Әйтемдәре 2 - Изге Яҙма

Аҡыл – Раббынан

¹ Улым, минең һүҙҙәремде тыңлап, бойороҡтарымды күңелеңдә һаҡлаһаң,

² аҡылға ҡолағыңды асып, йөрәгеңде төшөнмәккә йүнәлтһәң,

³ эйе, әгәр белемгә юл асып, зиһенде саҡырһаң,

⁴ уны көмөш эҙләгән һымаҡ, йәшерен хазина һымаҡ эҙләһәң, –

⁵ Раббынан ҡурҡыуҙың мәғәнәһен аңларһың, Алланы танып-белерһең.

⁶ Сөнки бәндәләргә зиһенде Раббы бирә, белем һәм аҡыл Уның ауыҙынан сыға.

⁷ Раббы намыҫлыларға еңеү әҙерләй, Ул хаҡ юлдан йөрөгәндәр өсөн – ҡалҡан.

⁸ Ул ғәҙеллек юлын һаҡлай, тоғроларының һуҡмағын ҡурсалай.

⁹ Шул сағында һин тоғролоҡтоң, ғәҙеллектең, һәр төрлө игелекле юлдың мәғәнәһенә төшөнөрһөң,

¹⁰ сөнки йөрәгеңә аҡыл инеп урынлашыр, ғилем күңелеңде биләп зауыҡландырыр,

¹¹ зирәклек һине ҡурсалар, зиһен һине һаҡлап торор.

¹² Улар һине яман юлдан, әхлаҡһыҙҙың ҡотҡоһонан ҡотҡарыр.

¹³ Ҡараңғылыҡ юлын өҫтөн күреп, тура юлдан тайпылғандарҙан,

¹⁴ яуыз эштәренә шатланған, аҙғынлыҡтарынан тәм тапҡан,

¹⁵ юлдары кәкре булған, үҙ һуҡмаҡтарында аҙашып йөрөгәндәрҙән һаҡлап торор.

¹⁶ Зирәклек һине ят ҡатындан, татлы телле сит ҡатындан ҡотҡарыр.

¹⁷ Был ҡатын йәштән сыҡҡан ирен ташлап, Алла алдындағы антын онотҡан.

¹⁸ Уның өйө – үлемесле тоҙаҡ, йөрөгән юлы үлеләр донъяһына илтә.

¹⁹ Унда кергән кеше кире сыҡмай, йәшәү юлына бүтәнсә аяҡ баҫмай.

²⁰ Шуға күрә һин яҡшылар юлынан бар, иманлылар һуҡмағынан тайпылма,

²¹ сөнки ерҙә намыҫлылар йәшәр; бында тик камилдар ғына тороп ҡалыр,

²² ә яуыздар ерҙән юҡ ителер, мәкерле бәндә төбө-тамыры менән ҡоротолор.