Әйтемдәре 20 - Изге Яҙма

¹ Шарап – мәсхәрәгә ҡалдыра, хәмер – шаштыра, уларға алданғандар – ахмаҡ.

² Батшаның ярһыуы – гүйә арыҫлан ырылдауы, ҡыҙҙырма уны – үҙеңде хәүефкә ҡуйырһың.

³ Талаш-тартыштан йыраҡ торған кешегә хөрмәт, ә һәр ахмаҡ ғауға сығарыр.

⁴ Ялҡау көҙөн ерен һөрмәй, ураҡ мәлендә буш баҫыуҙы һәрмәй.

⁵ Кеше башындағы уй-ниәттәр – тәрән йылға, аҡыллы кеше унан һоҫоп-һоҫоп алыр.

⁶ «Тоғромон», – тип күптәр һөрән һала, ләкин таянырлыҡ иптәш табырһыңмы?

⁷ Тәҡүә кеше хәләл донъя көтә, үҙенән һуң килгән нәҫеле лә бәхетле булыр.

⁸ Хөкөм тәхетендә ултырған батша үҙ күҙе менән бөтә яманлыҡты ҡыуып таратыр.

⁹ «Күңелемдә һис бысраҡлыҡ юҡ, гонаһымдан инде таҙарындым», – тип кем әйтә алыр?

¹⁰ Иңен-буйын, ауырлығын алдап үлсәү – икеһе лә Раббы алдында әшәкелек.

¹¹ Хатта йәш баланы – холҡонан, сафлығын һәм тоғролоғон эштәренән белеп була.

¹² Ишетер ҡолаҡты ла, күрер күҙҙе лә Раббы бар ҡылған.

¹³ Күп йоҡлаһаң, ас ҡалырһың, күҙ йоммаһаң, өҫтәлең һыйлы булыр.

¹⁴ «Тауарың насар, насар», – ти һатып алыусы, ә китеү менән – маҡтана.

¹⁵ Алтын да бар, аҫылташтар ҙа, ләкин иң ҡиммәтлеһе – белемле тел.

¹⁶ Ят кеше өсөн үҙенә яуаплылыҡ йөкмәгәндең кейемен ал, уны үҙеңә рәһен итеп ҡалдыр.

¹⁷ Нахаҡ юл менән табылған икмәк башта тәмле булһа ла, аҙаҡ ауыҙы тулы таш булыр.

¹⁸ Маҡсат ҡорғанға тиклем башҡалар менән кәңәшләш, һуғышҡа ла кәңәшләшмәйенсә сыҡма.

¹⁹ Ғәйбәт һөйләгән – серҙәрҙе лә асҡан, ауыҙында һүҙ тотмаған менән аралашма.

²⁰ Ата-әсәһенә тел тейҙергән бәндәнең сыраһы төн ҡараңғылығында ҡапыл һүнер.

²¹ Ҡомһоҙлоҡ менән тартып алынған мираҫ ахырҙа бәрәкәт килтермәҫ.

²² «Яуызлыҡ өсөн ҡон ҡайтарам», – тимә, Раббыға тапшыр – Ул һине һаҡлар.

²³ Раббы алдатҡыс герҙәрҙән екһенер, ялған үлсәүҙе Ул хупламай.

²⁴ Кешенең аҙымын Раббы йүнәлтә, шулай икән, кеше үҙенең юлын нисек аңлаһын?

²⁵ Уйламай нәҙер әйтеү, әйткәндән һуң икеләнеп йөрөү – кешенең үҙ-үҙенә ҡорған тоҙаҡ.

²⁶ Аҡыллы батша залимдарҙы иләп айырыр, өҫтәренән һуҡҡыс тәгәрмәсен тәгәрәтер.

²⁷ Әҙәмдең рухы – Раббы шәмелер, күңеленең иң төпкөлдәрен һынар.

²⁸ Батшаны мәрхәмәт менән хаҡлыҡ һаҡлай, тоғролоҡ уның тәхетен тотоп торор.

²⁹ Ҡеүәт – егеттәрҙең ғорурлығы, сал сәстәр иһә – ҡарттарҙың шөһрәте.

³⁰ Йәрәхәт-яра – яуызлыҡтан дауа, йоҙроҡ татыу – кешенең холоҡ-фиғелен төҙәтә.