Зәкәрьяһ 9 - Изге Яҙма

Исраилдың дошмандарына яза

¹ Әүлиәлек. Раббы һүҙе Хадрах еренә һәм Дамаскка йүнәлтелгән. Ысынлап та кешелектең, Бөтә Исраил ырыуҙарының күҙе Раббыға төбәлгән.

² Был һүҙ Хадрах менән сиктәш Хамаҫ ҡалаһына, Халыҡтары үҙҙәрен аҡыллыға һанаған Тир менән Сидон ҡалаларына ла ҡағыла.

³ Тир үҙенә бер ҡәлғә төҙөнө; Саң-туҙан ҡәҙәрле көмөш, Урамдағы балсыҡ саҡлы саф алтын йыйҙы.

⁴ Бына бөйөк Хаким уның байлығын тартып алыр, Мал-мөлкәтен диңгеҙгә ырғытыр; Ә үҙен ут тотош ялмап йотор.

⁵ Быны күреп Ашҡылондың ҡото осор; Газа ла ҡалтырап төшөр; Ғәҡрон ҡурҡыр, сөнки өмөтө аҡланмаҫ; Газа батшаһыҙ ҡалыр; Ашҡылонды бер кем төйәк итмәҫ.

⁶ Ашдодта ҡатнаш ҡанлылар төйәкләнер. «Пелештиҙәрҙең ғорурлығын ҡырырмын Мин.

⁷ Ауыҙҙарынан ҡанлы итте алып ташлармын, Теш араһынан хәрәм ризыҡтарын тартып алырмын. Иҫән ҡалғандары Йәһүҙәләге һәр нәҫел һымаҡ Аллабыҙҙыҡы булып һаналыр. Ғәҡрон йевусиҙәр кеүек йәшәр.

⁸ Мин Үҙемдең ҡорамым янында һаҡта торам: Инде һис кем унда-бында үтеп йөрөмәҫ, Бер кем халҡымды йәберләй алмаҫ, Инде Үҙемдең күҙҙәрем унда булыр».

Вәғәҙә ителгән батша

⁹ Шатлан, шатлан, эй Сион-ҡыҙ! Йәрүсәлим-ҡыҙ, ҡыуаныслы ауаздар һал! Ҡара, батшаң килә һиңә табан; Ул – тәҡүә, еңеүсе, тыйнаҡ-күндәм, Ишәккә менгән, бала ишәккә.

¹⁰ «Әфраимдың яу арбаларын, Йәрүсәлимдең аттарын юҡ итермен. Һуғыш йәйәләре һыныр. Батша халыҡтарға тыныслыҡ иғлан итер; Хакимлығы бер диңгеҙҙән икенсе диңгеҙгә, Евфраттан ер сигенә тиклем йәйрәп ятыр.

¹¹ Ә һеҙгә килгәндә, Арабыҙҙа ҡорбан ҡаны менән беркетелгән килешеү хаҡына Һөргөндәге халҡығыҙҙы Һыуһыҙ соҡорҙан сығарып азат ҡылам.

¹² Ҡәлғәләрегеҙгә ҡайтығыҙ, Эй һеҙ, өмөтө тере әсирҙәр! Күргән ғазаптарың өсөн бөгөн, Сион, һиңә икеләтә фатиха иғлан итәм.

¹³ Йәһүҙәне йәйәмде киргәндәй кирәм; Ә Әфраимды уҡ итеп уға терәйем. Улдарыңды, Сион, Яуан улдарына ҡаршы аяҡҡа баҫтырам, Һине яугирҙең ҡылысы итәм».

¹⁴ Раббы халҡы өҫтөндә пәйҙә булыр; Уғы йәшен кеүек осоп сығыр. Раббы Хаким борғоһон ҡысҡыртыр, Көньяҡтан ғәрәсәт булып килер.

¹⁵ Күк ғәскәрҙәре Раббыһы Үҙ халҡын яҡлар. Улар дошмандарын тар-мар итер, Һапҡысыларҙы юҡҡа сығарыр, Шарап эсеп иҫергән һымаҡ геүләшер, Ҡорбан ҡаны тулған сеүәтәләр кеүек булыр, Ҡорбан усағының мөйөштәреләй ҡанға мансылыр.

¹⁶ Ул көн Аллалары Раббы Үҙенең халҡын ҡотҡарыр, Һарыҡ көткәндәй уларҙы әйҙәп йөрөр. Уның ерендә таждағы ҡаш һымаҡ балҡырҙар.

¹⁷ Ниндәй күркәм һәм мул буласаҡ ил! Йәш егеттәр менән ҡыҙҙар туйғансы икмәк ашап, Яңы шарап эсеп, һау-сәләмәт үҫер.