Зәбүр 85 - Изге Яҙма

1 Дауыттың доғаһы.

¹ Дауыттың доғаһы. Мин бисара бер фәҡирмен, Ҡолаҡ һал да яуап ҡайтар, Раббым!

² Мин Һиңә тоғромон, йәнемде һаҡла, Эй Аллам, Һиңә өмөт бағлаған ҡолоңдо ҡотҡар!

³ Көн оҙоно Һиңә ялбарамын, Эй бөйөк Хаким, миһырбанлы бул миңә.

⁴ Мин бәндәңдең күңелен һөйөндөр, Йәнемде Һин Хакимыма олғаштырам.

⁵ Һин игелекле, ғәфү итергә әҙерһең, бөйөк Хаким; Үҙеңде саҡырғандарға мөхәббәтең мул.

⁶ Йә Раббы, доғамды ишет, Ялбарыу ауазыма ҡолаҡ һал!

⁷ Хәсрәт көнөмдә Һине саҡырам, Беләм, миңә яуап ҡайтарырһың.

⁸ Бөйөк Хаким, илаһтар араһында Һиндәй юҡ, Һин эшләгән һымаҡ ғәмәлдәр юҡ.

⁹ Үҙең бар ҡылған халыҡтарҙың һәммәһе, Эй бөйөк Хаким, хозурыңа килеп баш эйер, Исемеңә дан-шөһрәт килтерер.

¹⁰ Сөнки Һин бөйөкһөң, Мөғжизәләр ҡылыусыһың. Яңғыҙ Һин генә Аллаһың!

¹¹ Йә Раббы, миңә юлыңды күрһәт – Һинең хәҡиҡәтеңдә йәшәйем. Йөрәгемә бары тик бер генә ынтылыш һал – Һинең исемеңде генә ҡурҡып хөрмәтләйем.

¹² Бар күңелемдән Һиңә шөкөр итермен, Хакимым Аллам! Мәңге Һинең исемеңде ололармын.

¹³ Миңә булған тоғро мөхәббәтең бөйөк, Йәнемде үлеләр донъяһы упҡынынан Һин ҡотҡарҙың.

¹⁴ Эй Алла, хаяһыҙҙар миңә һөжүм итә, Залимдар өйөрө йәнемде көҫәй. Улар бит Һине һанламай.

¹⁵ Эй бөйөк Хаким, Һин рәхимле, мәрхәмәтле, Сикһеҙ түҙемле, оло мөхәббәтле, тоғро Алла.

¹⁶ Хәлемде күр, мәрхәмәт-шәфҡәт ҡыл, Мин ҡолоңа көс-ҡеүәт бир, Ҡолиәңдең улын ҡотҡар.

¹⁷ Мине үҙ итеүеңдең берәй билдәһен күрһәт, Раббы! Миңә ярҙам иткәнеңде, йыуатҡаныңды күргәс, Миңә нәфрәт тотҡандар хурлыҡҡа ҡалһын.