Зәбүр 87 - Изге Яҙма

¹ Ҡорах улдарының мәҙхиәһе. Йыр. Йырсылар етәксеһенә: «Махалаҫ» көйөнә. Ҡара-ҡаршы йыр. Әзрах нәҫеленән булған Һемандың уйланыуҙары.

² Йә Раббы, мине ҡотҡарған Алла, Көнөн-төнөн Һиңә ялбарамын!

³ Доғам хозурыңа барып етһен, Ҡолаҡ һал ялбарыуыма.

⁴ Ҡайғы-хәсрәтем боғаҙыма тығылды, Йәнем үлеләр донъяһына яҡынлашты.

⁵ Ҡәбергә төшкәндәргә иш булдым, Һис тәҡәтһеҙ тороп ҡалдым.

⁶ Үлектәр араһына ташланған, Һин башҡаса иҫеңә алмаған, Инде бөтөнләй ҡулыңдан төшкән, Ҡәберҙә ятҡан мәйеттәй булдым,

⁷ Мине тәрән соҡор төбөнә һалдың, Ҡараңғылыҡҡа, упҡынға аттың.

⁸ Башыма төштө асыуың, Тулҡындарың менән иҙҙең. Села

⁹ Яҡындарымды алыҫлаштырҙың, Улар күҙендә ерәнгес иттең. Бикле ҡалдым да сыға алмайым.

¹⁰ Хәсрәтемдән күҙ нурҙарым һүнде, Һәр көн Һиңә ялбарамын, Раббы, Ҡулдарымды Һиңә һонамын.

¹¹ Мөғжизәләреңде мәйеттәргә күрһәтәсәкһеңме? Үлектәр тороп Һине данлармы? Села

¹² Тоғро мөхәббәтең хаҡында ҡәберҙә, Тоғролоғоң тураһында Һәләкәт урынында һөйләнерме?

¹³ Ҡараңғылыҡта хикмәттәреңде кем күрер? Ғәҙеллегеңде онотолоу донъяһында кем белер?

¹⁴ Мин иһә, йә Раббы, ярҙамға саҡырам Һине; Доғам иртә таңдан Һиңә олғашыр.

¹⁵ Ни өсөн мине ситкә тибәһең, Раббы, Ниңә Һин минән йөҙөңдө йәшерәһең?

¹⁶ Бәхетһеҙмен, үлем хәлендәмен йәшлегемдән; Дәһшәттәрең алдында сараһыҙ ҡалдым.

¹⁷ Асыуың башымдан ашты инде, Дәһшәтеңдән рухым һынды минең.

¹⁸ Ул көн һайын ташҡындай уратып ала, Мине һәр тарафтан ҡамалай.

¹⁹ Йәремдән, яҡын дуҫымдан айырҙың, Серҙәшем булып тик ҡараңғылыҡ ҡалды.