Зөлкифел 28 - Изге Яҙма

Тирҙың хакимына ҡаршы пәйғәмбәрлек

¹ Миңә Раббы һүҙе булды:

² – Эй әҙәм улы, Тирҙың хакимына әйт! Раббы Хаким былай ти: «Һин тәкәбберләнеп киттең: „Мин – алламын, Диңгеҙҙәрҙең ҡуйынында Алла тәхетендә ултырам“, – тинең. Аҡылың менән үҙеңде Аллаға тиңмен тип һанаһаң да, Һин алла түгел, әҙәмһең.

³ Эйе, Даниилдан аҡыллыраҡһың; Һинән йәшерен бер ниндәй сер юҡ.

⁴ Зирәклегең һәм зиһенең менән Үҙеңә байлыҡ тупланың, Хазина һаҡлағысыңды Алтын-көмөш менән тултырҙың.

⁵ Сауҙаға һәләтең менән Зиннәттәреңде арттырҙың. Әммә байлығың арҡаһында тәкәбберләндең.

⁶ Шуға күрә Раббы Хаким былай ти: Аҡылың менән үҙеңде Аллаға тиңмен тип һанаған өсөн,

⁷ Һиңә ҡаршы Мин яттарҙы, Ҡәүемдәрҙең яуыздарын ебәрәм; Күркәмлегеңә, аҡылыңа ҡаршы улар Ҡылыстарын ҡындан һурасаҡ, Гүзәллегеңде нәжесләйәсәк.

⁸ Һине ҡәбергә төшөрәсәктәр, Һин диңгеҙҙәр ҡуйынында Ҡурҡыныс үлемдән һәләк буласаҡһың.

⁹ Шул саҡ йәнеңде ҡыйыусы ҡаршыһында „Мин – алла“ тип әйтерһеңме? Һине үлтергәндәрҙең ҡулында Һин – алла түгел, әҙәмһең.

¹⁰ Һин яттарҙың ҡулынан Сөннәтһеҙҙәр әжәле менән үлерһең. Мин, Раббы, әйттем быны», – тип белдерә Раббы Хаким.

Тир батшаһының ҡолаясағы тураһында

¹¹ Миңә Раббы һүҙе булды:

¹² – Эй әҙәм улы, Тир батшаһы тураһында һыҡтау йыры йырла. Әйт уға, Раббы Хаким былай ти: «Һин камиллыҡтың мөһөрө, Аҡылдың бөтөнлөгө, Гүзәллектең тажы инең.

¹³ Һин Ғедәндә – Алла баҡсаһында – инең; Аҫыл таштар менән биҙәлгәйнең: Ҡыҙыл яҡут, хризолит, алмас, Һары яҡут, оникс, йәшмә, Зәңгәр яҡут, фирүзә һәм зөбәржәт – Барыһы ла алтын менән тирәсләнгән. Улар яратылған көнөңдә үк әҙер ине.

¹⁴ Һине, ҡанаттары йәйелгән кирубты, Ҡурсалаусы итеп билдәләнем, Алланың изге тауында булдың, Янар таштар араһында гиҙҙең.

¹⁵ Яратылған көнөңдән алып, Яуызлығың табылғанға тиклем Һин тоғро юлдан йөрөнөң.

¹⁶ Сауҙаң арта барған һайын Яуызлыҡҡа тулдың, гонаһ ҡылдың. Шуға күрә нәжес әйбер кеүек Һине Алла тауынан бырғаным, Янар таштар араһынан ҡыуҙым Эй һин, ҡурсалаусы кируб!

¹⁷ Матурлығыңа маһайып эреләндең, Балҡышыңдан юйылды аҡылың. Шуға күрә һине ергә бәрҙем; Батшалар алдында хур иттем.

¹⁸ Һин үҙеңдең сикһеҙ гонаһтарың, Сауҙаңдағы күп ғәҙелһеҙлегең менән Изге урындарыңды нәжесләнең. Мин эсеңдән ут сығарҙым – Ул һине яндырып юҡ итте. Барыһының күҙ алдында Һине көлгә әйләндерҙем.

¹⁹ Һине белгән бар халыҡтар Һәләкәтеңә тетрәнде. Ахырың ҡурҡыныс булды, Һин мәңгегә юҡҡа сыҡтың».

Сидон ҡалаһына ҡаршы пәйғәмбәрлек

²⁰ Миңә Раббы һүҙе булды:

²¹ – Эй әҙәм улы, йөҙөңдө Сидонға табан бор, уға ҡаршы пәйғәмбәрлек ит.

²² Әйт, Раббы Хаким былай ти: «Мин һиңә, эй Сидон, ҡаршы сығам! Һинең эсеңдә дан ҡаҙанасаҡмын: Һиндә йәшәгәндәрҙе язалағас, Үҙемдең мөҡәддәслегемде танытҡас, Раббы икәнемде беләсәктәр.

²³ Мин һиңә ҡырғын ебәрәсәкмен, Урамдарыңда ҡан ағыҙасаҡмын. Һәр яҡтан эҙәрләүсе ҡылыстан ҡырылғандар Ҡала уртаһында йығыласаҡ. Шунда Минең Раббы икәнемде бөтәһе лә беләсәктәр».

Алланың Исраил халҡына вәғәҙәһе

²⁴ – Бынан ары Исраил халҡының осло сәнскәк, энәле күгән һымаҡ яралаусы, уға ерәнеп ҡараусы күршеләре булмаясаҡ. Шунда улар Минең Раббы Хаким икәнемде беләсәктәр.

²⁵ Раббы Хаким былай ти: «Халыҡтар араһына һибеп таратҡан Исраил халҡын йыйып алып, ҡәүемдәрҙең күҙ алдында Үҙемдең мөҡәддәслегемде танытҡас, улар Мин ҡолом Яҡупҡа биргән ерҙәрендә йәшәйәсәк.

²⁶ Мин уларға ерәнеп ҡараған барлыҡ халыҡтарҙы хөкөм иткәндән һуң, унда хәүефһеҙ йәшәрҙәр, йорттар төҙөрҙәр, йөҙөм баҡсалары үҫтерерҙәр – имен-аман ғүмер итерҙәр. Шунда улар Минең Раббы, уларҙың Аллаһы икәнемде беләсәктәр».