Зәбүр 93 - Изге Яҙма

¹ Йә Раббы, эй үс алыусы Алла! Үс алыусы Алла, сәс нурыңды!

² Ҡалҡ Һин, донъяның Хөкөмдары, Тәкәбберҙәргә бир хаҡ язаңды!

³ Раббы, ҡасанғаса был залимдар, Ҡасанғаса тантана итерҙәр?

⁴ Ауыҙҙарынан ағыла хаяһыҙлыҡ, Яуызлыҡ ҡылалар ҙа маҡтаналар.

⁵ Эй Раббы, улар халҡыңды иҙә, Биләмәңә Һинең золом ҡыла.

⁶ Тол ҡатынды, килмешәкте үлтерәләр, Етем-еһерҙе ҡыралар.

⁷ Улар әйтә: «Раббы күрмәҫ, Яҡуп Аллаһы бер ни ҙә белмәҫ».

⁸ Эй алйоттар, аҡылығыҙға килегеҙ! Эй наҙандар, ҡасан һеҙгә аҡыл инер?

⁹ Ҡолаҡты бар ҡылыусы ишетмәйме ни? Күҙҙәрҙе яратыусы күрмәйме?

¹⁰ Халыҡтарға өгөт-нәсихәт биреүсе, Кешеләргә өйрәтеүсе яза сығармаҫмы?

¹¹ Раббы белә кешенең уйҙарын: Улар буп-буш, мәғәнәһеҙ.

¹² Йә Раббы, ниндәй бәхетле Һинең өгөт-нәсихәтеңде алғандар, Һинең ҡануныңды өйрәнгәндәр.

¹³ Залимдарға соҡор ҡаҙылғанға тиклем, Һин уларҙы яман көндәрҙән имен һаҡлайһың.

¹⁴ Сөнки Раббы халҡын Үҙенән ситкә тибәрмәҫ, Үҙенең биләмәһен ташламаҫ.

¹⁵ Хөкөм йәнә ғәҙел булыр, Саф йөрәклеләр хаҡлыҡ артынан барыр.

¹⁶ Кем мине залимдарҙан ҡурсалар? Кем яуыздарға ҡаршы көрәштә эргәмдә торор?

¹⁷ Әгәр Раббы ярҙамсым булмаһа, Йәнем күптән күсер ине тын донъяға.

¹⁸ «Бына-бына аяғым тайыр!» – тигән заманда, Йә Раббы, тоғро мөхәббәтең таяныс булды.

¹⁹ Эсем тулы ҡайғы-хәсрәт булған саҡта Йыуатыуың күңелемде шатландыра.

²⁰ Ҡанундар сығарып золом ҡылған яуыз хөкөмдарҙар, Раббы, Һиңә яҡын булырмы һуң?

²¹ Уларҙың өйөрҙәре тәҡүәгә ташлана, Ғәйепһеҙ йәнде үлемгә хөкөм итә.

²² Әммә Раббы миңә ҡәлғә булды, Ышыҡланыр ҡаям булды Алла.

²³ Залимдарҙың яуыз эшен үҙ баштарына төшөрөр, Енәйәттәренә күрә һәләк итер, Аллабыҙ Раббы уларҙы ҡырып ташлар.