Зәбүр 98 - Изге Яҙма

¹ Раббы – батша! Ҡалтырап торһон халыҡтар! Ул – кирубтар өҫтөндәге тәхетендә, Әйҙә тетрәнһен ер йөҙө!

² Сионда Раббы бөйөк, Ул бөтә халыҡтарҙан да өҫтөн.

³ Данлаһындар бөйөк һәм дәһшәтле исемеңде. Ул мөҡәддәс!

⁴ Эй ғәҙеллек һөйгән ҡөҙрәтле Батша, Һин дөрөҫлөктө урынлаштырҙың. Яҡуп илендә ғәҙеллеккә, Хаҡлыҡҡа нигеҙләнгән ғәмәлдәр ҡылаһың.

⁵ Ололағыҙ Аллабыҙ Раббыны, Аяғына йығылып сәждә ҡылығыҙ! Ул мөҡәддәс!

⁶ Ҡаһиндары араһында – Муса менән Һарун, Шемуил да Уны саҡырғандар менән бергә. Улар Раббыға ялбарҙы, Ә Раббы яуап ҡайтарҙы.

⁷ Ул болот бағанаһы эсенән һөйләште. Уның күрһәтмәләре менән йәшәнеләр, Биргән ҡағиҙәһен һаҡланылар.

⁸ Раббы, Аллабыҙ, уларға яуап ҡайтара инең; Ғәмәлдәренә күрә яза бирһәң дә, Ярлыҡаусы Алла булдың.

⁹ Ололағыҙ Аллабыҙ Раббыны! Уға сәждә ҡылығыҙ изге тауында, Сөнки Аллабыҙ Раббы мөҡәддәс!