Әйтемдәре 12 - Изге Яҙма

¹ Ғилем яратҡан нәсихәтте лә яратыр, шелтәне хуп күрмәгән – аңра ҡалыр.

² Күңеле яҡшыны Раббы хуп күрер, мәкерле кеше Уның хөкөмөнә тарыр.

³ Кеше яуызлыҡ менән нығына алмаҫ, ә тоғроларҙың тамыры ҡоромаҫ.

⁴ Әҙәпле ҡатын – ир башындағы таж, әҙәпһеҙ ҡатын – иренең һөйәгендәге серек.

⁵ Тәҡүәнең маҡсаты – ғәҙеллек, яман әҙәмдең кәңәше – мәкер.

⁶ Яуыздарҙың һүҙҙәре – ҡанлы тоҙаҡ, намыҫлының әйткәне яманлыҡтан ҡотҡара.

⁷ Залимдар йығылып юҡ булыр, тәҡүәләрҙең йорто имен торор.

⁸ Кеше аҡылына күрә маҡталыр, боҙоҡ ниәтле – хурланыр.

⁹ Эре ҡыланып та, тәғәм икмәккә тилмергәнсе, үҙе эшләп ризыҡ тапҡан ябай кеше булыуың яҡшыраҡ.

¹⁰ Игелекле әҙәм хатта малын да ҡайғырта, яман әҙәм иһә мәрхәмәт белмәҫ.

¹¹ Иген иккән икмәккә туйыр, буш-юҡ артынан ҡыуған әҙәм иһә – ахмаҡ.

¹² Боҙоҡ әҙәм башҡа яуыздарҙың байлығын көҫәр, тәҡүә әҙәмдең тамыры үҫенте бирер.

¹³ Яман әҙәм үҙ теленең тоҙағына ҡабыр, дөрөҫлөккә тоғро – бәләнән ҡалыр.

¹⁴ Кеше үҙ һүҙенең емештәре менән игелек табыр, хеҙмәте бүләк булып үҙенә әйләнеп ҡайтыр.

¹⁵ Ахмаҡ үҙ юлын дөрөҫ тип уйлар, аҡыллы әҙәм кәңәшкә ҡолаҡ һалыр.

¹⁶ Ахмаҡтың асыуы йөҙөнә сығыр, аҡыллы хурлауҙы ишетмәмешкә һалышыр.

¹⁷ Намыҫлы шаһит дөрөҫөн һөйләр, ялған шаһиттың ауыҙынан алдаҡ ағылыр.

¹⁸ Мәкерле һүҙ ҡылыс ише яралай, аҡыллының һүҙе дауалай.

¹⁹ Хаҡ һүҙҙең ғүмере – мәңгелек, ялғандың ғүмере – бер күҙ асып йомған ара.

²⁰ Ниәте ямандың күңелендә – мәкер, татыулыҡ яҡлының күңелендә һөйөнөс булыр.

²¹ Тәҡүә кешегә һис ниндәй зарар теймәҫ, яуыз иһә золомға тулышҡан.

²² Ялғансы тел Раббы өсөн ерәнгес, намыҫлы эш иткәндәрҙе Ул күркәм күрә.

²³ Зирәк кеше белемен йәшереп һаҡлар, ахмаҡ әҙәмдең тилелеге алға сығыр.

²⁴ Егәрленең ҡулы етәкселек итер, ялҡаулығы кешене ҡол итер.

²⁵ Хәүеф кешенең йөрәген бөтөрә, яғымлы һүҙ күңелен күтәрә.

²⁶ Тәҡүә кеше яҡынына юл күрһәтер, яуыз иһә юлдан аҙаштырыр.

²⁷ Ялҡау ауына эләккәнде лә бешермәҫ, егәрленең мал-мөлкәте һан белмәҫ.

²⁸ Хаҡлыҡ юлы – йәшәү сығанағы, кем был юл менән бара, унда үлем юҡ.