Зөлкифел 19 - Изге Яҙма

Исраил хакимдары өсөн һыҡтау

¹ – Ә һин Исраил хакимдары өсөн һыҡтау йырлап әйт:

² «Нимә ине һинең әсәң? Арыҫландар араһында бер инә арыҫлан! Ул йәш арыҫландар араһында ятыр, Балаларын үҫтерер ине.

³ Балаларының береһен ҙурайтҡайны, Ул йәш арыҫланға әйләнде, Ҡорбанын йыртҡысларға өйрәнде – Кешеләр ашаны.

⁴ Ҡәүемдәр уның хаҡында ишеттеләр; Арыҫланды үҙҙәре ҡаҙған соҡорға төшөрҙөләр. Моронона ырғаҡ ҡаҙап Уны Мысырға һөйрәкләнеләр.

⁵ Инә арыҫлан, уны көтөп, өмөтөн юйғас, Балаһының икенсеһен алды, Уны йәш арыҫлан итеп үҫтерҙе.

⁶ Был бала йәш арыҫландар араһында йөрөнө, Ул да йәш арыҫлан булды. Табышын йыртҡысларға өйрәнде – Кешеләр ашаны.

⁷ Уларҙың ҡәлғәләрен емерҙе, Ҡалаларын харабаға әйләндерҙе; Илдә йәшәгән барыһы Уның ырылдауынан ҡурҡыуға төштө.

⁸ Шул саҡ тирә-яҡ ерҙәрҙең кешеләре Уға ҡаршы күтәрелде. Өҫтөнә ау ташланы, Уны тоҙаҡтарына төшөрҙө.

⁹ Уны, ырғаҡ менән эләктереп, Ситлеккә ултырттылар, Бабил батшаһына килтерҙеләр; Тауышы Исраил тауҙарында Башҡаса ишетелмәһен тип, Уны бик аҫтында тоттолар.

¹⁰ Һинең әсәң һыу буйындағы баҡсала Үҫкән бер йөҙөм ағасы һымаҡ ине. Мул һыуҙарҙан тәлгәше суҡ булды, Емеше уңды.

¹¹ Ботағы батшаға хакимлыҡ таяғы Яһарлыҡ кимәлдә көслө ине. Ҡуйы япраҡтары араһында Олоно болоттарға олғашты. Бейеклеге, суҡлығы менән айырылып торҙо.

¹² Әммә уны, асыу менән Йолҡоп сығарып, ергә аттылар. Шәреҡ еле уны ҡоротто, Емештәре йолҡоп алынды, Көслө ботаҡтары һулыны, Уларҙы ут ялманы.

¹³ Инде сүлгә, Һыуһыҙ ҡоро ергә күсерелде.

¹⁴ Олононан ут сыҡты ла Емештәрен ялмап алды, Хакимлыҡ таяғы булырлыҡ Көслө ботағы ҡалманы». Был – һыҡтау йыры, ул һыҡтау йыры булып ҡаласаҡ.