Әйтемдәре 11 - Изге Яҙма

¹ Алдаҡ үлсәү – Раббы өсөн ерәнгес, ул дөрөҫ герҙәрҙе хуп күрер.

² Тәкәбберлек артынан хурлыҡ килер, тыйнаҡтарға эйәреп аҡыл йөрөр.

³ Намыҫлыны күңел сафлығы етәкләр, мәкерлеләрҙе хәйләһе харап итер.

⁴ Раббының асыу көнөндә байлыҡ ярҙам итмәҫ, әммә тәҡүәлек үлемдән алып ҡалыр.

⁵ Тәҡүәлек менән әҙәп тура юлдан йөрөтөр, яман әҙәмде үҙ боҙоҡлоғо йыға һуғыр.

⁶ Намыҫлыларҙы тәҡүәлеге ҡотҡарыр, мәкерлеләр яман ниәттәренең тоҙағына эләгер.

⁷ Яман әҙәм менән бергә өмөтө лә үлер, боҙоҡтарҙың көткәне аҡланмаҫ.

⁸ Тәҡүә бәлә-ҡазанан ҡотолоп ҡалыр, уның урынына яман әҙәм эләгер.

⁹ Аллаһыҙҙың теле күршеһен һәләк итер, тәҡүәләр белеме менән ҡотолоп ҡалыр.

¹⁰ Тәҡүәгә яҡшы булһа – ҡала байрам итер, яман бәндәләр харап булһа – тантана яһарҙар.

¹¹ Намыҫлының фатихаһы менән ҡала төҙөлөр, яуыздың мәкерле теле арҡаһында емереп ташланыр.

¹² Ахмаҡ кеше яҡынын яманлар, белекле кеше өндәшмәй ҡалыр.

¹³ Ғәйбәтсе кешенең серен асыр, тоғро кеше сер һаҡлай белер.

¹⁴ Өгөт-нәсихәтһеҙ халыҡ юҡҡа сығыр, кәңәшселәре күп халыҡ имен йәшәр.

¹⁵ Кеше бурысын үҙ өҫтөнә алған – бәләгә тарыр, үҙ өҫтөнә алырға ашыҡмаған – тыныс йәшәр.

¹⁶ Һәйбәт күңелле ҡатын хөрмәт ҡаҙаныр, аяуһыҙ иһә байлыҡ йыйыр.

¹⁷ Миһырбанлы әҙәм үҙенә бәрәкәт килтерер, рәхимһеҙ иһә зыянға тарыр.

¹⁸ Яман әҙәмдең ҡаҙанышы – алдатҡыс, игелек иккәндең әжере ышаныслы.

¹⁹ Ихлас тәҡүәлек юлы тормошҡа илтә, яуызлыҡҡа ынтылыусылар үлемгә ашыға.

²⁰ Раббы боҙоҡ күңеллеләрҙән ерәнә, пак юлдан барыусылар Уға ҡыуаныс.

²¹ Хаҡ әйтәм, яман бәндә язаһыҙ ҡалмаҫ, иманлылар тоҡомо ҡоромаҫ.

²² Елбәҙәк ҡатын-ҡыҙҙың сибәрлеге сусҡа моронондағы алтын алҡа һымаҡ.

²³ Иманлының уй-теләге – яҡшылыҡҡа, яуыздың өмөттәре Раббының асыуына килтерер.

²⁴ Ҡайһы берәүҙәрҙең бирергә ҡулы йомарт, әммә байлығы арта бара, ҡайһылар һаран, әммә хәйерселектән ҡотола алмай.

²⁵ Йомарт кеше етеш йәшәр, сарсағанға һыу биреүсенең үҙенә лә һыу бирерҙәр.

²⁶ Ашлығын ҡыҙғанғанды халыҡ ҡәһәрләр, уны ваҡытында һатҡан фатихаланыр.

²⁷ Яҡшылыҡ эҙләгән илтифат табыр, яманлыҡ артынан эйәргән башына бәлә алыр.

²⁸ Байлығына ғына иҫәп тотҡан шиңеп ҡалыр, иманлылар йәшел япраҡ һымаҡ булыр.

²⁹ Ғаиләһенә хәсрәт килтергәндең мираҫы ел булыр, ахмаҡ әҙәм аҡыллыға ҡол булыр.

³⁰ Тәҡүәлек емешенән тормош ағасы үҫеп сыға, аҡыл эйәһе кеше күңелен йәлеп итә.

³¹ Тәҡүә ер йөҙөндә әжерен ала икән, яуыз менән гонаһ эйәһе хаҡында әйтеп тә тораһы түгел.