Әйтемдәре 22 - Изге Яҙма

¹ Яҡшы исем – ҙур байлыҡтан, абруй алтын-көмөштән ҡиммәт.

² Бай һәм ярлы йәнәш баҫыр – һәр ҡайһыһын Раббы яратҡан.

³ Зирәк, хәүефте алдан күрер ҙә, йәшенер, бер ҡатлы һаман алға бара бирер ҙә, зыян күрер.

⁴ Тыйнаҡлыҡ һәм Раббынан ҡурҡыуҙың нәтижәһе – байлыҡ, хөрмәт, имен тормош.

⁵ Залимдың юлын сәнскәк менән тоҙаҡ һағалай; ғүмерен ҡайғыртҡан унан йыраҡ йөрөр.

⁶ Балаңа лайыҡлы юлды йәштән өйрәт – ҡартайғас та шул юлдан тайпылмаҫ.

⁷ Бай ярлылар өҫтөнән хакимлыҡ итер, бирәсәккә алған – биреүсегә ҡол.

⁸ Ғәҙелһеҙлек сәскән – бәлә урған, уның асыу ҡамсыһы юҡҡа сығыр.

⁹ Миһырбанлы кеше фатихалы булыр, сөнки ул үҙ икмәген ярлы менән бүлешә.

¹⁰ Әҙәпһеҙҙе ҡыуып ебәр – ыҙғыш китер, янъял менән талаш тыныр.

¹¹ Күңел сафлығын яратҡан, телендә гел яғымлы һүҙ булғанды батша ла үҙенә дуҫ һанар.

¹² Раббы күҙе ғилемде һаҡлай, хыянатсы бәндәнең һүҙҙәрен бушҡа сығара.

¹³ Ялҡау әҙәм: «Урамда арыҫлан! Тышҡа сыҡһам, мине үлтерерҙәр», – тиер.

¹⁴ Ят ҡатындың ауыҙы – төпһөҙ упҡын, Раббы ҡәһәрләгән шунда ҡолап төшөр.

¹⁵ Бала башындағы иҫәрлекте тәртип сыбығы тиҙ ҡыуып сығарыр.

¹⁶ Байлыҡ арттырыр өсөн ярлыны рәнйетеүсе, байға ришүәт биреүсе бөлгөнлөккә төшөр.

Аҡыл эйәләренең кәңәштәре

¹⁷ Ҡолағыңды ас та аҡыллылар һүҙен тыңла, минең белемемә күңел һал.

¹⁸ Уларҙы йөрәк түреңдә һаҡлаһаң, улар һәр саҡ ауыҙыңда булһа, һиңә йыуаныс булыр.

¹⁹ Раббыға өмөт бағлап йәшәр өсөн, бөгөн уларҙы һиңә өйрәтәм.

^20-21 Ысын хәҡиҡәт һүҙҙәрен һиңә өйрәтергә, һине ебәргәндәргә уларҙы еткермәккә һинең өсөн утыҙ нәсихәт яҙҙым, һин уларҙан кәңәш, ғилем табырһың.

²² Былай ҙа мохтаж булған ярлыны талама, йәберләнгәнде хөкөм алдында ҡыҫма;

²³ сөнки уларҙың дәғүәләрен Раббы хәл итер, уларҙы талағандарҙың йәнен ҡыйыр.

²⁴ Тиҙ асыуланған менән аралашма, ҡыҙыу бәндә менән юлдаш булма.

²⁵ Юҡһа улар юлына төшөрһөң, йәнеңде ауға эләктерерһең.

²⁶ Ҡул биреп, кеше бурысын үҙ өҫтөңә алыусыларҙан булма.

²⁷ Юҡһа, түләр хәлең ҡалмағас, аҫтыңдағы түшәгеңде лә алырҙар.

²⁸ Ата-бабаң ҡуйып ҡалдырған боронғо ыҙан ташын күсермә.

²⁹ Үҙ эшенең оҫтаһын күргәнең бармы? Ул ябай кешеләргә түгел, батшаларға хеҙмәт итер.