Әйтемдәре 16 - Изге Яҙма

¹ Кеше күңелендә ниәт ҡора, әммә бөтә нәмәгә яуап – Раббынан.

² Кеше бөтә юлдарын да пак тип һанай, ләкин Раббы күңелдәрҙе һынап ҡарай.

³ Эшеңде Раббы ихтыярына тапшыр – уй-ниәттәрең тормошҡа ашыр.

⁴ Раббы һәр нәмәне Үҙ маҡсаты өсөн яратҡан, хатта яуызды ла бәлә көнө өсөн һаҡлар.

⁵ Барса тәкәбберҙәр Раббыға ерәнгес, улар аслан язаһыҙ ҡалмаҫ.

⁶ Мөхәббәт менән тоғролоҡ ғәйептән пакландыра, Раббынан ҡурҡыу гонаһтан тыя.

⁷ Кешенең юлы Раббыға хуш булһа, Раббы уны дошмандары менән дә яраштыра.

⁸ Ғәҙел юл менән табылған әҙ нәмә нахаҡ юл менән ҡаҙанған байлыҡтан яҡшыраҡ.

⁹ Кеше үҙ юлын үҙе һайлай, әммә аҙымдарын Раббы йүнәлтә.

¹⁰ Батша ауыҙында – әүлиә һүҙҙәр, хөкөм сығарғанда ла ул яңылышмаҫ.

¹¹ Дөрөҫ үлсәү – Раббынандыр, үлсәүҙең герҙәрен дә Ул бар ҡылған.

¹² Батшаның яуызлыҡ ҡылыуы – ҡәбәхәтлек, сөнки тәхет ғәҙеллек менән нығытыла.

¹³ Тоғро һүҙ батша өсөн – ҡыуаныс, ул дөрөҫ һөйләгәнде ярата.

¹⁴ Батшаның асыуы – үлем илсеһе, әммә аҡыллы кеше уны тынысландырыр.

¹⁵ Батшаның нурлы ҡарашында тормош бар, уның илтифаты – яҙғы ләйсән.

¹⁶ Зирәклек ҡаҙаныу алтынға эйә булыуҙан, белем ҡаҙаныу саф көмөштән яҡшыраҡ.

¹⁷ Намыҫлының юлы – боҙоҡлоҡтан ситкә тайпылыу; аҙымын белеп баҫҡан – йәнен һаҡлар.

¹⁸ Тәкәбберлек артынан һәләкәт килә, маһайыуҙың һуңы иһә – хурлыҡ.

¹⁹ Тәкәбберҙәр менән табыш бүлешкәнсе, күндәм рухлы булып ярлылар менән йәшәү яҡшы.

²⁰ Өгөткә ҡолаҡ һалған – уңған, Раббыға таянған – бәхеткә ирешкән.

²¹ Күңеле зирәк кешене һиҙгер тиерҙәр, һүҙе яғымлы кеше ғилемен арттырыр.

²² Зиһене бар кеше өсөн аҡыл – тормош шишмәһе, ахмаҡҡа иһә ахмаҡлығы – яза.

²³ Аҡыллының йөрәге теленә зирәклек бирер, әйткәндәрен ышаныслы итер.

²⁴ Татлы һүҙ – баллы кәрәҙ: йәнгә рәхәт, тәнгә сихәт.

²⁵ Ҡайһы бер юл тура булып тойолһа ла, ахыры үлемгә алып килә.

²⁶ Хеҙмәт кешеһе үҙенә үҙе ял бирмәй, сөнки уны ас ҡарыны өндәй.

²⁷ Йүнһеҙ әҙәм боҙоҡлоҡҡа шәп, теле, гүйә, ялмар ялҡын.

²⁸ Мәкерле янъял тыуҙыра, ғәйбәтсе дуҫтарҙы айыра.

²⁹ Залим дуҫын алдар, уны яман юлға этәрер.

³⁰ Күҙен ҡыҫҡан – яман ниәт ҡора, иренен ҡымтыған – яуызлыҡ ҡыла.

³¹ Сал сәс – кешенең тоғро юлда ҡаҙанған шөһрәт тажы.

³² Түҙем әҙәм баһадирҙан көслөрәк, үҙ-үҙенә баш булған кеше ҡала алған яугирҙән ҡөҙрәтлерәк.

³³ Күпме генә йәрәбә һалһаң да, бөтә ҡарар – Раббынан.