Зәбүр 97 - Изге Яҙма

1 Мәҙхиә.

¹ Мәҙхиә. Раббыға яңы йыр йырлағыҙ, Сөнки мөғжизәләр ҡылды; Уң ҡулы, мөҡәддәс беләге менән еңеү ҡаҙанды.

² Раббы Үҙенең ҡотҡарыуын белдерҙе, Ҡәүемдәргә хаҡлығын күрһәтте.

³ Исраил нәҫеленә булған мөхәббәтен, Тоғролоғон онотманы; Ер йөҙөнөң һәр тарафы Аллабыҙҙың ҡотҡарыуын күрҙе.

⁴ Бөтә донъя, сәләмлә Раббыны! Күңел ас, шатлан һәм йырла!

⁵ Лирала уйнап, йырлағыҙ Раббыға, Уны маҡтап мәҙхиә һуҙығыҙ!

⁶ Борғо һәм мөгөҙ ауазы яңғыратып Раббы-Батша хозурында тантана итегеҙ.

⁷ Шаулаһын диңгеҙ һәм унда йәшәгәндәр, Донъя һәм уны төйәк иткәндәр.

⁸ Йылғалар алҡышлаһын, Шатланһындар бергәләшеп тауҙар

⁹ Раббы хозурында! Ул ер йөҙөн хөкөм итергә килә. Ул донъяға ғәҙелдәрҙән-ғәҙел, Халыҡтарға хаҡтан-хаҡ хөкөмөн ҡыла.