Зөлкифел 27 - Изге Яҙма

Тир ҡалаһы өсөн һыҡтау

¹ Миңә Раббы һүҙе булды:

² – Инде һин, эй әҙәм улы, Тир ҡалаһы тураһында һыҡтау йыры йырла.

³ Диңгеҙ буйындағы илдәр, күп халыҡтар менән сауҙа иткән, диңгеҙ ҡапҡаһында урынлашҡан Тир ҡалаһына әйт, Раббы Хаким былай ти: «Эй Тир! „Гүзәллектә мин камилмын“, – тинең.

⁴ Диңгеҙҙәр ҡуйынында ине биләмәң. Төҙөүселәрең күркәмлегеңде камил иткән.

⁵ Барлыҡ таҡталарыңды Сенир кипаристарынан яһанылар. Мачтаңды эшләү өсөн Ливандан кедр алдылар.

⁶ Ишкәктәрең – Башан имәненән; Палубаң фил һөйәге менән биҙәлгән, Киттим ярҙарынан килтерелгән Кипарис ағасынан яһалған.

⁷ Елкәндәрең Мысырҙың нағышлы нәфис етененән ине, Улар һиңә байраҡ булып хеҙмәт итте. Япмаларың Әлиша ярҙарынанкилтерелгән Зәңгәр, ҡарағусҡыл ҡыҙыл туҡыманан булды.

⁸ Ишкәксене Сидон менән Аруадтан ялланың; Үҙеңдәге оҫта әҙәмдәрең, эй Тир, Кәмәселәрең булды.

⁹ Кәмә ярыҡтарын ямар өсөн Гевалдың тәжрибәле оҫталары бар ине. Диңгеҙҙәге барса кәмәләр һәм диңгеҙселәр Алыш-биреш өсөн һиңә килде.

¹⁰ Фарсы, Луд, Пут яугирҙәре Ғәскәреңдә хеҙмәт итте. Ҡалҡандарын, торҡаларын Ҡабырғаларыңа аҫтылар, Һиңә йәм өҫтәнеләр.

¹¹ Аруад һәм Хейлех улдары Диуарҙарыңды һаҡланы. Ғаммадтар манараларыңда торҙо. Диуарҙарыңды уратып, ҡалҡандарын элде, Күркәмлегеңә биҙәк өҫтәне.

¹² Һәр төрлө байлығың күп булғанға, Таршиш һинең менән сауҙа итте. Тауарҙарың өсөн көмөш, Тимер, аҡ һәм ҡара ҡурғаш бирҙе.

¹³ Яуан, Тувал һәм дә Мәшәх Һинең менән сауҙа итте. Тауарҙарыңды ҡолдарға, Баҡыр һауыт-һабаға алмашты.

¹⁴ Бейт-Тогарма халҡы тауарҙарың өсөн Йылҡы малы, яу аттары һәм ҡасырҙар бирҙе.

¹⁵ Дедандар һинең менән сауҙалашты. Яр буйҙарының күп халыҡтары алыш-биреш итте. Һинән алғандарға яуап итеп, Фил һөйәге, ҡара ағас килтерҙе.

¹⁶ Тауарҙарың күп булғанға күрә, Арам һинең менән сауҙа итте. Әйберҙәрең өсөн ҡарағусҡыл ҡыҙыл, Нағышлы һәм нәфис етен туҡымалар, Фирүзә, мәрйен һәм ҡыҙыл яҡут бирҙе.

¹⁷ Йәһүҙә һәм Исраил сауҙа итте: Тауарҙарың өсөн Минниҫ бойҙайы, Татлы ризыҡ менән бал, Зәйтүн майы менән бәлзәм бирҙе.

¹⁸ Сикһеҙ байлыҡтарың, тауарҙарың мул булғанға Һинең менән Дамаск сауҙа ҡорҙо: Хелбон шарабы менән Сахар йөнө һатты,

¹⁹ Узалдың мискәле шарабы менән түләне. Һиңә килтерелгән тауар араһында Сүкелгән тимер, кассия, Хуш еҫле ҡамыш бар ине.

²⁰ Дедан һинең тауарҙарың өсөн Эйәр япмалары бирҙе.

²¹ Ғәрәбстан сауҙагәрҙәре, Ҡыдар хакимдары Һинең сауҙалашың булды: Бәрәс, һарыҡ, кәзә тәкәләре менән алыш-биреш итте.

²² Шева һәм Рағма сауҙагәрҙәре Хуш еҫле матдәләрҙең иң яҡшылары, Аҫыл таштар менән һатыу итте, Тауарҙарың өсөн алтын бирҙе.

²³ Харан, Канне, Ғеден ҡалалары, Шева сауҙагәрҙәре, Ашшур, Килмад сауҙа итте.

²⁴ Улар баҙарҙарыңда Затлы кейемдәр, сыбар келәмдәр, Нағышлы зәңгәр туҡымалар, Ҡаты итеп ишелгән арҡандар һатты.

²⁵ Таршиш караптары тауарҙарыңды ташыны. Диңгеҙҙәр уртаһында байыҡтың, Дан-шөһрәт ҡаҙандың.

²⁶ Ишкәкселәрең һине асыҡ диңгеҙгә алып инде. Көнсығыш елдәре иһә Диңгеҙҙәр ҡуйынында емереп ташланы.

²⁷ Байлыҡтарың, тауарҙарың, мал-мөлкәтең, Диңгеҙселәрең һәм кәмәселәрең, Ярыҡтарыңды ямаусы оҫталар, Сауҙагәрҙәрең, һуғышсыларың, Һиндәге барса халыҡ Һиңә ҡаза килгән көндә Диңгеҙ төбөнә китәсәк.

²⁸ Кәмәселәреңдең ҡысҡырыуынан Яр буйҙары тетрәйәсәк.

²⁹ Ишкәкселәр кәмәләрҙе ташлар; Диңгеҙселәр, кәмәселәр ярға сығыр.

³⁰ Ҡысҡырышып, һыҡтап, һинең өсөн Улар әсенешеп илар. Баштарына тупраҡ һибеп, Көлдә аунай-аунай ҡайғырыр.

³¹ Баштарын тап-таҡыр итеп ҡырыр, Ҡайғы кейемен кейер. Һинең өсөн хәсрәтләнеп, Әрнеп-әрнеп йәш түгер.

³² Улар иңрәп һинең өсөн илар, Ҡайғырышып һыҡтау йыры һуҙыр: „Диңгеҙ уртаһында емерелгән Тир ҡалаһы кеүек тағы бармы?“

³³ Тауарҙарың диңгеҙҙәр аша килгәндә, Бик күп халыҡтарҙың тамағын туйҙырҙың. Сикһеҙ зиннәттәрең, сауҙаң менән Донъялағы батшаларҙы байыттың.

³⁴ Инде һине диңгеҙ тәрәнлеге емергәс, Тауарҙарың һәм һиндәге кешеләрең Үҙең менән бергә һыу төбөнә китте.

³⁵ Диңгеҙ буйы халыҡтарының барыһы Һинең тәҡдиреңә тетрәнде. Уларҙың батшаларының ҡото осто, Ҡурҡыштан сырайҙары боҙолдо.

³⁶ Халыҡтарҙың сауҙагәрҙәре һыҙғырҙы, Ахырың ҡурҡыныс булды, Һин мәңгегә юҡҡа сыҡтың».