Зәбүр 94 - Изге Яҙма

¹ Килегеҙ, Раббыға һөйөнөшөп өндәшәйек, Беҙҙе ҡотҡарыусы ҡаябыҙға Ҡыуанышып йырлашайыҡ.

² Алдына баҫайыҡ шөкөрана ҡылып; Шатлыҡлы йырыбыҙҙы бағышлайыҡ!

³ Сөнки Раббы – бөйөк Алла, Барса илаһтар өҫтөнән бөйөк Батша.

⁴ Ерҙең тәрәнлектәре Уның ҡулында, Тау түбәләре Уның ихтыярында.

⁵ Уныҡы Үҙе яратҡан диңгеҙ ҙә, Ҡулы бар ҡылған ҡоро ер ҙә.

⁶ Килегеҙ, сәждә ҡылайыҡ, бөгөләйек, Беҙҙе бар ҡылған Раббы алдында теҙ сүгәйек.

⁷ Сөнки Ул – беҙҙең Аллабыҙ; Беҙ – Уның көтөүендәге халыҡ, Ҡулының аҫтындағы ҡуйҙарбыҙ. Әгәр ҙә бөгөн Уның тауышын ишетәһегеҙ икән,

⁸ Тиҫкәре булмағыҙ Меривалағылай, Теге заман сүлдә, Массалағы, һымаҡ.

⁹ Унда аталарығыҙ Мине һынап маташты, Һынанылар ҙа ҡылған эштәремде күрҙеләр.

¹⁰ Ҡырҡ йыл буйы ул быуындан йөҙ борҙом Мин. Әйттем: «Улар – күңелдәре аҙашҡан бер халыҡ, Юлдарымды танымайҙар».

¹¹ Шуға күрә асыуланып Мин ант иттем: «Улар Минең тыныс-имен урыныма Бер ҡасан да инмәйәсәк!»