маҡтау уға ләғнәт уҡығандай булыр.

¹⁵ Мыжыҡ ҡатын ямғырлы көндө туҡтамай тамған һыу һымаҡ.

¹⁶ Ундай ҡатынды тыйыу – елде – бәйҙә, зәйтүн майын уста тотоу менән бер.

¹⁷ Тимерҙе тимер сарлар, кешене кеше үткерләр.

¹⁸ Инжир ағасын ҡарап үҫтергән уның емешен ашар, хужаһын хәстәрләгән – хөрмәт ҡаҙаныр.

¹⁹ Кешенең йөҙө һыуҙа сағылғандай, кешенең йөрәге лә йөрәктә сағыла.

²⁰ Үлеләр донъяһы менән Һәләкәт урыны туймаған һымаҡ, кешенең күҙе лә туймай.

²¹ Алтын менән көмөш – утта, кеше маҡтау менән һынала.

²² Иҫәрҙе ашлыҡ менән бергә килегә һалып төйһәң дә, уны иҫәрлегенән айырып алып булмай.

²³ Һарығыңдың хәл-әхүәлен бел, көтөүеңде яҡшылап көт;

²⁴ сөнки байлыҡ мәңге түгел, таж да нәҫелдән-нәҫелгә күсмәй.

²⁵ Үлән шиңеп, йәше ҡалҡып сыҡҡанда, тауҙарҙа бесән йыйып алынғанда,

²⁶ бәрәстәр һине кейендерер, кәзәләреңде һатып, баҫыу алырһың.

²⁷ Кәзәләрең мул һөт бирер, үҙеңә лә, ғаиләңә лә ризыҡ булыр, хеҙмәтсе ҡыҙҙарыңа ла эсергә етер.