Әйтемдәре 26 - Изге Яҙма

¹ Йәй уртаһындағы ҡар, ураҡ өҫтөндәге ямғыр һымаҡ, шөһрәт тә ахмаҡҡа килешле түгел.

² Турғай һәм ҡарлуғас осоп киткән һымаҡ, нахаҡ ҡарғыш та кешегә төшмәҫ.

³ Атҡа – ҡамсы, ишәккә – нуҡта, ахмаҡ арҡаһына һуйыл килешә.

⁴ Тилегә тилеләрсә яуап бирмә, үҙең дә шуға оҡшарһың.

⁵ Тилегә тилеләрсә яуап бир, үҙен аҡыллымын тип уйламаһын.

⁶ Ахмаҡҡа йомош ҡушып ебәргән әҙәм үҙенең аяғын ҡырҡып ташлағандай ғазап сигер.

⁷ Ахмаҡ ауыҙындағы хикмәтле һүҙ аҡһаҡтың сатан аяғы һымаҡ.

⁸ Ахмаҡҡа хөрмәт күрһәтеү – ташты һапҡыға бәйләп ҡуйыу менән бер.

⁹ Иҫерек ҡулындағы сәнскәкле ботаҡ нисек булһа, ахмаҡ ауыҙындағы хикмәтле һүҙ ҙә шулай.

¹⁰ Үткенсе ахмаҡты эшкә алған кеше бөтәһен дә яралаған дыуамал уҡсы менән бер.

¹¹ Үҙ ҡоҫҡолоғона әйләнеп ҡайтҡан эт һымаҡ, ахмаҡ әҙәм дә иҫәрлеген ҡат-ҡат ҡабатлар.

¹² Үҙен аҡыллыға һанаған затты күргәнең бармы? Ахмаҡ ул әҙәмдән күпкә өмөтлөрәк.

¹³ Ялҡау әҙәм: «Юлда арыҫлан! Урам буйлап йыртҡыс йөрөй», – тип тышҡа сыҡмаҫ.

¹⁴ Ишек – күгәнендә, ялҡау түшәгендә әйләнә.

¹⁵ Ялҡау әҙәм табаҡҡа ҡулын тығыр, тик ауыҙына еткергәнсе арыр.

¹⁶ Ялҡау үҙен сәсән телле ете кешенән дә зирәгерәк һанар.

¹⁷ Талашҡандар араһына ҡыҫылыу – урам этенең ҡолағынан тартыуға тиң.

¹⁸ Аҡылдан шашҡан әҙәм нисек утлы киҫәү ата, үлем сәсә,

¹⁹ яҡынына этлек эшләп, «Мин шаярттым ғына», – тигән кеше лә шулай булыр.

²⁰ Утын бөтһә, усаҡта ут һүнә; ғәйбәтсе булмаған ерҙә ғауға тына.

²¹ Ҡыҙыулыҡ өсөн күмер, ут өсөн утын нисек булһа, Ыҙғышты ҡыҙҙырыу өсөн ғәйбәтсе шулай.

²² Ғәйбәтсенең һүҙе – тәмле тәғәм, кешенең эс-бауырына үтеп инә.

²³ Теле йомшаҡ, күңеле тулы яуызлыҡ булған кеше ялтырауыҡ ялатылған балсыҡ көршәк ише.

²⁴ Ҡара уйлы әҙәмдең теле юха, ләкин күңелендә мәкер ята.

²⁵ Тауышының яғымлылығына ышанма, йөрәгендә ете ҡәбәхәтлек йәшеренгән.

²⁶ Нәфрәтен хәйлә аҫтында йәшерһә лә, яуызлығы йыйын алдында асылыр.

²⁷ Кешегә соҡор ҡаҙған – үҙе төшөр, таш тәгәрәткән – уның аҫтында ҡалыр.

²⁸ Ялған телле үҙ ҡорбандарын яратмай, юха телленең ауыҙында һәләкәт ята.